مەملەكەت باسشىسى «بەس الەۋمەتتىك باستامانى» جۇزەگە اسىرۋ اياسىندا «قازترانسويل» كومپانياسى اتىراۋ مەملەكەتتىك ۋنيۆەرسيتەتىنە سىيعا تارتقان جاڭا ستۋدەنتتەر ءۇيىنىڭ عيماراتىمەن تانىستى.
جاتاقحانادا تۇراتىن ستۋدەنتتەرمەن اڭگىمەلەسۋ بارىسىندا ەلباسى ۇلكەندى قۇرمەتتەۋگە, كىشىگە قامقور بولۋعا, سونداي-اق ءوز وتانىڭدى سۇيۋگە نەگىزدەلگەن قازاق حالقىنىڭ سالت-ءداستۇرىن ۇستانۋدىڭ ماڭىزدىلىعىن ايتتى.
ۋنيۆەرسيتەت ستۋدەنتتەرى «بەس الەۋمەتتىك باستاما» اياسىنداعى جوبالاردىڭ جۇزەگە اسىرىلعانى جانە ستۋدەنت جاستارعا ءاردايىم قولداۋ كورسەتىپ كەلە جاتقانى ءۇشىن نۇرسۇلتان نازارباەۆقا العىس ايتتى.
سونىمەن قاتار, قازاقستان پرەزيدەنتىنە «رۋحاني جاڭعىرۋ» مەملەكەتتىك باعدارلاماسىنىڭ جانە «بەس الەۋمەتتىك باستامانىڭ» وبلىستاعى ىسكە اسىرىلۋ بارىسى جونىندە مالىمدەلدى.
– «قازاق تىلىندەگى 100 جاڭا وقۋلىق» جوباسىن ىسكە اسىرۋ اياسىندا وبلىستىڭ 18 وقۋ ورنى 6 مىڭنان استام وقۋلىقپەن قامتاماسىز ەتىلدى. «تۋعان جەر» ارنايى جوباسى اياسىندا جەرگىلىكتى مەتسەناتتاردىڭ قولداۋىمەن جالپى قۇنى 9 ميلليارد تەڭگە بولاتىن 46 جوبا جۇزەگە اسىرىلدى. سونىمەن قاتار, ءوڭىردىڭ شىعارماشىلىق ۇجىمدارى قازاقتىڭ مادەنيەتى مەن ونەرىن تانىتۋ ماقساتىمەن الەمنىڭ 12 ەلىنىڭ ساحناسىندا ونەر كورسەتتى. ايماق كاسىپكەرلەرىنىڭ قارجىسىنا تۇركيا استاناسى – انكارانىڭ ورتالىعىنداعى دينا نۇرپەيىسوۆا اتىنداعى الاڭدا بەلگىلى وتانداسىمىزدىڭ ءبيۋستى ورناتىلادى, – دەدى اتىراۋ وبلىسىنىڭ اكىمى ن.نوعاەۆ.
***
«7-20-25» باعدارلاماسى جۇزەگە اسىرىلا باستاعاننان بەرى ءوڭىر تۇرعىندارىنان قۇنى 454 ميلليون تەڭگەدەن اساتىن 35 ءوتىنىش كەلىپ ءتۇستى. ولاردىڭ 16-نا 181 ميلليون تەڭگە كولەمىندە جەڭىلدەتىلگەن نەسيە بەرىلدى. بيىل وبلىستا 1792 پاتەردەن تۇراتىن 26 تۇرعىن ءۇي پايدالانۋعا بەرىلەدى دەپ جوسپارلانۋدا.
كىرىس كولەمى 25 ايلىق ەسەپتىك كورسەتكىش بولاتىن 65 مىڭ ادامنىڭ جالاقىسى 1,1 ميلليارد تەڭگەگە ءوستى.
بيىل بەرىلگەن شاعىن نەسيەنىڭ سانى ەكى ەسە – 173-تەن 366-عا دەيىن ءوسىپ, جالپى سوماسى 1558,9 ميلليون تەڭگە بولدى.
2020 جىلعا قاراي وبلىستاعى وقۋ ورىندارىنىڭ قاجەتتىلىگىن تولىق قامتاماسىز ەتەتىن 1960 ورىندىق 13 جاتاقحانا سالىنادى.