باتىس قازاقستان وبلىسىندا كورنەكتى جازۋشى حامزا ەسەنجانوۆتىڭ 110 جىلدىعىنا ارنالعان مادەني ءىس-شارالار ءوتىپ جاتىر.
«اق جايىق» تريلوگياسىنىڭ اۆتورى, قازاقستان مەملەكەتتىك سىيلىعىنىڭ لاۋرەاتى, «ەڭبەك قىزىل تۋ» جانە «قۇرمەت بەلگىسى» وردەندەرىنىڭ يەگەرى حامزا ىقسان ۇلى ەسەنجانوۆتىڭ 110 جىلدىق مەرەيلى تولۋىنا وراي ورال قالاسىنداعى «جەڭىس» ساياباعىندا جازۋشىعا بيۋست ورناتىلىپ, مەرەكەلىك ءىس-شارالار باستالدى.
ەسكەرتكىش بەلگىنىڭ اشىلۋىنا الماتى قالاسىنان اكادەميك, ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, بيولوگيا عىلىمدارىنىڭ دوكتورى, حامزا ەسەنجانوۆتىڭ نەمەرە ءىنىسى ايتقوجا بيعاليەۆ, ابىلاي حان اتىنداعى حالىقارالىق قاتىناستار جانە الەم تىلدەرى ۋنيۆەرسيتەتىنىڭ پروفەسسورى, فيلولگيا عىلىمدارىنىڭ كانديداتى, جازۋشىنىڭ كەلىنى دينا ەسەنجان, قازاقستان جازۋشىلار وداعى باتىس قازاقستان وبلىستىق فيليالىنىڭ جەتەكشىسى, «الاش» سىيلىعىنىڭ يەگەرى, اقىن اقۇشتاپ باقتىگەرەەۆا, ورال قالاسىنىڭ اكىمى مۇرات مۇقاەۆ, ادەبيەتشى-زەرتتەۋشى سايلاۋ سۇلەيمەنوۆ, تاريحشىلار, ولكەتانۋشىلار, كىتاپحاناشىلار, ۇستازدار, ستۋدەنتتەر جانە مەكتەپ وقۋشىلارى قاتىستى.
بۇدان كەيىن حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا «حامزا ەسەنجانوۆ – ادامزاتتىڭ اسىلى» اتتى اۋقىمدى مادەني جيىن بولىپ, جازۋشىنىڭ ءومىرى مەن شىعارماشىلىعىنا ارنالعان «تۇعىرى بيىك تالانت» اتتى ەستەلىك كىتاپتىڭ تۇساۋى كەسىلدى.
مادەني جيىن اياسىندا تەاتر فويەسىندە «قايسار تالانت ارقالاعان نار سەنىم, ۇمىتپايتىن ۇرپاقتارىڭ بار سەنىڭ» دەگەن تاقىرىپپەن كولەمدى كىتاپ كورمەسى, فوتو-ەكسپوزيتسيا جانە مۇراعاتتىق جادىگەرلەر كورەرمەن نازارىنا ۇسىنىلعان.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
فوتوسۋرەتتەردى تۇسىرگەن رافحات حالەلوۆ