مەملەكەتتىك حاتشى گۇلشارا ابدىقالىقوۆا جۇمىس ساپارىمەن وزبەكستان رەسپۋبليكاسىنا باردى. مەملەكەتتىك حاتشى ساپار اياسىندا وزبەكستان پرەمەر-ءمينيسترىنىڭ ورىنباسارى, ايەلدەر كوميتەتىنىڭ ءتورايىمى ت.نارباەۆانىڭ شاقىرۋى بويىنشا قازاقستان جانە وزبەكستان ايەلدەرى بيزنەس-فورۋمىنا قاتىستى.
سونداي-اق جيىن قوناقتارى قاتارىندا قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەلەرى, پارلامەنت دەپۋتاتتارى, مەملەكەتتىك ورگاندار, «اتامەكەن» ۇكپ, ۇكىمەتتىك ەمەس ۇيىمدار, كاسىپكەر ايەلدەر قوعامداستىعى وكىلدەرى بولدى.
قۇتتىقتاۋ سوزىندە گۇلشارا ابدىقالىقوۆا ەل پرەزيدەنتى ن.ءا.نازارباەۆ قازاقستان مەن وزبەكستان اراسىنداعى ەكىجاقتى قارىم-قاتىناستىڭ دامۋىنا ايرىقشا كوڭىل بولەتىنىن اتاپ ءوتتى.
مەملەكەتتىك حاتشى ەلباسىنىڭ ەكى حالىقتىڭ قارىم-قاتىناسىنىڭ ناعىز باۋىرلاستىق سيپاتى ءوز تامىرىن سوناۋ عاسىرلار قويناۋىنا تارتىپ, اتا-بابالارىمىزدىڭ داڭقتى ورتاق تاريحى مەن باي رۋحاني مۇراسى ارقىلى بەكىپ جاتقانى جونىندەگى ءسوزىن مىسال ەتتى.
گ.ابدىقالىقوۆا قازاقستاندا ايەلدەردىڭ ەكونوميكالىق مۇمكىندىكتەرىن كەڭەيتۋگە باعىتتالعان مەملەكەتتىك ساياسات جۇرگىزىلىپ وتىرعانىن ايتتى.
– دەموكراتيالىق قوعام قۇرۋدىڭ نەگىزگى باعىتىنىڭ ءبىرى گەندەرلىك ۇيلەسىمگە قول جەتكىزۋ بولىپ سانالادى. تاۋەلسىزدىك جىلدارىندا قوماقتى ناتيجەلەرگە قول جەتتى. ءبىزدىڭ ەلىمىزدە ايەلدەردىڭ ساياساتقا ارالاسۋى جونىنەن ۇلكەن ىلگەرىلەۋشىلىك بولدى. ماجىلىستە 29 ايەل بار, ياعني ولار دەپۋتاتتاردىڭ جالپى سانىنىڭ 27%-ىنەن اسادى. ەكونوميكادا قارقىندى تۇردە كاسىپكەر ايەلدەر سەكتورى قالىپتاستى. شاعىن جانە ورتا بيزنەس سۋبەكتىلەرىنىڭ 44%-ءىن ايەلدەر باسقارادى, ولار بۇل سالاداعى بارلىق جۇمىس ورنىنىڭ ۇشتەن ءبىرىن قامتاماسىز ەتىپ وتىر, – دەدى مەملەكەتتىك حاتشى.
فورۋمدا قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مەن وزبەكستان ايەلدەر كوميتەتى اراسىنداعى ىنتىماقتاستىق تۋرالى مەموراندۋمعا قول قويىلدى. قازاقستان مەن وزبەكستاننىڭ كاسىپكەر ايەلدەرىنىڭ يننوۆاتسيالىق بيزنەس-جوبالارى نازارعا ۇسىنىلدى, سىندارلى تۇردە وزىق تاجىريبە الماسۋ جۇزەگە اسىرىلدى.
مەملەكەتتىك حاتشى گ.ابدىقالىقوۆا فورۋم اياسىندا وزبەكستان پرەمەر-ءمينيسترىنىڭ ورىنباسارى, ايەلدەر كوميتەتىنىڭ ءتورايىمى ت.نارباەۆامەن بىرگە ايەلدەر بيزنەس قوعامداستىعى ىنتىماقتاستىعىنىڭ, سونداي-اق ايەلدەردىڭ ءرولىن ارتتىرۋ مەن مۇمكىندىكتەرىن كەڭەيتۋدىڭ وزەكتى ماسەلەلەرىن تالقىلادى.
ۆەنەرا تۇگەلباي,
«ەگەمەن قازاقستان»