ءوز زامانىندا «كومەكەي اۋليە» اتانعان بۇقار جىراۋ قالقامان ۇلىنىڭ 350 جىلدىق تويى ارقا توسىندە دۇركىرەپ ءوتتى. سەنبى, 18 تامىز كۇنى جيىلعان قاۋىم الدىمەن ۇلى تۇلعانىڭ كەسەنەسىندە قۇران باعىشتاپ, بوتاقارا كەنتىندەگى ەسكەرتكىشىنە گۇل شوقتارىن قويدى. نەگىزگى توي اۋدان ورتالىعىنان 55 شاقىرىم جەردە ارنايى تىگىلگەن كيىز ۇيلەر اۋىلىندا باستالدى. «بابا رۋحىنا تاعزىم» اتتى مەرەكەلىك شارالار وسى جەردە ءوتتى.
سالتاناتتى شاراعا قازاقستان رەسپۋبليكاسىنىڭ مەملەكەتتىك حاتشىسى گۇلشارا Əبدىقالىقوۆا, قاراعاندى وبلىسىنىڭ اكىمى ەرلان قوشانوۆ, ءماجىلىس دەپۋتاتى قۋانىش سۇلتانوۆ, بەلگىلى مەملەكەت جəنە قوعام قايراتكەرلەرى, ەلىمىزدىڭ ءار ايماعىنان كەلگەن قالىڭ بۇقارا قاتىستى.
دارحان دالا توسىندەگى ۇلان-اسىر توي شىمىلدىعى س.سەيفۋللين اتىنداعى قاراعاندى وبلىستىق قازاق دراما تەاترى ارتىستەرىنىڭ قاتىسۋىمەن بۇقار جىراۋدىڭ ءومىرى تۋرالى «كۇمىس كومەي əۋليە» اتتى تەاترلاندىرىلعان قويىلىمىمەن اشىلدى. مەملەكەتتىك حاتشى گۇلشارا Əبدىقالىقوۆا قازاقستان پرەزيدەنتى نۇرسۇلتان نازارباەۆتىڭ قۇتتىقتاۋىن وقىدى.
«بۇقار جىراۋ – حالىق تاعدىرى تارازىعا تۇسكەن قيىن-قىستاۋ جىلداردا ءۋاجدى سوزىمەن دە, ەرلىكتى دارىپتەگەن وتتى جىرلارىمەن دە ەلدى ۇيىتىپ, حالقىمىزدى باسشىسىنىڭ توڭىرەگىنە تىعىز توپتاسۋعا, اتا مەكەنىمىزدى جاتجەرلىك باسقىنشىلاردان قورعاۋعا ءۇنىن قوسا بىلگەن ۇلكەن قايراتكەر تۇلعا.
ونىڭ وتكىر دە وتتى جىرلارىنىڭ توركىنىندە قازاقتىڭ ءبىرتۇتاس ۇلت, قۋاتتى ەل بولۋىن اڭساعان ۇلى ارمان جاتتى. جىراۋدىڭ تاريحي تۇلعاسى, ءومىرى مەن شىعارمالارى بۇگىنگى ۇرپاق ءۇشىن قانشالىقتى قىمبات تا قاستەرلى بولسا, كەلەشەكتە دە سولاي بولىپ قالا بەرەتىنى ءسوزسىز.
ءبىز – ۇلى بابامىز ارمان ەتكەن ءبىرتۇتاس ۇلت, قۋاتتى مەملەكەت بولۋدى جۇزەگە اسىرعان باقىتتى ۇرپاقپىز. سوندىقتان بۇقار جىراۋ مۇرا ەتكەن ەل تاعدىرى, ۇلت بىرلىگى ماسەلەسى حالقىمىز ءۇشىن ءاردايىم وزەكتى بولىپ قالا بەرەدى. بۇگىنگى ۇلكەن سالتانات تا وسىنداي يگى ماقسات ورايىندا وتكىزىلىپ وتىر. ۇلى بابامىزدىڭ ارمانى بولعان بۇگىنگى تاۋەلسىز ەلىمىز ماڭگى جاساي بەرسىن!», – دەگەن ەلباسى بۇقار بابا تۇلعاسىنىڭ تاريحتاعى ورنىنا لايىقتى باعاسىن بەرگەن.
