سەمەي قالاسىندا قوعامدىق قاۋىپسىزدىكتى قامتاماسىز ەتىپ جۇرگەن ۇلتتىق ۇلان ساربازدارى دەر كەزىندە ارەكەت ەتىپ, جازاتايىم جاعدايدىڭ الدىن الدى. اشىق تەرەزە الدىندا قاراۋسىز قالعان ءبۇلدىرشىننىڭ ومىرىنە تونگەن قاۋىپتىڭ بەتى قايتارىلدى, دەپ جازادى Egemen.kz.
وقيعا ءىىم ۇلتتىق ۇلانىنىڭ 5511 اسكەري ءبولىمىنىڭ اسكەري قىزمەتشىلەرى كەزەكشىلىك اتقارىپ جۇرگەن ساتتە بولعان. اۋەزوۆ داڭعىلىن پاترۋلدەۋ بارىسىندا ولار كوپقاباتتى ءۇيدىڭ ءۇشىنشى قاباتىنداعى اشىق تەرەزە الدىندا تۇرعان كىشكەنتاي بالانى بايقايدى. ەرەسەكتەردىڭ قاراۋىنسىز قالعان بالا تەرەزە الدىندا ويناپ, سىرتقا ۇيالى تەلەفون مەن كىلتتەردى لاقتىرعان.
قاۋىپتى جاعدايدى بىردەن باعامداعان اسكەري جاساق باستىعى ەفرەيتور داۋلەت سەيدالى پاترۋلشىلەر – ەفرەيتور بەكسۇلتان تەمىربەكوۆ پەن قاتارداعى ءالي ساعىمباەۆپەن بىرگە جەدەل شەشىم قابىلدايدى. ولار بالا قۇلاپ كەتكەن جاعدايدا قاعىپ ۇلگەرۋ ءۇشىن تەرەزەنىڭ ءدال استىنا ورنالاسىپ, ساقتىق شارالارىن ۇيىمداستىردى.
«ارىپتەستەرىممەن بىرگە بالانى ۇستاپ الۋ ءۇشىن تەرەزە استىندا تۇردىق. ال مەن ۇيدە ەرەسەكتەر بار-جوعىن انىقتاۋ ءۇشىن ىشكە كىردىم. دەرەۋ پوليتسەيلەردى شاقىردىق. كوپ ۇزاماي بالانىڭ اكەسى دە كەلدى», دەيدى ەفرەيتور داۋلەت سەيدالى.
ۇلاندىقتاردىڭ قىراعىلىعى مەن جەدەل ارەكەتىنىڭ ارقاسىندا قايعىلى جاعدايدىڭ الدى الىندى. كەيىن بەلگىلى بولعانداي, بالا ۇيدە جالعىز قالعان.
«بۇل ءسوزدى بۇرىن ايتپاپپىن»: ۇلتتىق ۇلان ساربازدارى انالارىن مەرەكەمەن قۇتتىقتادى
ەرلىگى ءۇشىن داۋلەت سەيدالى, بەكسۇلتان تەمىربەكوۆ جانە ءالي ساعىمباەۆ اباي وبلىسى توتەنشە جاعدايلار دەپارتامەنتىنىڭ العىس حاتىمەن ماراپاتتالدى. سونىمەن قاتار, داۋلەت سەيدالىعا «قوعامدىق ءتارتىپتى ساقتاعانى ءۇشىن» توسبەلگىسى بەرىلدى. ال ەفرەيتور بەكسۇلتان تەمىربەكوۆ پەن قاتارداعى ءالي ساعىمباەۆقا اسكەري ءبولىم كومانديرىنىڭ شەشىمىمەن 10 تاۋلىككە قىسقا مەرزىمدى دەمالىس بەرىلىپ, قول ساعاتتار تابىستالدى.
بۇل جاعداي ۇلتتىق ۇلان اسكەري قىزمەتشىلەرىنىڭ توتەنشە مەزەتتەردە جەدەل ءارى كاسىبي ارەكەت ەتۋگە دايىن ەكەنىن تاعى ءبىر مارتە كورسەتتى.
ء«بىز ءار سەكۋندتىڭ ماڭىزدى ەكەنىن تۇسىندىك. ەڭ باستىسى – قايعىلى جاعدايعا جول بەرمەۋ بولدى. ەڭبەگىمىزدىڭ باعالانۋى – ۇلكەن مارتەبە», دەيدى ەفرەيتور بەكسۇلتان تەمىربەكوۆ.
ەندى ۇلتتىق ۇلان ساربازدارىنىڭ ەموتسيالىق جاعدايىن جاساندى ينتەللەكت باقىلايدى