ەلىمىز بويىنشا كۇزگى اسكەرگە شاقىرۋ ناۋقانى باستالدى. وتان قورعاۋعا اتتاناتىن بوزبالالار الدىمەن مەديتسينالىق تەكسەرۋدەن ءوتىپ, دەنساۋلىقتارىنىڭ جارامدىلىعى تۋرالى سىننان وتكەننەن كەيىن اسكەري بولىمدەرگە جونەلتىلەدى.
بۇل كەزەڭدە جەتىسۋ وڭىرىنەن دە 1991-2000 جىلى تۋىلعان 2 مىڭعا جۋىق ازامات اسكەر قاتارىنا اتتانباقشى. جاقىندا وسى شاراعا وراي, الماتى وبلىسى قورعانىس ىستەرى جونىندەگى دەپاراتمەنتىنىڭ ۇيىمداستىرۋىمەن نۇسقاۋلىق-ادىستەمەلىك جيىن وتتيكەن بولاتىن. اتالعان شاراعا شاقىرۋ, مەديتسينا كوميسسياسىنىڭ توراعالارى, جەرگىلىكتى اسكەري باسقارۋ ورگاندارىنىڭ باستىقتارى, تالدىقورعان گارنيزونىنىڭ اسكەري پروكۋرورى, ۇقكد, ءىىد جانە اسكەري بولىمدەردىڭ وكىلدەرى قاتىستى. جينالعاندار الدىندا ەسەپ بەرگەن وبلىستىق قورعانىس ىستەرى جونىندەگى دەپاراتمەنتىنىڭ باسشىسى, پولكوۆنيك تالعات داۋلەتحانوۆ كوكتەمگى مەرزىمدى اسكەرگە شاقىرۋ بارىسىن قورىتىندىلاپ, كۇزگى اسكەرگە شاقىرۋدىڭ نەگىزگى مىندەتتەرى مەن تالاپتارى تۋرالى ايتتى. وسى باسقوسۋدا قورعانىس ءىسى سالاسىنداعى قۇرلىمدىق بولىمدەردىڭ وكىلدەرى دە جەكە تاقىرىپتا بايانداما جاساپ, مەرزىمدى اسكەرگە شاقىرۋدا ورىن الاتىن ماسەلەلەر مەن ولاردى شەشۋ جولدارىمەن ءبولىستى. سونىمەن قاتار, قورعانىس ىستەرى جونىندەگى بىرىكتىرىلگەن باسقارماسى مەن ءبولىم باستىقتارى مەرزىمدى اسكەر قاتارىنا شاقىرۋعا دايارلىقتارى, جۇرگىزىلگەن جۇمىستارى مەن جوسپارلارى بويىنشا تىڭدالادى.
ءوز كەزەگىندە الماتى وبلىسى قورعانىس ىستەرى جونىندەگى دەپاراتمەنتىنىڭ باسشىسى, پودپولكوۆنيك تالعات داۋلەتحانوۆ اسكەرگە شاقىرۋ جۇمىسىمەن اينالىساتىن جاۋاپتى ادامداردىڭ قىزمەتتەرىنە جاۋاپكەرشىلىكپەن قاراۋعا شاقىردى.
وتان الدىنداعى بورىشىن وتەۋدى قاسيەتتى پارىزىم دەپ بىلەتىن, مورالدىق جانە پسيحولوگيالىق تۇرعىدان مىقتى, فيزيكالىق جاعىنان مىعىم ازاماتتارعا باسىمدىق بەرگەنىمىز ءجون, - دەدى ول.
كۇزگى اسكەرگە شاقىرۋ ناۋقانىن ساپالى, ءارى ۋاقتىلى ورىنداۋ ماقساتىندا كوميسسيا ءار شاقىرىلۋشىنى جەكە-جەكە قاراستىرىپ, العان ءبىلىمىن, ماماندىعىن ەسكەرەدى, وتباسى جاعدايىن ساراپتايدى, دەنساۋلىعىنىڭ جارامدىلىعىن باستى نازارعا الا وتىرىپ, ونى اسكەر قاتارىنا قابىلداۋ-قابىلداماۋ تۋرالى شەشىم قابىلدايدى. جاساقتاۋ ەكستەرريتوريالدى پرينتسيپكە سايكەس جۇزەگە اسىرىلادى, ياعني شاقىرىلۋشى وزگە وبلىسقا اتتاندىرىلادى.
بۇگىندە الماتى وبلىسىنان شاقىرىلعان ازاماتتار ەلىمىزدىڭ شەكارا قىزمەتىنىڭ اسكەري بولىمدەرىنە بورىشىن وتتەۋگە جونەلتىلىپ جاتىر. مەرزىمدى اسكەري قىزمەتكە شاقىرۋ جەلتوقسان ايىنىڭ سوڭىنا دەيىن جۇرگىزىلەدى.
قالماحانبەت مۇقامەتقالي,
«ەگەمەن قازاقستان»
الماتى وبلىسى