قاراعاندى وبلىسىنىڭ اكىمى ەرلان قوشانوۆ اتاپ وتكەندەي, بۇقار جىراۋ قالقامان ۇلىنىڭ 350 جىلدىعى ەلىمىزدىڭ ورتاق تويى. جىراۋعا ارنالعان ءىس-شارالار مۇنىمەن شەكتەلمەيدى. كۇزدە اۋقىمدى عىلىمي-پراكتيكالىق كونفەرەنتسيا وتەدى جəنە ءبىرىنشى كەزەكتە جاستاردى وتانىن سۇيۋگە, پاتريوتتىق سەزىمدەرىن وياتۋعا باعىتتالعان بىرقاتار مەرەيتويلىق شارالار جوسپارلانعان.
بۇقار جىراۋ ەلىمىزدىڭ تاريحىندا وشپەس مۇرا قالدىرعان ايگىلى اقىن ءھام ءوز زامانىنىڭ دانا دا دارا ءبيى, شەشەندىك ونەرىمەن حالىقتى وزىنە قاراتقان جىراۋ, ابىلاي حاننىڭ كەڭەسشىسى بولعان كەمەڭگەر تۇلعا.
بۇقار جىراۋ قالقامان ۇلىنىڭ مەرەيتويى قاراعاندى وبلىسىندا جىل باسىنان بەرى ءتۇرلى شارالارمەن اتالىپ وتۋدە. وڭىردە ۇلى ويشىلدىڭ ءومىرى مەن شىعارماشىلىعىنا ارنالعان كورمەلەر, بايقاۋلار, كونتسەرتتەر, جىرشى-جىراۋلار فەستيۆالى, عىلىمي كونفەرەنتسيالار ءوتتى.
مەرەكەلىك شارا وبلىستىڭ شىعارماشىلىق ۇجىمدارىنىڭ قاتىسۋىمەن ۇيىمداستىرىلعان كونتسەرتتىك باعدارلاماعا ۇلاستى. سونىمەن قاتار كوپشىلىك وسى تويعا ارنايى كەلگەن قازاقستاننىڭ حالىق ءارتىسى روزا رىمباەۆانىڭ, مادەنيەت سالاسىنىڭ ەڭبەك سىڭىرگەن قايراتكەرلەرى التىناي جوراباەۆانىڭ, ءجاميلا باسپاقوۆانىڭ, تاجىكستاننىڭ ح.دادوبوەۆ اتىنداعى فولكلورلىق ءانسامبلدىڭ ونەرلەرىنە ءتانتى بولدى.
ءتۇس اۋا ۇلتتىق ويىندار مەن سپورت تۇرلەرىنەن ۇيىمداستىرىلعان سايىستارعا كەزەك بەرىلدى: ءار قيىردان كەلگەن مىقتىلار قازاق كۇرەسىنەن, كوكپار مەن اۋدارىسپاقتان كۇش سىناسىپ, جۇيرىكتەرىن الامان بايگە مەن توپ بايگەگە قوستى.
دالا توسىندەگى اۋقىمدى شارا ەلباسى ن.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ اياسىندا ۇيىمداستىرىلدى. بۇل رۋحاني قۇندىلىقتاردى, ۇلتتىق سالت-ءداستۇردى, قازاق ەلىنىڭ تاريحىن بۇقار جىراۋ سىندى ۇلىلارىمىزدىڭ شىعارماشىلىعى ارقىلى ساقتاپ, دامىتاتىنى ءسوزسىز.
قايرات ءابىلدا,
«ەگەمەن قازاقستان»
قاراعاندى وبلىسى,
بۇقار جىراۋ اۋدانى