قىزىلوردا وبلىسىنىڭ اكىمى قىرىمبەك كوشەرباەۆ قالاداعى شىنى زاۋىتىنىڭ قۇرىلىس الاڭىنا بارىپ, ىسكە قوسىلاتىن بارلىق 4 نىساننىڭ قۇرىلىس جۇمىستارىمەن تانىستى.
قىزىلوردا وبلىسىنىڭ اكىمى قىرىمبەك كوشەرباەۆ قالاداعى شىنى زاۋىتىنىڭ قۇرىلىس الاڭىنا بارىپ, ىسكە قوسىلاتىن بارلىق 4 نىساننىڭ قۇرىلىس جۇمىستارىمەن تانىستى دەپ حابارلايدى «Egemen.Kz» ءتىلشىسى.
قازىرگى ۋاقىتتا قۇرىلىس الاڭىندا 17 مەردىگەر كومپانيادان 240-قا جۋىق ادام جۇمىس ىستەپ جاتىر.
بيۋدجەتتىك قاراجات ەسەبىنەن شىنى زاۋىتىنا قاجەتتى بارلىق ينفراقۇرىلىم جەتكىزىلەدى. بۇگىنگى تاڭدا گاز قۇبىرىنىڭ ەكى تارماعى, سۋمەن جابدىقتاۋ, كارىز جۇيەسى, ەلەكتر جەلىلەرى, جولدار مەن بايلانىس جەلىلەرى تارتىلدى.
اعىمداعى جىلدىڭ قاراشا ايىنا دەيىن تەمىر جولدىڭ قۇرىلىسىن اياقتاۋ جوسپارلانىپ وتىر.
بۇعان دەيىنگى سەرىكتەستىگى وزگەرگەن زاۋىتقا «چاينا تريۋمف» كومپانياسى كۇن باتارەيالارى, سمارتفوندار مەن پلانشەتتەر ( قۋاتتىلىعى كۇنىنە 250 توننا ۋلترا جۇقا شىنى وندىرەتىن زاۋىت ) ءۇشىن پايدالانىلاتىن وتە جۇقا ءارى ۋلترا ءمولدىر شىنى ءوندىرۋ ءۇشىن ينۆەستور رەتىندە قوسىلدى.
جاڭا جوبانىڭ قۇنى شامامەن 150 ميلليون اقش دوللارىن قۇرايدى.
باقتيار تايجان,
«ەگەمەن قازاقستان»
قىزىلوردا وبلىسى