قاڭتاردىڭ سوڭعى كۇندەرىندەگى جاڭبىر مەن قاردىڭ مول ءتۇسۋى وڭىردە ىلعالدىڭ شامادان تىس جينالۋىنا اكەلدى. وعان اقپانداعى اۋا رايىنىڭ كۇرت جىلىنۋى مەن جىلى جاڭبىردىڭ اسەرى قوسىلىپ, كوپتەگەن ايماقتاردا سەل قاۋپىن تۋعىزىپ, ابىگەرگە سالدى.قازىرگى كەزدە پانفيلوۆ اۋدانىنداعى قىرىققۇدىق, ىلە اۋدانىنداعى اقشي, ۇيعىر اۋدانىنداعى شونجى, جامبىل اۋدانىنداعى ۇزىناعاش, تارعاپ, ەسكەلدى اۋدانى جانە قاپشاعاي قالالارىنداعى ويپاڭ جەرگە ورنالاسقان تۇرعىن ۇيلەردى, كوشەنى سۋ باسىپ, جەدەل كومەك قاجەتتىگىن كورسەتتى. وسىعان وراي وبلىس اكىمدىگى مەن توتەنشە جاعدايلار جونىندەگى دەپارتامەنت قىزمەتكەرلەرى, اسكەريلەر تۇرعىنداردىڭ قىستىڭ كوزى قىراۋدا جاپا شەكپەۋ شارالارىن قاراستىرىپ, قاجەتتى تەحنيكا ءتۇرلەرىن جۇمىلدىرۋدا. سونداي-اق, حالىقتى قاۋىپسىز جەرگە كوشىرۋ, ورنالاستىرۋ جۇمىستارى دا ۇيىمداستىرىلعان.
پانفيلوۆ اۋدانىنداعى قىرىققۇدىق اۋىلىنداعى وتباسىلارى ۋاقىتشا قوناقۇيلەرگە ورنالاستىرىلسا, ۇيعىر اۋدانىنداعى قالعانتام جانە ۇزىنتاڭ ەلدى مەكەندەرىندەگى كوپىرلەردى قالپىنا كەلتىرۋ جۇمىستارى قولعا الىنىپ, ادام كۇشى, تەحنيكا جۇمىس ىستەۋدە. تارعاپ اۋىلىنداعى 40-تان استام وتباسى قاۋىپسىز جەرگە كوشىرىلسە, تەمىر جول بەكەتتەرىنىڭ بويىنداعى حالىقتىڭ دا قاۋىپسىزدىگىن قامتاماسىز ەتۋ ماقساتىنداعى جۇمىس جالعاسۋدا.
جاعداي كۇرتى سۋ قويماسىنىڭ تومەنگى ساعاسىنا ورنالاسقان اقشي اۋىلىندا كۇردەلى. مۇنداعى 6 000 ادام قاۋىپسىز ايماقتارعا كوشىرىلگەن. وبلىس اكىمىنىڭ ورىنباسارى بولات تاكەنوۆ پەن ىلە اۋدانىنىڭ اكىمى نيكولاي لوگۋتوۆ باسقارعان كوميسسيا مۇشەلەرى تۇرعىنداردىڭ وتباسىلارى مەن مال-مۇلكىن سەلدىڭ شايىپ كەتپەۋى ءۇشىن پلاتيناداعى سۋدى بىرنەشە كومپرەسسورلار ارقىلى ارناسىنا جەتكىزبەي اعىزۋدى جالعاستىرۋدا. سەلدىڭ الدىن الۋ شارالارىنا 20 تەحنيكا, جۇزدەن استام ادام كۇشى جۇمىلدىرىلىپ, توتەنشە جاعداي جاريالانعان.
جاعداي ءالى دە قاۋىپتى قالپىندا قالىپ وتىر. بۇعان اۋا رايىنىڭ كۇرت جىلىنىپ, جاڭبىردىڭ جيىلەۋى قوسىلسا, قاۋىپتى سەيىلتپەيتىنى ايتپاسا دا تۇسىنىكتى. دەمەك, تۇرعىنداردىڭ ۇيلەرىنە ورالۋىنا ءالى ەرتە. ال, كوميسسيا مۇشەلەرى تۇنگى, كۇندىزگى كەزەكشىلىكتى ۇيىمداستىرىپ, قاۋىپسىزدىك شارالارىنىڭ الدىن الىپ, بار مۇمكىندىكتى جۇمىلدىرۋدا.
كۇمىسجان بايجان, الماتى وبلىسى.