اتىراۋلىق وقۋشىلار دەمالىس كۇندەرىن سارايشىق اۋىلىندا وتكىزەدى. بۇل باستامانى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى ەلباسىنىڭ «رۋحاني جاڭعىرۋ» باعدارلاماسى اياسىندا قولعا الىپ وتىر.
جىبەك جولى بويىندا ورنالاسقان كونە شاھاردىڭ ورنىنان تابىلعان قۇندى جادىگەرلەر ارنايى مۋزەيدە ساقتالعان. وقۋشىلار تاريحي ورىنمەن تانىسىپ قانا قويماي, تاريحىنا قانىعادى, شەبەرلىك ساباقتارىنا قاتىسادى. وسى دەمالىس كۇندەرى بالالار قىش قۇمىرا مەن سازسىرناي جاساۋدى ۇيرەندى.
قولونەر شەبەرى جايلاۋ تالاسوۆ: «قازىر تۇرمىستىق بۇيىمداردىڭ باسىم بولىگى حيميالىق قوسپالار ارقىلى جاسالادى. ونىڭ زيانى ايتپاسا دا تۇسىنىكتى, سوندىقتان ۇلتتىق قولونەردى قايتا جاڭعىرتۋىمىز كەرەك. بۇرىنعى كيىز بەن تەكەمەتتى تارك ەتىپ, سينتەتيكالىق ءونىم پايدالانعاندى ءجون كورەمىز. اتا-بابامىز تازالىققا ەرەكشە ءمان بەرگەن. مىسالى, كيىز ۇيدە تەرىس ەنەرگيا جينالاتىن بۇرىش بولماعاندىقتان, شەڭبەر بويىمەن سىرت اينالىپ كەتەدى. جاڭا زامان تالابىنا ساي بولعان جاقسى شىعار, بىراق وتكەنىمىزدى دە ۇمىتپاعان ابزال», – دەيدى.
وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى ءتۋريزمدى دامىتۋ ءبولىمنىڭ باس مامانى الماس كوپجانوۆ تۋريستىك باعىتتاعى تاعىلىمدى شارالار جىل بويىنا جالعاساتىنىن ايتادى. مەكتەپ وقۋشىلارىنا دەمالىس كۇندەرى ارنايى ساياحات ۇيىمداستىرىلىپ, ۇلتتىق ويىنداردان جارىس, تاقىرىپتىق دارىستەر مەن شەبەرلىك ساباقتارىن وتكىزىپ تۇرۋ داستۇرگە اينالادى.
باقىتگۇل باباش,
«ەگەمەن قازاقستان»
اتىراۋ