حالىقارالىق بالالار شىعارماشىلىعى فەستيۆالىنىڭ جەڭىمپازدارى ماراپاتتالدى

«Mitsubishi Asian Children’s Enikki Festa» فەستيۆالى 1990 جىلدان بەرگى ارالىقتا «Mitsubishi» كورپوراتسياسىنىڭ قوعامدىق بايلانىس جونىندەگى كوميتەتىنىڭ قولداۋىمەن جاپونيا ۇلتتىق يۋنەسكو اسسوتسياتسيالارىنىڭ فەدەراتسياسىمەن جانە ازيا-تىنىق مۇحيتى ايماعى  يۋنەسكو كلۋبتارى جانە اسسوتسيالارىنىڭ فەدەراتسياسىمەن بىرلەسە وتكىزىلىپ كەلەدى. قازاقستاندىق ۇلتتىق يۋنەسكو كلۋبتارىنىڭ فەدەراتسياسى قر يۋنەسكو جانە يسەسكو ىستەرى جونىندەگى ۇلتتىق كوميسسياسى جانە الماتى قالاسىنداعى يۋنەسكو كلاستەرلىك بيۋروسى قولداۋىمەن 10 جىل بويىنا اتالمىش جوبانىڭ ەلىمىزدەگى ۇيىمداستىرۋشىسى بولىپ كەلەدى.

ال فەستيۆالدىڭ ماقساتى «بۇل – مەنىڭ ءومىرىم» تاقىرىبىنداعى سۋرەتتى كۇندەلىكتەردى جاساۋ ارقىلى بالالار اراسىندا مادەنيەتارالىق تۇسىنىستىكتى قالىپتاستىرۋ ءارى ساقتاۋ بولىپ تابىلادى.  جوبانىڭ العاشقى كۇنىنەن باستاپ 6 –12 جاس ارالىعىنداعى 700 000-نان استام ازيا ەلدەرىنىڭ جاس سۋرەتشىلەرى قاتىستى.

بيىلعى جىلعى 13 تسيكلدىڭ وتۋىنە ت.جۇرگەنوۆ اتىنداعى قازاق ۇلتتىق ونەر اكادەمياسى سەرىكتەس رەتىندە ءوز ۇلەسىن قوستى.  ازيا-تىنىق مۇحيتى ايماعىنىڭ 24 ەلىنەن كەلگەن قاتىسۋشىلار وزگە ەلدەردىڭ تاريحى, مادەنيەتى جانە سالت-داستۇرىمەن تەرەڭىرەك تانىسۋعا مۇمكىندىك الدى.

جۇيرىكتەردىڭ ىشىندە وزىق شىققان 12 جاسار ساۋلە ۋبايدۋللا حالىقارالىق ءادىل-قازىلار القاسىنىڭ شەشىمىمەن گران-پري يەگەرى اتاندى. ول شىمكەنت قالاسى بالالار كوركەمسۋرەت مەكتەبى – يۋنەسكو كلۋبىنىڭ وقۋشىسى, وسى جىلدىڭ شىلدە ايىندا جاپونيادا وتكەن حالىقارالىق ماراپاتتاۋ راسىمىنە قاتىستى. كورمە قوناقتارى بانگلادەش, بۋتان, برۋنەي-دارۋسسالام, ۆەتنام, ءۇندىستان, يندونەزيا, كامبودجا, قىتاي, كورەيا, لاوس, مالايزيا, مالديۆى, مونعوليا, ميانما, نەپال, پاكىستان, سينگاپۋر, قىتايلىق تايبەي, تايلاند, تيمور-لەستە, فيليپپين, شري-لانكا جانە جاپونيا ەلدەرىنەن جوبا جەڭىمپازدارىنىڭ جۇمىستارىن تاماشالادى.

ت. جۇرگەنوۆ اتىنداعى قازاق ۇلتتىق ونەر اكادەمياسىندا 12–23 قاراشا كۇندەرى  كەلۋشىلەر كورمە ەكسپوزيتسيالارىن تاماشالاي الادى.

ەلۆيرا سەرىكقىزى,

«ەگەمەن قازاقستان»

الماتى