پارلامەنت دەپۋتاتتارى ورالدا ءۇش اۋىسىمدا وقىتاتىن مەكتەپتە بولدى

ەلىمىزدە 127 مەكتەپ ءۇش اۋىسىمدا ءبىلىم بەرۋگە ءماجبۇر بولسا, 44 مەكتەپ عيماراتى اپات جاعدايىندا تۇر. ەلباسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا ءبىلىم سالاسىنا ەرەكشە كوڭىل ءبولىپ, جوعارىداعى ماسەلەنى تەز ارادا شەشۋدى تاپسىرعان بولاتىن. قازاقستان پارلامەنتىندەگى «نۇر وتان» پارتياسى فراكتسياسىنىڭ مۇشەلەرى ايزادا قۇرمانوۆا, ايگۇل نۇركينا, ءجاميلا نۇرمانبەتوۆا, سۆەتلانا بىچكوۆا جانە «اقجول» پارتياسى فراكتسياسىنان كەڭەس ابساتيروۆ ەلباسى جولداۋىنان تۋىندايتىن ماسەلەلەردى تالقىلاۋ ءۇشىن ورال قالاسىنىڭ زاچاگانسك اۋدانىندا جوباداعى 1200 وقۋشىنىڭ ورنىنا 2800-دەي بالا وقىپ جاتقان №47 مەكتەپتى ارنايى ارالاپ كوردى.  

باتىس قازاقستان وبلىسىندا ءۇش اۋىسىمدا ءبىلىم بەرىپ جاتقان مەكتەپ سانى بەسەۋ, ولار – ورال قالاسىنداعى №10, 18, 20, 47 جانە ەستەتيكالىق باعىتتا ءبىلىم بەرەتىن گيمنازيا. جالپى بقو بويىنشا 2163 وقۋشىعا ورىن جەتىسپەيدى.

- ءۇش اۋىسىمدا وقىتاتىن مەكتەپتەر تۋرالى پرەزيدەنت جولداۋىندا دا ايتىلىپ, بۇل ماسەلەنى تەز ارادا شەشۋ تاپسىرىلعان ەدى. سونىمەن بىرگە «پەداگوگ مارتەبەسى تۋرالى» جاڭا زاڭ جوباسىن جەرگىلىكتى مۇعالىمدەرمەن تالقىلاۋ ءۇشىن وڭىرلەرگە كەلدىك. ءبىلىم بەرۋدىڭ قولجەتىمدىلىگىن ارتتىرۋ ءۇشىن 2019-2021 جىلدارى رەسپۋبليكا بيۋدجەتىنەن قوسىمشا 50 ملرد تەڭگە بولىنەتىن بولدى. ەلىمىز بويىنشا 10311 ءبىلىم مەكەمەسى بار, ونىڭ 68%-ى مەملەكەتتىك بولسا, قالعانى جەكەمەنشىك. 90 مىڭنان اسا پەداگوگ مامانداردىڭ 55 مىڭى تاربيەشى بولىپ قىزمەت ەتەدى. ەلىمىزدە پەداگوگ كادرلاردىڭ ورتاشا جالاقىسى 76 مىڭ تەڭگە بولسا, تاربيەشىلەر 30 مىڭ تەڭگە ايلىق الادى. كورىپ وتىرعانىمىزداي, الدا شەشىلۋى ءتيىس ماسەلە كوپ. سوندىقتان جەرگىلىكتى جەرلەردەگى جاعدايدى كوزىمىزبەن كورىپ, ەلباسى جولداۋىن جۇزەگە اسىرۋعا ناقتى كومەگىمىزدى كورسەتكەلى كەلدىك, - دەيدى ءماجىلىس دەپۋتاتى ايگۇل نۇركينا.

پارلامەنت دەپۋتاتى ءجاميلا نۇرمانبەتوۆا ءوز سوزىندە پرەزيدەنت جولداۋىنا سايكەس الداعى بەس جىل ىشىندە ەلىمىزدە عىلىم, ءبىلىم جانە دەنساۋلىق سالاسىنا بولىنەتىن قاراجاتتى ىشكى جالپى ءونىمنىڭ 10 پايىزىنا دەيىن كوتەرۋ تۋرالى ستراتەگيالىق مىندەت قابىلدانعانىن, بۇل مەجەگە جەتۋ ءۇشىن كەشەندى شارالار قاجەتتىگىن ايتتى. «قاي جەرگە قانداي مەكتەپ قاجەتتىگى جونىندە ماسەلەنى جەرگىلىكتى اكىمدىكتەر مينيسترلىكپەن بىرگە تەز ارادا شەشۋى قاجەت. مەكتەپ عيماراتتارىن جوسپارلاۋدا دەموگرافيا مەن ميگراتسيا كورسەتكىشتەرى ەسكەرىلۋى كەرەك» دەيدى دەپۋتات. سونىمەن بىرگە بالا قاۋىپسىزدىگى ءۇشىن ءبىلىم مەكەمەلەرىن 100 پايىز باقىلاۋ كامەرالارىمەن قامتۋ كەرەك. جەرگىلىكتى اكىمدىك دەرەگىنشە, كەلەشەكتە زاچاگانسك كەنتىندە 1200 ورىندىق تاعى ءبىر مەكتەپ سالىنۋى جوسپارلانعان. بىراق باتىس قازاقستان وبلىستىق ءبىلىم باسقارماسىنىڭ باسشىسى شولپان قادىروۆانىڭ پىكىرىنشە, اۋدان تۇرعىندارىنىڭ دەموگرافيالىق ءوسىمى مەن قۇرىلىس قارقىنىن ەسەپتەسەك, بۇل اۋدانعا ءالى ەكى مەكتەپ قاجەت.

- ارينە, وقۋشى سانىنىڭ كوپتىگى ءبىراز قىندىق تۋدىرادى. مىسالى, دايىندىق بولىمىندە ءبىر سىنىپتا 35 وقۋشىعا دەيىن ءبىلىم الادى. دەگەنمەن, ءبىز ءبىلىم ساپاسىنا كوڭىل ءبولىپ, بارىنشا قىزمەت اتقارىپ جاتىرمىز. وتكەن وقۋ جىلىندا مەكتەپ بىتىرگەن 69 تۇلەكتىڭ 39-ى مەملەكەتتىك گرانت جەڭىپ الدى. قازاقستان بويىنشا ۇبت-دان ەڭ جوعارى بالل العان شاكىرتتەر قاتارىندا 137 بالل جيناعان ءبىزدىڭ انجەليكا ستەپانيدا بار. مەكتەبىمىز جاڭا, 2015 جىلى پايدالانۋعا بەرىلگەن. بارلىق كابينەتىمىز ينتەراكتيۆتى تاقتامەن, ءتيىستى قۇرال-جابدىقپەن قامتىلعان, ماماندار جەتكىلىكتى. مەملەكەت بارلىق جاعدايدى جاساپ وتىر. ارينە, اۋدانىمىزدا جاڭا مەكتەپ سالىنىپ, وقۋشىلار بولىنەتىن بولسا, مۇمكىندىگىمىز كوبەيە تۇسەرى ءسوزسىز, - دەيدى №47 مەكتەپ ديرەكتورى ناتاليا ەرعوجيەۆا.

قازبەك قۇتتىمۇرات ۇلى,

«ەگەمەن قازاقستان»

باتىس قازاقستان

سۋرەتتى تۇسىرگەن نازگۇل قوجانباەۆا