«قازاقستان» ورتالىق كونتسەرت زالىندا قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋمەن استانا قالاسىنىڭ 20 جىلدىعىنا ارنالعان «جىر ارقاۋى – استانا» اتتى حالىقارالىق اقىندار ايتىسى ءوتىپ جاتىر.
ايتۋلى جىر دوداسىنا قىرعىزستان ەلىنەن اسىلبەك ماراتوۆ , مۋندۋزبەك ۋسۋپبەك, موڭعوليادان راشات ايدوس, قۋانتقان امانجول سىندى جۇلدەلى جۇيرىكتەر كەلسە, ەلىمىزدەگى تانىمال اقىندار ايبەك قاليەۆ, رينات زايتوۆ, مۇحتار نيازوۆ, رۇستەم قايىرتاي, ماقسات اقانوۆ, ديدار قاميەۆ, مەيىربەك سۇلتانحان, ءبىرجان بايتۋوۆ جانە وزگە دە ءسوز ساڭلاقتارى قاتىسىپ وتىر.
ءبىر ايتا كەتەرلىگى ايتىسقا قاتىسقان اقىندار عانا ەمەس, جىر دوداسىنىڭ قازىلىق قۇرامى دا حالىقارالىق بولدى. تۇركيادان بەلگىلى عالىم, ابدۋاقاپ قارا, موڭعوليادان اقىن, شىناي راحمەت ۇلى كەلىپتى. قازىلار القاسىنىڭ توراعاسى – اقىن, قازاقستان جازۋشىلار وداعىنىڭ توراعاسى ۇلىقبەك ەسداۋلەت. قازاقستاننىڭ حالىق اقىنى ءاسيا بەركەنوۆا, «ايقىن» گازەتىنىڭ باس رەداكتورى نۇرتورە ءجۇسىپ, بەلگىلى الاشتانۋشى ديحان قامزابەك ۇلى جانە ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ توراعاسى, ايتىستىڭ اقساقالى ءجۇرسىن ەرمان دا قازىلار قاتارىنا جايعاسىپتى.
استانانىڭ 20 جىلدىعىنا وراي ۇيىمداستىرىلعان ايتىسقا كەلگەن 20 اقىن كەشە ءسوز سايىستىرىپ, سولاردىڭ ىشىندە حالىقتىڭ دا, قازىلاردىڭ دا كوڭىلىنەن شىققان رينات, مەيىربەك, ايبەك, ديدار, رۇستەم, مۇحتار, ماقسات سىندى 12 اقىن بۇگىن ايتىس كورىگىن قىزدىرماق.
ايتىس بۇگىن «قازاقستان» ورتالىق كونتسەرت زالىندا 18:00-دە باستالادى.
ۇلاربەك نۇرعالىم ۇلى,
«ەگەمەن قازاقستان»