«ءىى اباي وقۋلارى» ادەبيەت سايىسىنىڭ جەڭىمپازدارى ماراپاتتالدى

ءىس-شارا قازاقتىڭ ۇلى اقىنى, دانا ويشىلى, سازگەر, اعارتۋشى, قوعام قايراتكەرى, قازاق جازبا ادەبيەتىنىڭ نەگىزىن قالاۋشى جانە تۇڭعىش كلاسسيگى اباي قۇنانباي ۇلىنىڭ تۋعان كۇنىنە وراي ۇيىمداستىرىلدى. اباي شىعارماشىلىعى – وتاندىق مادەنيەتىمىزدىڭ ماقتانىشى, ۇلتتىق كودتىڭ اجىراماس بولىگى. ۇلى اقىننىڭ ەسىمى دۇنيەجۇزىنىڭ وقىرمان قاۋىمىنا كەڭىنەن تانىمال.

سالتاناتتى ءراسىمدى اشقان ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ:

– «اباي ءسوزى – قازاقتىڭ بويتۇمارى, اباي مۇراسى – حالىقتىڭ ەڭ قاسيەتتى قازىناسى» دەپ ەلباسى ن. نازارباەۆ ايتىپ وتكەندەي قازاق حالقى ابايدى ءوزىنىڭ رۋحاني ۇستازى, ۇلتتىق جاڭعىرۋىمىزدىڭ قاينار كوزى دەپ قابىلدايدى. ۇلى اقىن ەڭبەكتەرىنىڭ ۋاقىت وتكەن سايىن وزەكتىلىگى ارتىپ, قوعامدىق, رۋحاني ءارى مادەني ومىردەگى باعىتى ايقىندالا تۇسۋدە. بۇگىنگى كۇنى ەلىمىزدىڭ ەلدىگىن ۇلى ابايدىڭ اسىل سوزدەرىنسىز ەلەستەتۋ مۇمكىن ەمەس.

بەلگىلى مەملەكەت جانە قوعام قايراتكەرى ورازگۇل اسانعازى ادەبيەت سايىسىنىڭ جەڭىمپازدارى مەن قاتىسۋشىلارىن قۇتتىقتادى:

– ەتنوگراف, ونەرتانۋشى, ادەبيەتشى, جۋرناليست, قوعام قايراتكەرى اقسەلەۋ سەيدىمبەك ءوز سوزىندە «قازاقتاردى ەكى توپقا بولەمىن – ابايدى وقىعاندار جانە وقىماعاندار» دەگەن بولاتىن. ادامنىڭ بيىك قۇندىلىقتارى مەن مەيىرىمدىلىكتى جىرلاعان ۇلى ويشىلدىڭ باي شىعارماشىلىق مۇراسى قازاق ەلىن ماىگىلىك رۋحتاندىراتىنى ءسوزسىز, – دەدى ورازگۇل اسانعازىقىزى.

الەۋمەتتىك جەلىلەر مول تاجىريبەسى بار قالىڭ وقىرمان قاۋىمىنىڭ جانە دە اباي تۋىندىلارىمەن ەندى عانا تانىسقان جاس وقىرمانداردىڭ كەڭىنەن قولداناتىن بەلسەندى «كەزدەسۋ ورنىنا» اينالعان. جوبا, ەڭ الدىمەن, جاستارعا باعىتتالسا دا ەلىمىزدىڭ بارلىق وڭىرلەرىن قامتيتىن ءتۇرلى جاستاعى تۇرعىندارى مەن ءار سالادا ەڭبەك ەتەتىن ماماندارىنىڭ باسىن قوستى. كونكۋرسقا قاتىسۋشىلاردان استانا, الماتى, اقتوبە, قىزىلوردا, الماتى وبلىسى, اقمولا وبلىسى, سولتۇستىك قازاقستان وبلىسىنان 70 ءوتىنىم كەلىپ ءتۇستى. بۇعان قوسا فەيسبۋك جانە ينستاگرام جەلىلەرىنىڭ قولدانۋشىلارى سايىسقا اق تىلەكتەرى مەن ىزگى لەبىزدەرىن ءبىلدىرىپ, جەلى ىشىندە تاراتۋعا اتسالىستى.

