ەلباسى دۇنيەجۇزى قازاقتارىنىڭ V قۇرىلتايىندا شەتتەگى قانداستارىمىزدىڭ اتامەكەن قازىعى – قازاقستانمەن اقپاراتتىق, مادەني-رۋحاني بايلانىسىن نىعايتا ءتۇسۋ ءۇشىن ولارعا وتاندىق مەرزىمدى باسىلىمداردىڭ قولجەتىمدىلىگىن قامتاماسىز ەتۋدى تاپسىرعان بولاتىن. «Egemen Qazaqstan» گازەتى مەملەكەت باسشىسىنىڭ تاپسىرماسىن ورىنداۋ ماقساتىندا اقپارات جانە كوممۋنيكاتسيالار مينيسترلىگىنىڭ قولداۋىمەن ۇلتتىق ءباسپاسوز تاريحىندا تۇڭعىش رەت رەسەي اۋماعىندا گازەت تاراتۋعا ليتسەنزيا الدى. باس باسىلىمنىڭ 100 جىلدىق قارساڭىندا قول جەتكىزگەن وسى جانە باسقا دا جاڭالىقتارى ورتالىق كوممۋنيكاتسيالار قىزمەتىندە وتكەن بريفينگتە ايتىلدى.
«Egemen Qazaqstan» رەسپۋبليكالىق گازەتى» اق باسقارما توراعاسى دارحان قىدىرالى اتاپ وتكەندەي, گازەت كورشى ەلدىڭ مەرزىمدى باسىلىمدار كاتالوگىنا ەنگىزىلدى. رەسەيدىڭ قازاقستانمەن شەكارالاس وبلىستارىندا تۇراتىن اعايىندارىمىز ەندى «ەگەمەندى» جازدىرىپ الىپ وقۋىنا مۇمكىندىك بار. سول سياقتى بۇل جۇمىستار قىرعىز, موڭعوليا سىندى ەلدەردە دە جالعاساتىن بولادى. قازىردە وسى باعىتتاعى جۇمىستار جۇيەلى اتقارىلىپ, بۇگىندە قىرعىزستاندا گازەتىمىزدىڭ ارناۋلى ءتىلشىسى بار ەكەنىن ايتا كەتكەنىمىز ءجون.
باس باسىلىمنىڭ وقىرماندارىنا ۇسىناتىن تاعى ءبىر ۇلكەن جاڭالىعى – ايگىلى امەريكالىق الپاۋىت گازەت New York Times بەتىندەگى ايتۋلى ساراپتامالار, شولۋلار, ماقالالار لەگى الداعى كۇندەردە «Egemen» بەتىندە بەرىلە باستايتىنى. بۇل جاڭالىق «ەگەمەن قازاقستان» اق-ى مەن New York Times اراسىندا قول جەتكىزىلگەن كەلىسىمشارت نەگىزىندە جۇزەگە اساتىن بولادى. قازاقستاننىڭ اقپارات كەڭىستىگىنىڭ اياسىن كەڭەيتۋگە ىقپال ەتەتىن بۇل قادام وتاندىق جۋرناليستيكاعا ستيلدىك, مازمۇندىق جانە تىلدىك تۇرعىدان دا يگى اسەرىن تيگىزەدى دەپ پايىمدايمىز.
سونداي-اق ەلباسىنىڭ رۋحاني جاڭعىرۋ اياسىنداعى تاپسىرمالارىن ورىنداۋ ماقساتىندا «ەگەمەن» لاتىن الىپبيىنە كوشۋگە دە تولىق دايىن. بۇل ورايدا, اۆتورلىق باعانداردى لاتىن الىپبيىمەن جاريالاي باستاعان گازەت الداعى كۇندەرى «رۋحاني جاڭعىرۋ» سىندى تۇتاستاي ءبىر بەتىن لاتىن گرافيكاسىنداعى قازاق الىپبيىمەن باسۋعا كوشەتىن بولادى.
تاعى ءبىر توقتالاتىن جاڭالىق, بيىلدان باستاپ Egemen.kz ينتەرنەت رەداكتسياسى گازەتتىڭ اۋديونۇسقاسىمەن بىرگە Egemen.tv ۆيدەورەسۋرسىن دا ىسكە قوستى. ونىڭ قاتارىندا Youtube ارناسىنداعى «ورنەك», «ستاديون», «Egemen جاڭالىقتارى» بەينەجوبالارىن ايتۋعا بولادى.
گازەت باسشىسى سونىمەن قاتار باس باسىلىمنىڭ 100 جىلدىق مەرەيتويى قارساڭىندا عاسىرلىق تيراجى ەلەكتروندى فورماتقا كوشىرىلگەندىگىن دە اتاپ ءوتتى. «تسيفرلى قازاقستان» باعدارلاماسى اياسىندا اتقارىلعان اۋقىمدى ءىستىڭ ءبىرى بولاتىن بۇل جوبا دا قالىڭ وقىرمانمەن قاتار, زەرتتەۋشى عالىمدار ءۇشىن اسا قاجەتتى رەسۋرس.
مۇنىڭ سىرتىندا «ەگەمەن قازاقستان» گازەتى «Egemen-اكادەميا» جوباسىن جۇزەگە اسىرۋدى جالعاستىرىپ, II ماۋسىمىن باستايدى. I ماۋسىمدا بەلگىلى مەديامەنەدجەرلەر مەن جۋرناليستەردىڭ قاتىسۋىمەن 14 ءدارىس ءوتىپ, 50 قاتىسۋشى ستۋدەنتكە سەرتيفيكات بەرىلگەن بولاتىن. سونىمەن قاتار, جاڭا ماۋسىمدا وڭىرلىك ءباسپاسوز ۇجىمدارى ءوزارا تاجىريبە الماسۋ ءۇشىن «ەگەمەنگە» كەلەتىنىن ايتا كەتۋ كەرەك. ولاردىڭ العاشقى لەگىندە قىزىلوردا مەن شىعىس قازاقستان وبلىستارىنىڭ جۋرناليستەرى بولادى.
ميراس اسان,
«ەگەمەن قازاقستان»