قازاقستاندىق كاسىپقوي بوكسشى باتىر جۇكەمباەۆ كانادانىڭ كۆەبەك قالاسىندا وتكەن بوكس كەشىندە مەكسيكالىق بوكسشى پاتريسيو مورەنومەن جەكپە-جەككە شىعىپ, 14-ءشى جەڭىسىنە قول جەتكىزدى.
ەكى بوكسشى اراسىنداعى جەكپە-جەك 10 راۋندقا جوسپارلانعان بولاتىن. الايدا كەزدەسۋدىڭ جەتىنشى راۋندىندا جۇكەمباەۆتىڭ بۇيىردەن ۇرعان سوققىسىنان كەيىن مەكسيكالىق بوكسشى ورنىنان تۇرا الماي, كەزدەسۋدى جالعاستىرۋدان باس تارتتى. سونداي-اق ەكىنشى راۋندتا وتانداسىمىز مورەنونى ءبىر رەت نوكداۋنعا تۇسىرگەن-ءدى.
وسىلايشا 27 جاستاعى قازاقستاندىق كاسىپقوي بوكسشى مانسابىنداعى 14-ءشى جەڭىسىنە قول جەتكىزدى. ول 12 كەزدەسۋىندە قارسىلاسىن مەرزىمىنەن بۇرىن جەڭگەن. جۇكەمباەۆ ءوز سالماعىندا الەمدىك رەيتينگتە 33-ورىندا كەلەدى.
دايىنداعان الي بيتورە,
«ەگەمەن قازاقستان»