كونكۋرستىڭ «اباي مۇراسىن الەمدىك دەڭگەيدە ناسيحاتتاۋشى» نوميناتسياسىنىڭ جەڭىمپازى پولشاداعى جەشۋۆ اقپاراتتىق تەحنولوگيالار جانە مەنەدجمەنت ۋنيۆەرسيتەتىنىڭ ستۋدەنتى گۇلناز قاليەۆا ابايدىڭ تاعىلىمى مول وسيەتتەرى ەشقاشاندا وزەكتىلىگىن جوعالتپايدى دەپ ەسەپتەيدى:

– ءبىزدىڭ ۋنيۆەرسيتەتتە الەمنىڭ تۇكپىر-تۇكپىرىنەن كەلگەن امەريكاندىق, بريتاندىق, ورىس, تاجىك, وزبەك, پولياك, ۋكراين سىندى ءتۇرلى ۇلت وكىلدەرى ءبىلىم الادى. شەتەلدىك ستۋدەنتتەردىڭ اباي قۇنانباي ۇلىنىڭ «كوزىمنىڭ قاراسى» ءانىن شىرقاعاندارىن تىڭداپ, ريزا بولدىم. بۇل ۇلى اقىنىمىز ابايدىڭ قازاقستانعا عانا ەمەس, بۇكىل الەمگە تانىمال ەكەنىن تاعى دا ءبىر دالەلدەي تۇسەدى. مەن ءوز حالقىممەن ماقتانامىن, وزگە ەلدىڭ وكىلدەرى ءبىزدىڭ مادەنيەتىمىزدى قۇرمەتتەپ, جوعارى باعالايتىنىنا وتە قۋانىشتىمىن. اباي سەكىلدى ۇلى ادامداردىڭ ەسىمى ەشقاشاندا ۇمىتىلمايتىنىنا سەنەمىن. ابايدىڭ دانالىعى – عاسىرلار بويى قۇندىلىعىن جوعالتپايتىن باعا جەتپەس رۋحاني قازىنا. فرانتسيادا, ۆەتنامدا, رەسەيدە, تۇركيادا, قىتايدا ۇلى اقىننىڭ قۇرمەتىنە ارناپ ەسكەرتكىشتەر ورناتىلدى.

ادەبي سايىستىڭ ەڭ تاجىريبەلى قاتىسۋشىسى – اقمولا وبلىسى شورتاندى اۋدانى قارا-ادىر اۋىلىنىڭ 7-سىنىپ وقۋشىسى اراي ارحاروۆا بولدى. ول ءبىرىنشى سىنىپتان باستاپ ادەبي سايىستارعا قاتىسىپ قانا قويماي, 2018 جىلى اۋداندىق اباي وقۋلارىنىڭ «ولەڭ ءسوزدىڭ پاتشاسى, ءسوز ساراسى» نوميناتسياسى بويىنشا ءبىرىنشى ورىندى يەلەنگەن. اراي اباي قۇنانباي ۇلىنىڭ 102 ولەڭىن جاتقا ايتادى:

– ۇلى ابايدىڭ شىعارماشىلىعىنا دەگەن قىزىعۋشىلىعىمدى مەنىڭ سۇيىكتى ۇستازىم, قازاق ءتىلى مەن ادەبيەتىنىڭ مۇعالىمى كۇلجامال سادۋاقاسوۆا وياتتى. قازىر مەن ابايدىڭ باسقا دا تۋىندىلارىن وقىپ جاتىرمىن. ۇلى اقىن, دانىشپان ويشىلدىڭ مۇراسىن ناسيحاتتاۋ ءۇشىن قولىمنان كەلگەندى ايانبايمىن. قازىنالى رۋحاني مۇرامىز – ەلىمىزدىڭ ماقتانىشى, الەمدىك مادەنيەتتىڭ قۇرامداس بولىگى.

ادەبي سايىسىمىزدىڭ ەڭ كىشكەنتاي قاتىسۋشىسى – استانا قالاسى №5 مەكتەپ-گيمنازياسىنىڭ 2-سىنىپ وقۋشىسى اقمونشاق سەرىكباي كوپشىلىكتىڭ كوزايىمىنا اينالدى:

– ءبىز انام ەكەۋمىز اباي اتامىزدىڭ ولەڭدەرىن ءسۇيىپ وقيمىز. وسىنداي سايىس بولاتىنىن ەستىگەندە بىردەن قاتىساتىنىمدى ايتتىم. ۇزاق ۋاقىت دايىندىق جاسادىق. انام ەكەۋمىزگە اباي اتانىڭ «كوزىمنىڭ قاراسى» ءانى ۇنايدى. مەن بارىنشا دايىندالىپ, تىرىسىپ باقتىم. سايىسقا قاتىسقان وتە ۇنادى, كەلەسى جىلى دا سايىسقا ءوز ۇلەسىمدى قوسۋعا ۋادە بەرەمىن.

