بيىل كەرەكۋ وڭىرىندە 765 جازعى لاگەر اشىلدى. وبلىستىق ءبىلىم بەرۋ باسقارماسىنىڭ مالىمەتىنشە, مەكتەپ وقۋشىلارىنىڭ جازعى دەمالىسىن ۇيىمداستىرۋ ءۇشىن وبلىس بيۋدجەتىنەن 285,5 ميلليون تەڭگە ءبولىندى. بالالارعا ارنالعان 15 كۇندىك ساۋىقتىرۋ ورىندارى ءۇش اۋىسىم بويىنشا جۇمىس ىستەيدى. جازعى لاگەرلەرگە 1-10 سىنىپتاردا وقيتىن 97 مىڭنان استام وقۋشى, ال مەكتەپالدى لاگەرلەردە 43 مىڭنان استام وقۋشى دەمالۋدا.
بالالار لاگەرىندە وتكەن جاز جەتكىنشەكتەر مەن جاسوسپىرىمدەردىڭ ەسىندە قالاتىنى انىق. بيىلعى جازدىڭ جاقسى جاڭالىعى كوپ. ايتالىق, وبلىستىق «جاس داۋرەن» وقۋ-ساۋىقتىرۋ ورتالىعىندا «قازاق-camp» دەپ اتالاتىن ەرەكشە جوبا ۇيىمداستىرىلۋدا. ياعني جوعارى سىنىپ وقۋشىلارىن تىلدىك, تۋريستىك-ولكەتانۋ, ەتنومادەني, ينتەللەكتۋالدىق, سپورتتىق, ەكولوگيالىق, شىعارماشىلىق جانە مۋزىكالىق باعىتقا ارنالعان دەمالىس ورىندارى قارسى الدى. 370-تەن استام قامقورشىلارىمەن تۇراتىن جەتىم بالالار, اتا-اناسىنىڭ قامقورلىعىنسىز قالعان بالالار, سونداي-اق الەۋمەتتىك تۇرعىدان قورعالماعان وتباسىلاردىڭ بالالارى جاپپاي وقىتۋ قورى ەسەبىنەن دەمالىسپەن جانە ساۋىقتىرۋمەن قامتىلدى. ەلىمىزدىڭ كيەلى جەرلەرى بويىنشا تۋريستىك ەكسكۋرسيالار وتكىزۋ جوسپارلانعان بولاتىن.
وبلىستىق ءبىلىم باسقارماسىنىڭ باسشىسى ءدىنيسلام بولاتحاننىڭ ايتۋىنشا, «قازاق-camp» جوباسى بويىنشا بالالار جازعى دەمالىس كەزىندە حالقىمىزدىڭ مادەنيەتى مەن ءتىلىن, ونەرى مەن سالت-ءداستۇرىن, تۇرمىسىن زەردەلەپ, تانىمدىق وي-سانالارىن كەڭەيتەدى. ۇيىرمەلەر مەن شەبەرلىك ساعاتتارى وقۋشىلاردى ۇلتتىق قولدانبالى ونەر, كيىز ءۇي قۇرۋ, اشەكەيلەر مەن كادەسىيلار جاساۋ, ءجۇن ءتۇتۋ, قۇراق تىگۋ, ءجىپ ءيىرۋ, كەستە توقۋ جانە ۇلتتىق سپورت تۇرلەرىنە باۋليدى. ال دەمالىس اۋماعىندا كيىز ۇيلەر تىگىلىپ, التىباقاندار ورناتىلماق. ەڭ باستىسى, بالالار كيەلى جەرلەرگە جاياۋ ساياحاتتايدى. مىسالى, مامىر ايىندا وڭىردەگى بالالار ۇيلەرىنىڭ تاربيەلەنۋشىلەرى كونە قالالار وتىرار مەن تۇركىستانعا, ەل جۇرەگى استاناعا جانە باياناۋىل وڭىرىندە بولدى. جازعى دەمالىس ورىندارىنىڭ بالالاردى قابىلداۋعا دايىندىعىن وڭىردەگى توتەنشە جاعدايلار دەپارتامەنتى جانە قوعامدىق دەنساۋلىق ساقتاۋ باسقارماسىنىڭ ماماندارى تەكسەردى.
بۇل كۇندەرى وبلىس ورتالىعىنداعى وقۋشىلار سارايىندا «حوگۆارتستەگى كانيكۋلدار» اتتى جازعى لاگەر اشىلدى. لاگەر باعدارلاماسىندا «شىعارماشىلىق times» كرەاتيۆتى, «بiلiم land» پايدالى بىلىمدەر جانە «اقپارات.FM» بلوگى فاكۋلتەتتەرى جۇمىس ىستەيدى. وڭىردەگى ەكولوگيا جىلى شەڭبەرىندە «جاسىل جەلەك» جوباسى دا باستالدى. مىندەت – ءار مەكتەپ اۋلاسىن گۇلدەنگەن باققا اينالدىرۋ. ال ەكىباستۇزداعى دوستىق ءۇيى «ەكىباستۇز» بالالار قورىمەن بىرلەسىپ, «شىركىن, life!» جوباسىن, «تۋعان ولكە ساياسىندا» ەتنوساياحاتىن ۇيىمداستىرۋدى قولعا الدى. قالالار مەن اۋىلداردى اباتتاندىرۋ جاساقتارىنا جوعارى سىنىپتىڭ 5349 وقۋشىسى قاتىسپاق.
سونىمەن بىرگە ەكولوگيالىق مادەنيەتكە تاربيەلەۋ ماقساتىندا وقۋشىلار مەكتەپ ورمانشىلىعىندا كوشەتتەردى كۇتۋمەن اينالىسىپ, تابيعاتتى قورعاۋ شارالارىنىڭ بەل ورتاسىندا بولدى. وقۋشىلار جازعى بوس ۋاقىتتارىندا ەلىمىزدىڭ ەڭبەك قاتىناستارى زاڭناماسىنا سايكەس, كاسىپورىندار مەن شارۋا قوجالىقتارىندا ۋاقىتشا جۇمىس ىستەيدى. بۇل بالالاردىڭ ەڭبەككە, كاسىپكە دەگەن قىزىعۋشىلىعىن وياتادى. تاعى ءبىر ماڭىزدى ماسەلە, كەي اتا-انالاردىڭ بالالارىن لاگەرگە جىبەرۋ مۇمكىندىگى جوق. سول سەبەپتى «مەكتەبىمە تاعزىم» شاراسىنىڭ جالعاسى رەتىندە «بالاعا لاگەرگە جولداما سىيلاڭىز!» شاراسى ءوتتى. بۇل كاسىپكەرلەردى وتباسىندا مۇمكىندىگى جوق بالالارعا جازعى دەمالىس سىيلاۋعا شاقىرادى. تاياۋدا پاۆلودارلىق وقۋشىلار بۋراباي دەمالىس ايماعىنداعى «Burabay Summer Fest» حالىقارالىق بالالار مەن جاسوسپىرىمدەر تەلەۆيزيالىق فەستيۆالىنە اتتاندى. جاس ونەرپازدار قاتارىندا 11 جەكە ورىنداۋشى جانە بي ءانسامبلى بار.
فاريدا بىقاي,
«ەگەمەن قازاقستان»