قاراعاندىدا بەلگىلى ءانشى, اۋەسقوي كومپوزيتور, قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى قوراباي ەسەنوۆتىڭ «ماڭگىلىك شىراق» اتتى مەرەيتويلىق كونتسەرتى ءوتتى. شىعارماشىلىق كەشكە ارنايى كەلىپ قاتىسقان وبلىس اكىمى ەرلان قوشانوۆ ءوزىنىڭ قۇتتىقتاۋ سوزىندە قوراباي ەسەنوۆ اندەرىنىڭ ۇلتتىق مۋزىكا ونەرىنىڭ التىن قورىنا ەنىپ, شىن مانىندە حالىق يگىلىگىنە اينالعانىن اتاپ ءوتتى.
– مەن ءسىزدىڭ شىعارماشىلىعىڭىزبەن بالا كەزىمنەن تانىسپىن. ءسىزدىڭ تالانتىڭىزدى دارىپتەيتىن ادامداردىڭ ءبىرىمىن. ءسىز ءبىزدىڭ, اعالارىمىزدىڭ كۋميرى بولعانسىز. ءسىزدىڭ اندەرىڭىز نەگىزىنەن سول ۋاقىتتاعى ءرومانتيزمدى سيپاتتايدى, ول كەزدەرى جاستار ءمولدىر, تازا سەزىمدەرگە, ماحابباتقا تولى بولاتىن. قوراباي اعا, حالىق ءسىزدى سول ءۇشىن جاقسى كورەدى, ءسىزدىڭ اندەرىڭىز قازاق راديوسىنىڭ التىن قورىندا ساقتالعان, – دەدى ەرلان قوشانوۆ.
ءوڭىر باسشىسى جەتپىسكە جاسى جەتكەن قوراباي ابىكەن ۇلىنىڭ يىعىنا شاپان جاۋىپ, سىي-قۇرمەت كورسەتتى.
شىعارماشىلىق كەشكە ءانشى عالىم مۇحامەدين, قازاقستاننىڭ ەڭبەك سىڭىرگەن ءارتىسى, ءانشى سەرىك وسپانوۆ, قازاقستاننىڭ ەڭبەك سىڭىرگەن قايراتكەرى جانعالي جۇزباەۆ جانە مەرەيتوي يەسىنىڭ شاكىرتى, ءانشى سەيىل اياعانوۆ سىندى ونەر سالاسىنىڭ مايتالماندارى مەرەيتوي يەسىنە قولداۋ-قوشەمەت كورسەتىپ, كەش كورىگىن قىزدىردى.
قوراباي ەسەنوۆ – جاڭاارقا اۋدانىنىڭ تۋماسى. ول ءوزىنىڭ سانالى عۇمىرىن اۋىل شارۋاشىلىعى سالاسىنا ارناعان جان. ەڭبەك جولىن تۋعان اۋىلىندا اگرونوم بولىپ باستاپ, ۇزاق جىلدار جاڭاارقاداعى استىق قابىلداۋ بەكەتى ديرەكتورىنىڭ ورىنباسارى, اۋداندىق اۋىل شارۋاشىلىق ءبولىمىنىڭ باسشىسى بولىپ قىزمەت ەتكەن. نارىق زامانىندا ءوز الدىنا جەكە شارۋاشىلىق قۇرىپ, كاسىپكەرلىكتىڭ دە تاسىن ورگە دومالاتىپ كەلە جاتقان سەگىز قىرلى, ءبىر سىرلى جان. سويتە ءجۇرىپ ول ءوزىنىڭ جان سەرىگى – گيتاراسىن قولىنان استاماي, ونەرگە مەيلىنشە ادالدىق تانىتىپ جۇرگەن شىعارماشىلىق يەسى.
اۋەسقوي ءانشى-كومپوزيتوردىڭ ون جەتى جاسىنان شىرقاعان «جاس قالام» ءانى وتكەن عاسىردىڭ 60-70-ءشى جىلدارى جاستار اراسىندا ەرەكشە تانىمال بولعان. وسى ءان ارقىلى ول بۇكىل قازاق ەلىنە تانىمال بولدى دەسەك, ارتىق ايتقاندىق ەمەس. بۇگىندە قازاق راديوسىنىڭ التىن قورىندا ءانشى-كومپوزيتوردىڭ 13-تەن استام ءانى ساقتالعان.
كەش يەسىن ەلىمىزدەگى بارد مۋزىكا باعىتىنىڭ نەگىزىن قالاعان ونەرپازدىڭ ءبىرى دەپ نىق سەنىممەن ايتۋعا بولادى. كەزىندە ەلىمىزدىڭ وسى سالاداعى تانىمال تۇلعاسى, دارا تالانت يەسى تابىلدى دوسىموۆتىڭ ءوزى قوراباي ەسەنوۆتى اۋىلىنا ارنايى ىزدەپ بارىپ, باتاسىن العان.
قايرات ءابىلدا,
«ەگەمەن قازاقستان»
قاراعاندى