ادەبيەت سايىسىنىڭ جەڭىمپازدارىن ماراپاتتاۋ راسىمىنە ەلباسى كىتاپحاناسىنىڭ قورىنان ارنايى كىتاپ كورمەسى ازىرلەندى. كورمەدە ابايدىڭ 50-گە جۋىق تۋىندىسى, بەلگىلى وتاندىق ابايتانۋشىلاردىڭ اقىننىڭ ءومىرى مەن شىعارماشىلىعىن زەرتتەگەن مونوگرافيالارى, سونداي-اق ۇلى اقىننىڭ شەت تىلدەرىنە اۋدارىلعان تۋىندىلارىنىڭ اۋدارمالارى ۇسىنىلدى.

سالتاناتتى ماراپاتتاۋ راسىمىنە مادەنيەت قايراتكەرى, فيلولوگيا عىلىمدارىنىڭ دوكتورى سەرىك نەگيموۆ, تانىمال ابايتانۋشى, ايتىسكەر اقىن سەرىكزات دۇيسەنعازى, سونداي-اق عىلىم مەن مادەنيەت قايراتكەرلەرى, استانا قالاسىنىڭ پەداگوگيكالىق قاۋىمداستىعىنىڭ وكىلدەرى قاتىستى.

ءادىل قازىلار القاسىنىڭ شەشىمى بويىنشا جۇلدەلى ورىندار مەن نوميناتسيالارعا يە بولعاندار:

1 ورىن – مەرۋەرت توقمولداەۆا (تاراز قالاسى, م.ح. دۋلاتي اتىنداعى تارمۋ-ءدىڭ 2-كۋرس ستۋدەنتى);

2 ورىن – اقتوتى اسانوۆا (الماتى قالاسى بوستاندىق اۋدانى №81 مەكتەپ-گيمنازياسىنىڭ 8-سىنىپ وقۋشىسى);

3 ورىن – دانا مۇحامەتىلدا (تاراز قالاسى, م.ح. دۋلاتي اتىنداعى تارمۋ-ءدىڭ 2-كۋرس ستۋدەنتى);

«ەڭ كىشكەنتاي ۇمىتكەر» – اقمونشاق سەرىكباي (استانا قالاسى №5 مەكتەپ-گيمنازياسىنىڭ 2-سىنىپ وقۋشىسى);

ء«بىر اۋلەتتىڭ ونەرپازدارى» – نۇراي مەن نۇرسايا سارسەنعالي (استانا قالاسى, №72 مەكتەپ-ليتسەيىنىڭ 6, 4-سىنىپ وقۋشىلارى); ىڭكار مەن زەرە ماقان (استانا قالاسى, №85 مەكتەپ-ليتسەيىنىڭ 4, 2-سىنىپ وقۋشىلارى);

«اباي مۇراسىن الەمدىك دەڭگەيدە ناسيحاتتاۋشى» – گۇلناز قاليەۆا (جەشۋۆ اقپاراتتىق تەحنولوگيالار جانە مەنەدجمەنت ۋنيۆەرسيتەتىنىڭ ستۋدەنتى, پولشا);

ء«ۇش ءتىلدىڭ دانەكەرى» – راۋان دۇيسەنباەۆ (ەكىباستۇز قالاسى, «زەردە» مەكتەبىنىڭ 7-سىنىپ وقۋشىسى); ءاسانالى كۇزەمباي (ەكىباستۇز قالاسى «زەردە» مەكتەبىنىڭ 4-سىنىپ وقۋشىسى); اراي ارحاروۆا (اقمولا وبلىسى شورتاندى اۋدانى قارا-ادىر ورتا مەكتەبىنىڭ 7-سىنىپ وقۋشىسى);

«ەڭ العاشقى وقىرمان» – سارا قۇرمانالى (استانا قالاسى, №72 مەكتەپ-ليتسەيىنىڭ 3-سىنىپ وقۋشىسى).