ەلىمىزدىڭ ايماقتارىنان 34 كىتاپحاناشى استانا قالاسىندا ارنايى وقۋعا جينالدى. نازارباەۆ ۋنيۆەرسيتەتىندە رەسپۋبليكا بويىنشا قوعامدىق كىتاپحانالاردىڭ قىزمەتكەرلەرىنىڭ كاسىبي بىلىكتىلىگىن ارتتىرۋعا ارنالعان بەس كۇندىك سەمينار-ترەنينگ جۇمىسىن باستادى.
كىتاپحانا ءىسى ماماندارىنىڭ ءبىلىمى مەن كاسىبيلىگىن ارتتىرۋ ماقساتىندا «جاس وتان» جاستار قاناتى مەن نازارباەۆ ۋنيۆەرسيتەتى كىتاپحانالاردىڭ زاماناۋي وزگەرىستەرگە بەيىمدەلۋى مەن جاڭا فورماتتا قىزمەت كورسەتۋى بويىنشا سەمينارلار مەن تاجىريبەلىك ترەنينگتەر وتكىزەدى.
شارا بارىسىندا نازارباەۆ ۋنيۆەرسيتەتى كىتاپحاناسىنىڭ باس ساراپشىسى, بەلورۋس كىتاپحانا اسسوتسياتسياسى كەڭەسىنىڭ توراعاسى پەتر لاپو بەس كۇن بويى قاتىسۋشىلارعا ايماقتاعى كىتاپحانالاردىڭ سۇرانىسىن ارتتىرۋ جولدارىن ۇيرەتەدى. سونداي-اق شارا بارىسىندا قاتىسۋشىلار نازارباەۆ ۋنيۆەرسيتەتىنىڭ ستۋدەنتتەرىنە ارنالعان جاڭا كىتاپحانانىڭ جۇمىسىمەن دە تانىسادى.
«جاس وتان» جاستار قاناتىنىڭ توراعاسى دانيار سۇندەتباەۆ بۇل شارانىڭ ايماقتىق كىتاپحانالاردىڭ جاڭعىرۋ جولىندا جاسالعان ۇلكەن قادام ەكەنىن اتاپ ءوتتى: «قاتىسۋشىلار وسى سەمينار-ترەنينگ ناتيجەسىندە ءوز ايماقتارىندا قوعامدىق كىتاپحانالاردىڭ جۇمىسىن زاماناۋي تالاپتارعا ساي تۇرلەندىرۋگە قادام جاساپ, العان بىلىمدەرىمەن ءوز وڭىرلەرىندەگى ارىپتەستەرىمەن بلىسەدى دەپ سەنەمىز. قازىرگى زاماننىڭ كىتاپحانالارى جاستاردىڭ ءبىلىمىن تولىقتىرۋعا, جاڭا دوستار تابۋعا مۇمكىندىك بەرەتىن, بوس ۋاقىتىن ءتيىمدى وتكىزەتىن جاستار الاڭدارىنا اينالۋى ءتيىس».
«جاس وتان» ناۋرىز ايىندا وتكەن سەزىنەن كەيىن كىتاپحانالاردى جاستاردىڭ قاجەتتىلىگىنە جاۋاپ بەرەتىن زاماناۋي ءبىلىم ورتالىقتارىنا اينالدىرۋدى قولعا الدى. ۇيىم جىل سوڭىنا دەيىن بارلىق وبلىس ورتالىقتارىندا قوعامدىق كىتاپحانالاردان زاماناۋي جاستارعا ارنالعان كوۋوركينگ زونالارىن اشۋدى جوسپارلاپ وتىر.
قاتىسۋشىلاردىڭ ءبىرى شىمكەنت قالاسىنىڭ ورتالىقتاندىرىلعان كوپشىلىك كىتاپحانالار جۇيەسىنىڭ ديرەكتورى شاتىربەكوۆا گۇلسىم شارانىڭ كىتاپحاناشىلارعا بەرەر پايداسى تۋرالى ويىمەن ءبولىستى: «وڭىرلەردەگى كىتاپحانالارعا جاڭا ءومىر بەرۋ كەرەك ەكەنىن تۇسىنەمىز. بىزدە بار رەسۋرستاردى جاستار كەڭىنەن قولدانۋى ءۇشىن نە ىستەۋ كەرەك, كىتاپحانا مەنەدجمەنتى, كىتاپحانا جۇمىسىن جاڭا فورماتقا, زاماناۋي سۇرانىسقا ساي بەيىمدەۋ تاقىرىپتارىن الداعى سەمينارلار مەن ترەنينگتەردە تالقىلايتىن بولامىز. جاڭا ءبىلىم الىپ قانا قويماي, وزگە وڭىرلەردەن كەلگەن ارىپتەستەرىمىزبەن تانىسىپ, ءوزارا تاجىريبە الماسۋعا دا مۇمكىندىك بەرەدى».