ءتۋريزمدى دامىتۋدىڭ جاڭا تاسىلدەرى مەن ۇردىستەرىنە ارنالعان فورۋمدا قازاقستان پرەزيدەنتى نۇرسۇلتان نازارباەۆ پەن رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ قاتىسۋىمەن بىرقاتار ماڭىزدى قۇجاتتار قابىلداندى.
نۇرسۇلتان نازارباەۆ ءىس-شاراعا قاتىسۋشىلارعا ارناعان سوزىندە فورۋمنىڭ ء تيىمدى مەملەكەتارالىق الاڭعا اينالعانىن, رەسەي قازاقستاننىڭ ستراتەگيالىق وداقتاسى جانە ماڭىزدى ساۋدا-ەكونوميكالىق سەرىكتەسى بولىپ تابىلاتىنىن اتاپ كورسەتتى.
«بۇگىنگى فورۋمدا وتە وزەكتى جانە ماڭىزدى ماسەلە ەكى ەل اراسىنداعى ءتۋريزمى دامىتۋدىڭ جاڭا تاسىلدەرى مەن الداعى پەرسپەكتۆالارى قارالىپ, تالقىلاندى. تۋريزم جاھاندىق ەكونوميكالىق داعدارىس كەزىندە دە ەكونوميكانىڭ دامۋ قۇرالى سانالادى. قازاقستان مەن رەسەي بۇل ۇدەرىستەردەن شەت قالماۋى ءتيىس. بىزگە جول اشىلىپ جاتقان مۇمكىندىكتەردى ءتيىمدى پايدالانۋ كەرەك», دەدى مەملەكەت باسشىسى.
قازاقستان پرەزيدەنتى فورۋمنىڭ ەكىجاقتى وڭىرارالىق ىسكەرلىك قارىم-قاتىناستارعا جاڭا سەرپىن بەرىپ, ىنتىماقتاستىقتىڭ جاڭا كوكجيەگىن اشاتىنىنا سەنىم ءبىلدىردى.
القالى باس قوسۋ قورىتىندىسىندا شەكارالىق وڭىرلەردىڭ ءتۋريزمىن دامىتۋ بويىنشا ماڭىزدى شەشىمدەر الىنىپ, ۇكىمەتارالىق بىرلەسكەن قۇجاتتار مەن مەموراندۋمدارعا قول قويىلدى. تۋريستىك جانە كولىكتىك-لوگيستيكالىق ينفراقۇىلىم ءىس-قيمىلدارىن ۇيلەستىرۋ, شەكارالىق باقىلاۋدان كەدەرگىسىز ءوتۋ, قۇجاتتاردى راسىمدەۋدى جەڭىلدەتۋ,كاسپي الەۋەتىن بىرلەسىپ يگەرۋ, بايقوڭىر عارىش ايلاعىندا تۋريستىك كلاستەردى دامىتۋ سەكىلدى كەلەلى ماسەلەلەر قامتىلدى.
ەكى تاراپ قازاقستان مەن رەسەي شەكارالىق ايماقتارىندا تۋريستەردىڭ قىزىعۋشىلىعىن تۋدىراتىن جۇزدەن استام تۋريستىك مارشرۋتتى بىرلەسىپ جۇزەگە اسىرۋعا كەلىستى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى