اقتوبەدە دەمالىس ورىندارىن قالپىنا كەلتىرىپ, جاڭا دەمالىس ورىندارىن قۇرۋ بەلسەندى تۇردە جالعاسۋدا. بۇگىنگى كۇنى قالادا 66 گۇلزار مەن ساياباق بار. ولاردىڭ 48-ءى سوڭعى ءۇش جىلدىڭ كولەمىندە اشىلدى, دەپ حابارلايدى اقتوبە وبلىسى اكىمىنىڭ ءباسپاسوز قىزمەتى.
بارلىق جاڭا ساياباقتار مەن گۇلزارلاردى «Tۋعان جەرگە تاعزىم» اكتسياسىنىڭ اياسىندا مەملەكەتتىك جانە قوعامدىق ۇيىمداردىڭ قىزمەتكەرلەرى, ءتۇرلى كاسىپورىندار مەن جاي مۇددەلى ازاماتتار جابدىقتاعانىن ايتا كەتۋ كەرەك. جوبالارعا سايكەس سپورتتىق جانە ويىن الاڭدارى ورناتىلىپ, ۆەلوجولدار توسەلىپ, ورىندىقتار قويىلعان.
مىسالى, دەنساۋلىق ساقتاۋ باسقارماسىنىڭ باسشىلىعىمەن مەديتسينالىق قاۋىمداستىق باتىس-2 تۇرعىن ءۇي كەشەنىنىڭ تۇرعىندارىنا «دەنساۋلىق ساياباعىن» سىيلادى. ونىڭ اۋماعىندا 1500-دەن استام اعاشتار مەن بۇتالار وتىرعىزىلىپ, فۋتبول الاڭدارى, ۆەلوسيپەد جولى, ۇستەل تەننيسى, ۆوركاۋت الاڭى, سۋبۇرقاق ورناتىلعان. بولاشاق شاعىن اۋدانىندا جاڭا «Made in Aktobe» گۇلزارى اشىلدى. اقتوبەلىك تۇرعىندار ءۇشىن قارجىگەرلەر مەن ەكونوميستەر گۇلزارلارى جاڭا دەمالىس ورىندارىنا اينالىپ, «100 تەڭگە» تۇرىندەگى سيمۆوليكالىق ارحيتەكتۋرالىق نىسان قالا كوركىنە كورىك قوسۋدا.
2 قىركۇيەكتە قالا تاعى ءبىر ساياباقپەن تولىقتى. اقتوبەنىڭ ەسكى ەسكى بولىگىندە مۇنايشىلاردىڭ كاسىبي مەرەكەسى كۇنى «سنپس-اقتوبەمۇنايگاز» اق-نىڭ ءوز قاراجاتى ەسەبىنەن سالىنعان «دوستىق» وتباسىلىق ساياباعى اشىلدى. 14 گەكتار اۋماق 220 ملن. تەڭگەگە كورىكتەندىرىلدى. بالالار ويىن الاڭدارى, ۆولەيبول, باسكەتبول, شاعىن فۋتبول الاڭدارى, ۇستەل تەننيسى ءۇشىن ۇستەلدەر, ترەناجەرلار, كۇركەلەر ورناتىلعان.
«دوستىق» ساياباعىن كوگالداندىرۋ جانە كورىكتەندىرۋ جۇمىستارى جالعاسۋدا. قىركۇيەكتىڭ ورتاسىنان باستاپ مۇندا 300 اعاش وتىرعىزۋ جوسپارلانىپ وتىر.
قوسا كەتەيىك, اقتوبەدەگى 66 ساياباق پەن گۇلزارلاردىڭ جالپى اۋدانى 1,3 ملن. شارشى مەتردەن اسادى. وسى جىلدىڭ سوڭىنا دەيىن تاعى 3 گۇلزاردى كورىكتەندىرۋ اياقتالاتىن بولادى.
ودان باسقا, اقتوبەدە ءبىر شاقىرىمنان اساتىن جاياۋ جۇرگىنشىلەر ايماعى بار ءوز ارباتى پايدا بولادى. وندا شاعىن دۇكەندەر, سۋبۇرقاق, سۋرەتشىلەر اللەياسى جانە قالا تۇرعىندارى مەن تۋريستەردىڭ دەمالۋى ءۇشىن جايلى بۇرىشتار ورنالاسادى. تاعى ءبىر ماڭىزدى جوبا تۇڭعىش پرەزيدەنت ساياباعىنىڭ كەڭەيۋى. ونىڭ اياسىندا 90-گا جەردە استانا ساياباعى, ەتنو-اۋىلى, جاعالاۋداعى باستى اللەيا, عاشىقتار اللەياسى, ورمان جانە تاريحي ايماقتار, باسقا دا تاقىرىپتىق دەمالىس ايماعى سالىنادى. قازىرگى ۋاقىتتا ەكى جوبا دا ىسكە اسىرىلۋدا.