ويىندا «استانا» ەسەپ اشتى. 15-مينۋتتا قاۋىپتى شابۋىلداردىڭ بىرىندە ايىپ الاڭىنىڭ ىشىندە قوناقتار ويىنشىسى كارلاۋدىڭ قولىنا دوپ ءتيىپ, تورەشى پەنالتي بەلگىلەدى. 11 مەترلىك نۇكتەدەن پەدرو ەنريكە قاتەلەسكەن جوق.
1-تايم 1:0 ەسەبىمەن اياقتالدى.ەكىنشى بولىمدە تارتىس قىزا ءتۇستى, قاۋىپتى شابۋىلدار دا مولايا بەردى. قوناقتار ءجيى قىسقا پاستارمەن وينادى. ال استانالىقتار ءدال پاس بەرۋ جاعىنان كوپ قاتەلىك جىبەردى.
كيپرلىك ۇجىم ناعىز قاۋىپتى ساتتەرگە يە بولدى. بىردە قاقپاشى نەناد ەريچ تاماشا سەيۆتەرىمەن كوزگە تۇسسە, كەيدە قورعاۋشىلار سەنىمدى وينادى. ەسەسىنە گول سوعارلىقتاي ساتتەر تۋىنداتۋ قيىن بولدى. شابۋىل شەبىندە دجۋنيور كابانانگا مەيلىنشە بەلسەندى بولدى, اسىرەسە اۋەدەگى دوپقا تالاستىڭ كوپشىلىگىندە باسىمدىق تانىتتى.
بىراق 84-مينۋتتا باپكەر ونى رانگەلو يانگاعا الماستىردى. بىراق قارسىلاستىڭ قورعانىس شەبىن جارىپ ءوتۋدىڭ ءساتى تۇسكەن جوق. ويىننىڭ نەگىزگى ۋاقىتى «استانانىڭ» 1:0 ەسەبىندەگى جەڭىسىمەن اياقتالدى. نيكوسياداعى العاشقى كەزدەسۋدە اپوەل ءدال وسى ەسەپپەن ۇتقان بولاتىن. سوندىقتان, دانيالىق باس تورەشى ياكوب كەحلەت كوماندالاردى 15 مينۋتتان قوسىمشا ەكى تايم ويناۋعا شاقىردى. بىراق, ءبىرلى-جارىم شابۋىلداردى ايتپاعاندا, گول سوعۋعا قولايلى ساتتەر بولا قويعان جوق.
ەكىنشى وۆەرتايمدا كيپرلىكتەر ساپىندا گ. ءزاحيدتىڭ ورنىنا الاڭعا شىققان توماس دە ۆينچەنتە الىستان پارمەندى سوققى باعىتتادى. ابىروي بولعاندا, قاقپاشى ونىڭ گولعا اينالۋىنا جول بەرمەدى. قاقپالارعا گول سوعىلماعاندىقتان, جەڭىمپازدى پەنالتيلەر سەرياسى ارقىلى انىقتاۋعا تۋرا كەلدى. فۋتبول لوتەرەياسىندا كاپيتان نەناد ەريچ ەرلىك تانىتىپ, ەكى سوققىنى قايتاردى. جالپى, پەنالتيلەر سەرياسىندا «استانا» 2:1 ەسەبىندە جەڭىسكە جەتىپ, ەۋروپا ليگاسىنىڭ توپتىق كەزەڭىنە شىقتى.