ەڭبەك جانە الەۋمەتتىك قورعاۋ ءمينيسترى ءمادينا ابىلقاسىموۆا جەتەكشىلىك ەتكەن رەسپۋبليكالىق اقپاراتتىق-ناسيحاتتىق توپتىڭ مۇشەلەرى بىرقاتار مەكەمە-كاسىپورىنداردى ارالاپ, ەڭبەك ۇجىمدارىمەن كەزدەستى.
ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى بويىنشا جۇمىس كۇشى كوپ وڭىرلەردەن بيىل 1200 ادام كوشىپ كەلدى. قىزىلجار اۋدانىندا تۇرعىندارمەن وتكەن كەزدەسۋدە ەڭبەك جانە الەۋمەتتىك قورعاۋ ءمينيسترى قونىستانۋشىلاردى جۇمىسقا ورنالاستىرۋ, جايلى باسپانامەن قامتۋ, باسقا دا الەۋمەتتىك جاعدايلاردى جاساۋ باعىتىندا جەرگىلىكتى جەردە اتقارىلىپ جاتقان شارالارعا وڭ باعا بەردى. ول ەلباسىنىڭ بيىلعى جولداۋىندا رەسپۋبليكا تۇرعىندارىنىڭ ءال-اۋقاتى مەن تۇرمىس ساپاسىن ارتتىرۋ باعىتىندا ىرگەلى مىندەتتەر قويىلعانىن, وعان قول جەتكىزۋدىڭ بارلىق مۇمكىندىكتەرى قاراستىرىلعانىن اتاپ ءوتتى.
«كەلەسى جىلدا سولتۇستىك قازاقستان وبلىسىندا قولجەتىمدى تۇرعىن ءۇي قاناتقاقتى جوباسى ىسكە قوسىلادى. ول بويىنشا ءار باسپانا ءۇشىن 6 ميلليون تەڭگە مولشەرىندە قاراجات ءبولۋ, كەيىن جەكەمەنشىككە ساتىپ الۋ جولدارى قاراستىرىلعان. كۇنگەيدەن كوشىپ كەلۋشىلەر اراسىندا بىلىكتى ماماندار از ەمەس. تەرىسكەيدە دارىگەر, مۇعالىم كادرلارى جەتىسپەيدى. كەلەشەكتە وسىنداي ولقىلىقتاردىڭ ورنى تولتىرىلاتىن بولادى», دەگەن م. ابىلقاسىموۆا تۇيتكىلدى ماسەلەلەردى دە نازاردان تىس قالدىرعان جوق.
ودان كەيىن «احمۋددينوۆ» شارۋا قوجالىعىنىڭ جۇمىسىمەن تانىستى. ونىڭ ديرەكتورى سەرمۇحامەد ورال ۇلى اعاشتى قالدىقسىز وڭدەۋمەن اينالىساتىندارىن, وڭتۇستىكتەن كەلگەن ازاماتتاردىڭ جۇمىس ىستەيتىنىن, 70 ادامنىڭ جۇمىسپەن قامتاماسىز ەتىلگەنىن, الداعى ۋاقىتتا 40 ادامدىق جاڭا جۇمىس ورنى قۇرىلاتىنىن جەتكىزدى. اقجارقىن داۋلەتتىڭ وتباسى وسىدان ەكى جىل بۇرىن تۇركىستان وبلىسىنان كوشىپ كەلىپتى. شىعىس مەديتسينانىڭ قىر-سىرىن مەڭگەرگەن وتاعاسى جەڭىلدىتى باعدارلاما اياسىندا 14 ميلليون تەڭگە نەسيە الىپتى. جۇبايى ستۋدەنتتەرگە ساباق بەرەدى.
بەسكول مەكتەپ-گيمنازياسىندا وتكەن كەزدەسۋدە مەكتەپكە دەيىنگى ءبىلىم بەرۋ, «پەداگوگ مارتەبەسى» زاڭىنىڭ قابىلدانۋى جايلى ماسەلەلەرى مۇعالىمدەردىڭ ەرەن قىزىعۋشىلىعىن تۋدىردى.
پەتروپاۆل الەۋمەتتىك قىزمەت كورسەتۋ ورتالىعىندا 300 ناۋقاسقا قىزمەت كورسەتىلەدى. ولاردىڭ 23-ءى–بىرىنشى توپتاعى مۇگەدەكتەر. مەكەمەدە پسيحولوگتار, ارنايى سەنسورلى كابينەت جۇمىس ىستەيدى. ۇجىممەن كەزدەسكەن مينيستر قويىلعان سۇراقتارعا جاۋاپ بەرىپ, جولداۋدان تۋىندايتىن اۋقىمدى مىندەتتەرگە بايلانىستى كەلەشەكتە اتقارىلاتىن ءىس-جوسپارلارمەن ءبولىستى.
اقپاراتتىق-ناسيحاتتىق توپتىڭ وزگە مۇشەلەرى دە بىرقاتار الەۋمەتتىك نىسانداردا وتكەن كەزدەسۋ-جۇزدەسۋلەردە جولداۋ تالاپتارىن جان-جاقتى ءتۇسىندىرىپ, ەلباسى تاپسىرمالارىن بىرلەسىپ اتقارۋعا شاقىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى