قىزىلجاردا سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ كۋبوگى ءۇشىن العاشقى ىرىكتەۋ سايىسى ءوتتى. تاەكۆوندو, دزيۋدو, گرەك-ريم جانە ەركىن كۇرەستەردەن ۇيىمداستىرىلعان ءتۋرنيردىڭ «د» توبىندا سولتۇستىك قازاقستان, تۇركىستان, قىزىلوردا جانە اقمولا وبلىستارىنىڭ قۇرامالارى كۇش سىناسىپ, ءوزارا مىقتىنى انىقتادى.
قازاقستاندا «كونفەدەراتسيا كۋبوگى» وسىمەن ءۇشىنشى جىل قاتارىنان ۇيىمداستىرىلىپ وتىرعانىن ايتا كەتەيىك. جارىستىڭ ىرىكتەۋ تۋرى ەلىمىزدىڭ 4 قالاسىندا وتەدى. كەلەسى كەزدەسۋ قازاننىڭ 13-14 كۇندەرى تالدىقورعان قالاسىندا وتەدى. وعان الماتى, اقتوبە, قاراعاندى وبلىستارى مەن استانا جانە شىمكەنت قالالارىنىڭ قۇرامالارى قاتىسادى. ودان كەيىنگى كەزەڭدەردىڭ كەستەسىنە سايكەس, سەمەيدە قازاننىڭ 20-21 كۇندەرى شىعىس قازاقستان, قوستاناي, باتىس قازاقستان جانە پاۆلودار وبلىستارى سپورتشىلارىنىڭ شەبەرلىگى سىنالادى.
«جارىس العاش ۇيىمداستىرىلعان جىلى سولتۇستىك قازاقستان وبلىسىنىڭ گرەك-ريم قۇراماسى ءۇشىنشى ورىن العان بولاتىن. ال بىلتىر جولىمىز بولمادى. سوندىقتان بيىل بارىنشا تىڭعىلىقتى دايىندالدىق. تۇركىستان وبلىسىنىڭ سپورتشىلارى مىقتى بولعانىن مويىنداۋ كەرەك. دەگەنمەن, قىزىلجارلىقتار باسىم ءتۇستى. ەندى جەلتوقسان ايىندا الماتى قالاسىندا وتەتىن جارىسقا دايىندالامىز», – دەيدى گرەك-ريم كۇرەسىنەن سقو قۇراماسىنىڭ اعا باپكەرى قونىسبەك تۇكەنوۆ.
كەلەسى كەزدەسۋ جەلتوقسان ايىندا الماتى قالاسىنداعى بالۋان شولاق اتىنداعى سپورت سارايىندا وتەدى.
«جارىس تارتىستى ءوتتى. ءوزىم – تۇركىستان وبلىسىنىڭ ەركىن كۇرەس قۇراما كومانداسىنىڭ مۇشەسىمىن. بۇگىنگى دوداعا ءبىزدىڭ وڭىردەن سايدىڭ تاسىنداي ىرىكتەلگەن 6 بالۋان كەلدى. 86 كەلى سالماق جارەجەسىندە بوز كىلەمگە ءۇش رەت شىعىپ, القاشقىسىندا قىزىلوردالىق عالىمجان نوسەرباەۆتان جەڭىلىپ قالدىم. سوڭعى ەكەۋىندە قارسىلاسىمنان باسىم ءتۇستىم. ۇيىمداستىرۋشىلارعا العىسىم شەكسىز», – دەدى قر سپورت شەبەرى, تۇركىستاندىق سايد اببازوۆ.
كونفەدەراتسيا كۋبوگى 6 سپورت ءتۇرى بويىنشا ۇيىمداستىرىلادى. اتاپ ايتار بولساق: بوكس, تاەكۆان-دو, دزيۋدو, گرەك-ريم, قازاق جانە ەركىن كۇرەس. بۇل قازاقستاندا وتەتىن سايىستاردىڭ ىشىندە جۇلدە قورى ەڭ كوبى. ۇيىمداستىرۋشىلاردىڭ سوزىنە قاراعاندا, 5 وليمپيادالىق سپورت ءتۇرىنىڭ ارقايسىسىنا 25 ميلليون تەڭگەدەن بولىنگەن. قازاق كۇرەسى ەلىمىزدە جاڭا دامىپ كەلە جاتقان سپورت ءتۇرى بولعاندىقتان ونىڭ جۇلدە قورى 20 ميلليون تەڭگە.
ءومىر ەسقالي,
«ەگەمەن قازاقستان»