سولتۇستىك وڭىردە كىرپىگى عانا قيمىلدايتىن قازاق ءتىلىنىڭ الپىس ەكى تامىرىنا قان ەندى جۇگىرۋى ءتيىستى. وبلىس اكىمى مالىك ءمىرزاليننىڭ تاپسىرماسىمەن ورىس تىلىندە ءبىلىم بەرەتىن مەكتەپتەردەگى قازاق ءتىلى ءپانىنىڭ مۇعالىمدەرى اراسىندا «ۇزدىك قازاق ءتىلى ءپانى مۇعالىمى» بايقاۋى جاريالاندى.
بۇرىن ورىس تىلىندە ءبىلىم بەرەتىن مەكتەپتەردەگى قازاق ءتىلىنىڭ قانشالىقتى دەڭگەيدە وقىتىلىپ جاتقاندىعىنا كوڭىل بولىنە بەرمەيتىن. بۇدان بىلايعى ارادا مۇعالىمدەردىڭ دە ىنتا-ىقىلاسى ارتىپ, ءتىلىمىزدىڭ تۇعىرى بيىكتەي مە دەگەن ءۇمىت بار. تاياۋدا ورىس تىلىندە ءبىلىم بەرەتىن ء بىلىم وشاقتارىندا قازاق ءتىلىن وقىتىپ جۇرگەن ۇستازدار اراسىندا وبلىستىق بايقاۋ وتكىزىلدى. بۇل ەڭ الدىمەن ەل ىشىندە جاعىمدى جاڭالىق رەتىندە اتالىپ جاتىر. ۇستازدار اراسىندا وڭدى ءۇردىستى ورىستەتۋ – ەڭ اددىمەن تىلگە دەگەن جاندى جاناشىرلىق. العاشقى دوداعا 15 مۇعالىم قاتىسىپ, ءوز بويلارىنداعى ءبىلىم مەن بىلىكتى ساراپقا سالىپ, تاجىريبەلەرىمەن ءبولىستى.
باس جۇلدەنى بۋراباي اۋدانىنداعى زەلەنوبور مەكتەپ-گيمنازياسىنىڭ قازاق ءتىلى مەن ادەبيەتى ءپانىنىڭ مۇعالىمى دامير سۇراعانوۆ جەڭىپ الدى. ءبىرىنشى دارەجەلى ديپلوم جاقسى اۋدانىنداعى ق.وسكەنباەۆ اتىنداعى قيما ورتا مەكتەبىنىڭ مۇعالىمى جانارگۇل الشىنباەۆاعا بۇيىردى.
وبلىس اكىمى مالىك ءمىرزاليننىڭ قاتىسۋىمەن وتكەن سالتاناتتى ءىس-شارادا جەڭىمپازدارعا سىي-سياپات كورسەتىلدى. باس جۇلدەگە 600 مىڭ, ءبىرىنشى ورىنعا 400 مىڭ تەڭگە بەرىلدى. ەكىنشى, ءۇشىنشى ورىن العاندار دا قۇرالاقان قالعان جوق.
وسى ءبىر يگىلىكتى شارادان كەيىن مۇعالىمدەردىڭ بويىندا قۇلشىنىس پايدا بولدى. بايقاۋدان سوڭ ۇستازدار دا, بىلايعى جۇرتشىلىق تا انا ءتىلىمىزدىڭ ابىرويى اساتىنىنا بەك سەنىمدى بولىپ تاراستى.
بايقال ءبايادىل,
«ەگەمەن قازاقستان»