قازاقستان رەسپۋبليكاسىنىڭ باس پروكۋراتۋراسى «تابليعي جاماعات» ەكسترەميستىك ۇيىمىنىڭ (قازاقستان اۋماعىندا تىيىم سالىنعان) نەگىزىندە قۇرىلعان «ياقىن ينكار» ۇيىمىنىڭ ەلىمىزدەگى زاڭسىز قىزمەتىن انىقتادى, دەپ حابارلايدى ۆەدومستۆونىڭ ءباسپاسوز قىزمەتى.
باس پروكۋراتۋرانىڭ رەسمي ءسايتىندا مالىم ەتىلگەندەي, «ياقىن ينكار» ۇيىمىنىڭ شىنايى ماقساتى - جەكەلەگەن مەملەكەتتەردە, سونىڭ ىشىندە قازاقستان اۋماعىندا كونستيتۋتسيالىق قۇرىلىستى كۇشتەپ وزگەرتۋ, ەگەمەندىكتى بۇزۋدى بولجايتىن «حاليفات» قۇرۋ.
«اتالعان ۇيىمنىڭ ۇستانۋشىلارى قاقتىعىسقا الىپ كەلۋ مۇمكىندىگىن بىلە, تۇرا وزگە دىندەردى جوققا شىعارۋدا. بۇل ارەكەتتەر ءدىني ەكسترەميزم ۇعىمىنىڭ بەلگىلەرىنە ساي كەلەدى. «ياقىن ينكار» مۇشەسى بولعان قازاقستاننىڭ جەكەلەگەن تۇلعالارى بىزدىڭ ەلىمىزدىڭ اۋماعىندا ەكسترەميستىك ارەكەت جاساعاندىقتارى ءۇشىن باس بوستاندىقتارىنان ايىرۋعا سوتتالعان (استانا قالاسىنىڭ سارىارقا اۋداندىق سوتىنىڭ 10.04.2018 جىلعى ۇكىمى). قىلمىستىق ىستەر شەڭبەرىندە وسى ۇيىم مۇشەلەرىنىڭ قازاقستان اۋماعىندا توپتار قۇرۋ نيەتتەرى بولعاندىعى انىقتالدى. وسىنداي نەگىزدەر بويىنشا «ياقىن ينكار» ۇيىمى قىرعىزستاندا ەكسترەميستىك دەپ تانىلعان. وسىعان بايلانىستى, استانا قالاسىنىڭ پروكۋراتۋراسى, «پروكۋراتۋرا تۋرالى» زاڭمەن كوزدەلگەن وكىلەتتىكتەرىن ىسكە اسىرىپ, سوتقا «ياقىن ينكار» ۇيىمىن ەكسترەميستىك دەپ تانۋ تۋرالى ارىزبەن جۇگىندى. استانا قالاسىنىڭ ەسىل اۋداندىق سوتىنىڭ 2018 جىلعى 10 قازانداعى شەشىمىمەن اتالعان ارىز تولىق كولەمدە قاناعاتتاندىرىلدى», - دەلىنگەن باس پروكۋراتۋرا حابارلاماسىندا.
اتاپ وتىلگەندەي, سوت «ياقىن ينكار» ۇيىمىنىڭ ارەكەتىن ەكسترەميستىك دەپ تانىدى. سونداي-اق اقپاراتتىق ماتەريالداردى تاراتۋ جانە بۇقارالىق اقپارات قۇرالدارىن, تەلەكوممۋنيكاتسيانى, الەۋمەتتىك جەلىلەر, مەسسەندجەرلەر مەن بەينەحوستينگتەردى پايدالانۋ ارقىلى قىزمەتىن جۇرگىزۋگە قازاقستان رەسپۋبليكاسىنىڭ بارلىق اۋماعىندا تىيىم سالدى.
«قۇرمەتتى ازاماتتار, باس پروكۋراتۋرا سوت شەشىمىنەن كەيىن «ياقىن ينكار» ەكسترەميستىك ۇيىمىنىڭ ارەكەتىنە قاتىسقانى جانە قارجىلاندىرعانى ءۇشىن قىلمىستىق كودەكستىڭ 182, 258 جانە 405-باپتارىنا سايكەس قىلمىستىق جاۋاپكەرشىلىك كوزدەلگەنىن اتاپ وتەدى. «قاتىسۋ» ارەكەتىنە «ياقىن ينكار» ۇيىمىنىڭ يدەياسىن ۇگىتتەۋ جانە ناسيحاتتاۋ, ونىڭ جاريالانىمدارىن, پاراقشالارىن, پوستتارىن, پىكىرلەرىن جانە باسقا دا اقپاراتتىق ماتەريالدارىن دايىنداۋ, شىعارۋ, كوبەيتۋ جانە تاراتۋ جاتادى. «قارجىلاندىرۋ» ۇعىمىنا «ياقىن ينكار» ۇيىمىنا اقشانى, وزگە دە م ۇلىكتى بەرۋ نەمەسە جيناۋ, سىيعا تارتۋ, ايىرباستاۋ, قايىرمالدىق جاساۋ, سپونسورلىق جانە قايىرىمدىلىق كومەك, اقپاراتتىق جانە وزگە دە قىزمەت تۇرلەرىن كورسەتۋ جاتادى», - دەپ ناقتىلادى ۆەدومستۆودان.