فۋتزالدان الماتىدا ءوتىپ جاتقان ستۋدەنتتەر اراسىنداعى الەم بىرىنشىلىگىنىڭ تۇساۋكەسەر كەزدەسۋىندە چەحيانى 4:3 ەسەبىمەن ۇتقان قازاقستاننىڭ ەرلەر قۇراماسى بۇگىن ساعات 20:00-دە جاڭا زەلانديامەن كۇش سىناسادى.
«الماتى ارەنا» سپورت كەشەنىندە وتەن الەم بىرىنشىلىگىنىڭ اشىلۋ سالتاناتىندا العاشقى بولىپ ءسوز العان قالا اكىمى باۋىرجان بايبەك قازاقستان رەسپۋبليكاسىنىڭ پرەزيدەنتى –ۇلت كوشباسشىسى نۇرسۇلتان نازارباەۆتىڭ سىندارلى ساياساتىنىڭ ارقاسىندا ەلىمىزدە ەكونوميكا, الەۋمەت, مادەنيەت, سپورت جانە باسقا دا سالالاردى دامىتۋدا كوپتەگەن يگى شارالاردىڭ جۇزەگە اسىپ جاتقاندىعىن باسا ايتتى. راسىندا دا, بىلتىر استاناداعى حالىقارالىق ەكسپو كورمەسىنىڭ جانە الماتىداعى قىسقى دۇنيەجۇزىلىك ۋنيۆەرسيادانىڭ ۇيىمداستىرىلۋىنىڭ ارقاسىندا اتالمىش قالالاردا بىرقاتار كوركى كوز سۇيسىندىرەتىن, زامان تالابىنا ساي عيماراتتار پايدا بولدى. سپورت سالاسىنا قاتىستى ايتاتىن بولساق, قازىرگى كەزدە الاتاۋ بوكتەرىندە بوي كوتەرگەن «استانا ارەنا» مەن «حالىق ارەنا» كەشەندەرىندە جۇزدەگەن شارالار ءوتىپ, كوپتەگەن ۇيىرمەلەر جۇمىس ىستەۋدە. سونىڭ ارقاسىندا مىڭداعان جاستاردىڭ ەش الاڭسىز دايارلانۋىنا جاعداي جاسالىپ وتىر.
جارىستىڭ اشىلۋ سالتاناتىندا قازاقستان رەسپۋبليكاسى ءبىلىم جانە عىلىم ءمينيسترى ەرلان ساعاديەۆ جانە حالىقارالىق ستۋدەنتتەر سپورتى فەدەراتسياسىنىڭ (FISU) ۆيتسە-پرەزيدەنتى ماريان دىمالسكي دە ءسوز سويلەپ, قاتىسۋشىلارعا ساتتىلىك تىلەدى.
وسى شارا بارىسىندا جينالعان قاۋىم قىرشىن كەتكەن داڭقى سپورتشى دەنيس تەندى ەسكە الدى. وليمپيا ويىندارى مەن الەم چەمپيوناتتارى جانە باسقا دا اسا ءىرى حالىقارالىق جارىستاردا جەڭىس تۇعىرىنا كوتەرىلگەن ايگىلى مانەرلەپ سىرعاناۋشى جايىندا بەينەروليك كورسەتىلدى. سودان كەيىن ورتاعا كوك تۋىمىزدى ورەندەرىمىز الىپ شىقتى. «الماتى ارەنادا» قازاقستاننىڭ ءانۇرانى شىرقالىپ, جارىسقا قاتىسۋشىلار انت بەردى.
ەستەرىڭىزگە سالا كەتەيىك, الماتىدا ءوتىپ جاتقان الەم بىرىنشىلىگى 26 تامىزعا دەيىن سوزىلادى. بۇل جارىستا 17 مەملەكەتتەن كەلگەن 500-دەن اسا سپورتشىلار باق سىناۋدا. اتاپ ايتساق, ەرلەر اراسىندا 16 جانە ايەلدەر سايىسىندا 9 كوماندا شەبەرلىك بايقاسۋدا.
قازاقستاننىڭ ايەلدەر قۇراماسى دا بۇگىن جاڭا زەلانديامەن كەزدەسەدى. بۇل باسەكە 18:00-دە باستالادى. ەلىمىزدىڭ قوس كومانداسى دا توپتىق تۋرنيردەگى ءوز ويىندارىنىڭ بارلىعىن «الماتى ارەنادا» وتكىزەدى. ەرتەڭ ءبىزدىڭ جىگىتتەر بولگاريامەن, ال قىزدار پورتۋگاليامەن كۇش سىناسادى.
عالىم سۇلەيمەن,
«ەگەمەن قازاقستان»
الماتى