«استانا وپەرا» تەاترىنىڭ كامەرالىق زالىندا الەمدىك جانە ءداستۇرلى دىندەر كوشباسشىلارىنىڭ VI سەزىن وتكىزۋ اياسىندا «استانا – الەم داۋىسى» حالىقارالىق فەستيۆالىنىڭ سالتاناتتى اشىلۋ ءراسىمى ءوتتى.
ايتۋلى ونەر وقيعاسى ەلوردانىڭ 20 جىلدىعىنا وراي مادەنيەت جانە سپورت مينيسترلىگىنىڭ قولداۋىمەن «رۋحاني جاڭعىرۋ» باعدارلاماسى اياسىندا تاريحي-مادەني مۇرالاردى ساقتاۋ, دامىتۋ جانە ناسيحاتتاۋ ماقساتىندا ۇيىمداستىرىلدى. كەشتىڭ ءماندى دە قىزىقتى كونتسەرتتىك باعدارلاماسىن مادەنيەت قايراتكەرى, پروفەسسور گۇلميرا قۇتتىباداموۆا جەتەكشىلىك ەتەتىن استانا قالاسى اكىمدىگى مەملەكەتتىك اكادەميالىق فيلارمونياسىنىڭ كامەرالىق حورى ۇسىندى.
استانا قالاسىنىڭ مەملەكەتتىك اكادەميالىق فيلارمونياسى كامەرالىق حورىنىڭ نەگىزى 2004 جىلى قالانىپ, ءوزىنىڭ 14 جىلدىق تاريحىندا قازاقستان مەن ودان تىس ايماقتارعا بىرنەشە مارتە گاسترولدىك ساپارعا شىعىپ, كوپتەگەن حالىقارالىق مۋزىكا بايقاۋلارىندا جەڭىس تۇعىرىنان كورىنىپ ءجۇر. اتاپ ايتار بولساق, ولاردىڭ قاتارىندا: «World Choir Games» بايقاۋىنىڭ قوس التىن مەدالى (لاتۆيا, 2014), «شابىت-2014» حالىقارالىق شىعارماشىل جاستار فەستيۆالىنىڭ باس جۇلدەسى (استانا), «جۇبانوۆ كوكتەمى-2012» حالىقارالىق بايقاۋىنىڭ باس جۇلدەسى (اقتوبە), «حاينۋۆكا» ححح حالىقارالىق رۋحاني مۋزىكا فەستيۆالىنىڭ باس جۇلدەسى (پولشا, بەلوستوك, 2011), بەيجىڭدەگى بۇكىلالەمدىك حور فورۋمىنىڭ ەكى التىن كۋبوگى (قىتاي, 2011), «استانا – ءان قاناتىندا» فەستيۆالىنىڭ باس جۇلدەسى (استانا, 2008) جانە تاعى دا باسقا ماراپاتتار بار. ۇجىمنىڭ كوركەمدىك جەتەكشىسى گۇلميرا قۇتتىباداموۆا ءوزىنىڭ ۇستازى كسرو حالىق ءارتىسى, قازاقستاندىق حور ديريجەرى اناتولي مولودوۆتىڭ ءداستۇرىن لايىقتى تۇردە جالعاستىرا وتىرىپ, ءاردايىم حور مۋزىكاسىن ورىنداۋدا جوعارى شىعارماشىلىق دەڭگەيدى باعىندىرىپ كەلەدى.
باس شاھاردىڭ مادەني-رۋحاني ءومىرىن وركەندەتۋگە ولشەۋسىز ۇلەس قوسىپ كەلە جاتقان جاس تا بولسا جاسامپاز ونەر ۇجىمىنىڭ الەمدىك جانە ءداستۇرلى دىندەر كوشباسشىلارىنىڭ VI سەزى اياسىندا وتكەن «استانا – الەم داۋىسى» حالىقارالىق فەستيۆالىنىڭ اشىلۋ سالتاناتىنا ارنالعان كونتسەرتتىك باعدارلاماسىنا وتاندىق جانە الەمدىك حور مەكتەپتەرى شەبەرلەرىنىڭ ۇزدىك تۋىندىلارى مەن زاماناۋي وڭدەۋدەگى حالىق اندەرى ەنىپتى. ابايدىڭ «كوزىمنىڭ قاراسى», اقان سەرى قورامسا ۇلىنىڭ «قاراتورعاي», ە.استاتۋروۆتىڭ وڭدەۋىندەگى پ.چايكوۆسكيدىڭ «ششەلكۋنچيك mix» جانە ساز الەمىنىڭ تاعى دا باسقا ۇزدىك تۋىندىلارى ايتۋلى كەشتىڭ كورىگىن كىرگىزىپ, تالعامپاز مۋزىكا جانكۇيەرلەرىنە ەستەن كەتپەس ونەر دۋمانىن سىيلادى.
نازەركە جۇماباي,
«ەگەمەن قازاقستان»