الماتىداعى ۇلتتىق كىتاپحانادا قىتاي حالىق رەسپۋبليكاسى چۋنتسين قالالىق حالىقتىق ۇكىمەتى ءباسپاسوز قىزىمەتىنىڭ, چۋنتسين قالالىق حالىقتىق ۇكىمەتى سىرتقى ىستەر دەپارتامەنتىنىڭ, قحر الماتىداعى باس كونسۋلدىعىنىڭ قولداۋىمەن ء«بىر بەلدەۋ,ء بىر جول» جوباسى اياسىندا قحر مەن قازاقستان رەسپۋبليكاسى اراسىنداعى مادەني, ەكونوميكالىق جانە ساۋدا قارىم-قاتىناستارىنىڭ دامۋىنا ىقپال ەتۋ ماقساتىندا ۇيىمداستىرىلعان «چۋنتسين كەلبەتى» فوتوكورمەسى جانە «قىتاي مادەنيەت كۇندەرىنىڭ» اشىلۋ سالتاناتى ءوتتى.
چۋنتسين الەمدەگى قارىشتاپ دامىپ كەلە جاتقان ءىرى قالالاردىڭ ءبىرى. بۇگىندە حالقىنىڭ سانى 40 ميلليونعا جۋىقتاپ قالعان چۋنتسين قىتايدىڭ وڭتۇستىك- شىعىسىنداعى ماڭىزدى ونەركاسىپ ورتالىعى بولىپ تابىلادى.
ەرتەرەكتە با پاتشالىعىنىڭ استاناسى بولىپ تابىلعان 3000 جىلدىق تاريحى بار قالانىڭ اۋماعى اۋستراليا مەملەكەتىنىڭ كولەمىندەي. مۇنداعى 11 عاسىرعا تيەسىلى تاستاعى تاريحي ەسكەرتكىشتەر ءالى كۇنگە تۋريستەردى قىزىقتىرىپ كەلەدى. قالا كورىنىستەرىنە ارنالعان فوتوكورمەدە اسپانمەن استاسقان ءزاۋلىم عيماراتتاردى, بىرنەشە قاباتتان تۇراتىن كولىك دالىزدەرى مەن اسپالى كوپىرلەردى تاماشالاۋعا بولادى.
كورمەنىڭ اشىلۋ سالتاناتىندا الماتى قالاسى اكىمىنىڭ كەڭەشىسى ماماي احەتوۆ, قحر الماتىداعى باس كونسۋلىنىڭ ورىنباسارى مياو حۋنبو, ۇلتتىق كىتاپحاناسى ديرەكتورى جانات سەيدۋمانوۆ, قحر حالىقتىق ساياسي كونسۋلتاتيۆتى كەڭەسىنىڭ توراعاسى ۆان تسزيۋن ءسوز سويلەپ, چۋنتسين قالالىق حالىقتىق ۇكىمەتىنىڭ ناسيحات ءبولىمى, قازاقستان رەسپۋبليكاسى ۇلتتىق كىتاپحاناسى, ابىلاي حان اتىنداعى حالىقارالىق قاتىناستار جانە الەم تىلدەرى ۋنيۆەرسيتەتىنىڭ كونفۋتسي ينستيتۋتى اراسىنداعى ىتتىماقتاستىق مەموراندۋمعا قول قويۋ راسىمىنە سيۋە چجۋ حانىم, جانات سەيدۋمانوۆ, داي يۋانحۋن قاتىستى. شارا اياسىندا قىتاي حالقىنىڭ ۇلتتىق كيىم ۇلگىلەرى كورسەتىلىپ, كىتاپ سىيلاۋ ءراسىمى ءوتتى.
ەلۆيرا سەرىكقىزى,
«ەگەمەن قازاقستان»
الماتى