وسى ۋاقىتقا دەيىن جامبىل وبلىستىق مادەنيەت, ارحيۆتەر جانە قۇجاتتاما باسقارماسىنا قاراستى وبلىستىق فيلارمونياعا ايگىلى اقىن, كورنەكتى كومپوزيتور كەنەن ازىرباەۆتىڭ ەسىمىن بەرۋ كەرەكتىگى تۋرالى تالاي رەت ماسەلە كوتەرىلگەن ەدى.
جۋىردا جامبىلدىقتار جان جادىراتار جاڭالىقتىڭ كۋاسى بولدى. قازاقستان رەسپۋبليكاسى ۇكىمەتىنىڭ 2018 جىلعى 9 تامىزداعى №485 قاۋلىسىمەن جامبىل وبلىستىق فيلارمونياسىنا كەنەن ازىرباەۆتىڭ ەسىمى بەرىلدى. سونىمەن قاتار, تاراز قالالىق مادەنيەت جانە تىلدەردى دامىتۋ بولىمىنە قاراستى «قالالىق مادەنيەت ءۇيى» مەملەكەتتىك كوممۋنالدىق قازىنالىق كاسىپورنى ىقىلاس دۇكەن ۇلى جانە تاراز قالالىق ءبىلىم بولىمىنە قاراستى №10 ورتا مەكتەپ ساعادات نۇرماعامبەتوۆ ەسىمدەرىن يەلەندى.
ەسىمدەرى مەكەمەلەرگە بەرىلگەن ءۇش تۇلعانىڭ دا قازاق تاريحىنداعى ورىنى ايرىقشا. كەنەن ازىرباەۆ ەكى مارتە لەنين, ەڭبەك قىزىل تۋ وردەندەرىمەن ماراپاتتالعان كورنەكتى اقىن, كومپوزيتور رەتىندە بەلگىلى بولسا, ىقىلاس دۇكەن ۇلى قازاق كۇي ونەرىنىڭ قۇدىرەتىن تانىتقان تۇلعا. ال ساعادات نۇرماعامبەتوۆ ەلىمىزدىڭ العاشقى قورعانىس ءمينيسترى بولىپ, مەملەكەتتىك دەڭگەيدە قىزمەت اتقارعان ازامات.
بۇگىنگى تاڭدا جامبىل وبلىستىق قازاق دراما تەاترىنا اتاۋ بەرۋ ماسەلەسى ءجيى كوتەرىلەدى. كەزىندە اتالعان تەاترعا قازاقتىڭ تۇڭعىش كاسىبي رەجيسسەرى اسقار توقپانوۆتىڭ ەسىمىن بەرۋ كەرەكتىگى دە ايتىلعان. الايدا تالاي جىلدان بەرى بۇل ماسەلە شەشىمىن تاپپاي كەلەدى. ەندىگى جەردە جامبىل تەاترىنا دا لايىقتى اتاۋ بەرىلەدى دەگەن ءۇمىت بار.
حاميت ەسامان,
«ەگەمەن قازاقستان»
جامبىل وبلىسى