– توقسان جىلدىق توي قۇتتى بولسىن!
– توي تويعا ۇلاسسىن!
ەل اۋزىنداعى ءسوز, اقجارما تىلەك وسى.
كەشەگى كەڭەس زامانىندا ەڭبەكشىلدەر اتالىپ كەلگەن, الاشتىڭ اقيىعى ءبىرجان سالدىڭ كىندىك قانى تامعان قاسيەتتى توپىراق 2017 جىلدىڭ 13 جەلتوقسانى كۇنى قازاقستان رەسپۋبليكاسىنىڭ پرەزيدەنتى ن.نازارباەۆتىڭ جارلىعىمەن ءبىرجان سال اۋدانى بولىپ اتالعان بولاتىن. اق تۇيەنىڭ قارنى جارىلعان قۋانىشقا جالعىز اۋدان تۇرعىندارى عانا ەمەس, جالپاق جۇرت بىرگە قۋانعان. بۇگىن, مىنە, ماڭگى جاسىل قاراعايلار مەن قولدىڭ سالاسىنداي اققايىڭدار كومكەرگەن ماڭگىلىك ەلدىڭ مەرەيلى ءبىر پۇشپاعىندا كوپ كوڭىلىندەگى قۋانىشتار اتوي سالعان اۋداننىڭ توقسان جىلدىق تويى.
تويشى قاۋىم ءبىرجان سال بابامىزدىڭ الىستان كوز تارتاتىن ەڭسەلى ەسكەرتكىشىنە گۇل شوقتارىن قويدى. اۋدان ورتالىعىندا مادەنيەت جانە دەمالىس ساياباعى اشىلدى. ءسوز اراسىندا ساياباقتىڭ بۇرىن دا بولعاندىعىن ايتا كەتەلىك. بۇگىنگى كەيپى زامانا تالابىنا ساي جاڭعىرعان, جاسارعان ءتۇرى. مازمۇنمەن بايىتىلعان, مول ماعىنا ۇستەلگەن. رۋحاني جاڭعىرۋ ۇردىسىمەن قايتا جاڭعىرتىلعان مادەني نىسان ەل سۇرانىسىن تولايىم ەسكەرگەندىگى بايقالادى. ارقا توسىندەگى توي ءان-جىرسىز بولۋشى ما ەدى. اسەم اۋەن كوكشەنىڭ كوركەم قىراتتارىنان اسىپ, وقجەتپەستىڭ شىرقاۋ بيىگىنە ءىلىنىپ قالعانداي.
ءبىرجان سال اتىنداعى مادەنيەت سارايىنداعى سالتاناتتى ءماجىلىس ء«بىرجان سال ەلى» ءفيلمىنىڭ تۇساۋكەسەرىمەن باستالدى. اۋداننىڭ توقسان جىلدىق تاريحىن تولايىم قامتىعان فيلم بەس تاراۋدان تۇرادى ەكەن. وت-جالىندى وتىزىنشى جىلداردى, زۇلمات سوعىس پەن تىڭ كوتەرۋ تۇسىنداعى اۋىر ەڭبەكتى, تاۋەلسىزدىك جىلدارىنداعى تەڭدەسسىز ءوسۋ جىلناماسىن كوز الدىڭا جايىپ سالعاندا, عاجاپ ءبىر اسەرگە بولەنەسىڭ. كورەرمەندەر دە وزدەرىنىڭ اتالارى مەن اجەلەرىن, ادال ەڭبەكتەرىمەن ەل قۇرمەتىنە بولەنىپ جۇرگەن ازاماتتاردى تانىپ قۋانىسىپ وتىردى.
اقمولا وبلىسىنىڭ اكىمى مالىك ءمىرزاليننىڭ قۇتتىقتاۋىن جەتكىزگەن ونىڭ ورىنباسارى قانات ىدىرىسوۆ ءبىرجان سال اۋدانىنىڭ الەۋمەتتىك-ەكونوميكالىق دامۋ بارىسىنداعى تولايىم جەتىستىكتەردى جۇپتاپ ايتىپ بەردى. تالاي تاريحي تۇلعالاردى تاريبەلەگەن بۇل اۋدان قازاق مادەنيەتىنىڭ التىن بەسىگى بولۋىمەن قاتار, ەلباسىنىڭ ستراتەگيالىق باعىتتارىن جۇزەگە اسىرۋدا وزگەگە ونەگە كورسەتىپ كەلەدى. بۇل اۋداندا زاماناۋي اگروكەشەن قۇرىلىپ, يندۋستريالىق-يننوۆاتسيالىق ءۇردىس ماقساتكەرلىك سيپاتقا يە بولىپ وتىر. مەملەكەت باسشىسى نۇرسۇلتان نازارباەۆتىڭ «وركەن-اتانسور» تەمىر كەنىشىن, «KazBeej LTD» وزىق ۇلگىدەگى ءىرى قارا بورداقىلاۋ كەشەنىنىڭ اشىلۋى ءان-جىردىڭ التىن بەسىگى اتانعان ءوڭىردىڭ بۇگىنگى الەۋەتىن تانىتسا كەرەك.
جيىندا ءبىر توپ ەڭبەك ادامىنا وبلىس اكىمىنىڭ العىس حاتتارى تاپسىرىلدى. اۋدان اكىمى ەرمەك نۇعىمانوۆ جينالعان جۇرتشىلىقتى تولاعاي تويمەن قۇتتىقتاپ, ەلدىڭ وركەندەۋىنە ەلەۋلى ۇلەس قوسىپ كەلە جاتقان ازاماتتاردى ارنايى دايىندالعان مەرەكەلىك مەدالدارمەن ماراپاتتادى.
ءان مەككەسىندە ەكى كۇن بويى شىرايلى سالتانات ساتىمەن ساباقتالىپ, ۇلتتىق سپورت تۇرلەرىنەن جارقىن جارىستار ۇيىمداستىرىلدى.
بايقال ءبايادىل,
«ەگەمەن قازاقستان»
اقمولا وبلىسى,
ءبىرجان سال اۋدانى