دزيۋدوشى قىزدار ءۇش جۇلدە الۋدى كوزدەۋدە

ەستەرىڭىزگە سالا كەتەيىك, ازيادا باعدارلاماسىنداعى دزيۋدوشىلار سايىسى 29 تامىز بەن 1 قىركۇيەك ارالىعىندا وتەدى دەپ جوسپارلانعان. ايەلدەر اراسىنداعى باسەكەدە قازاقستاننىڭ تۋى استىندا وتگونتسەتسەگ گالبادراح (48 كيلو), كامشات قاراسايقىزى (52 كيلو), سەۆارا نىشانباەۆا (57 كيلو), يولانتا بەردىبەكوۆا (63 كيلو), زەرە بەكتاسقىزى (70 كيلو), زارينا رايفوۆا (78 كيلو) جانە گۇلجان يسانوۆا (+78 كيلو) ونەر كورسەتەدى. ءبىزدىڭ دزيۋدوشىلار جاكارتاعا 25 تامىزدا اتتانادى.

باس باپكەردىڭ پايىمداۋىنشا, التىن مەدالدى وتگونتسەتسەگ گالبادراح يەلەنۋگە ءتيىس. ءيا, اسا جەڭىل سالماقتا بەلدەسەتىن ايگىلى بالۋان وتاندىق دزيۋدوشىلار اراسىندا كوشباسشى ەكەنى داۋسىز. وسىدان ءۇش جىل بۇرىن قازاقستاننىڭ ازاماتتىعىن العان موڭعول قىزى سول كەزدەن بەرى تولاعاي تابىسىمەن ءوز جانكۇيەرلەرىن قۋانتۋدا. 2015-2018 جىلدار ارالىعىندا ول جيىرمادان اسا جاۋاپتى جارىستاردا جۇلدە الدى. سولاردىڭ اراسىندا 2016 جىلعى ريو وليمپياداسى مەن 2017 جىلعى بۋداپەشتەگى الەم چەمپيوناتىنىڭ قولا مەدالدارى بار.  سونىمەن قاتار, گالبادراح ازيا بىرىنشىلىگىندە التىن مەن كۇمىس جانە دۇنيەجۇزىلىك ۋنيۆەرسيادادا قولا مەدالدى ەنشىلەدى. قازىرگى كەزدە ول الەمدىك رەيتينگتە 7 ورىندى يەمدەنۋدە.

دەسەك تە وتگونتسەتسەگكە ازيا ويىندارىن ۇتۋ وڭاي بولادى دەپ ويلاساڭىزدار  قاتەلەسەسىزدەر. سەبەبى, 48 كيلو سالماقتىڭ الەمدىك رەيتينگىندە سارى قۇرلىقتىڭ ءۇش بىردەي وكىلى قازاقستاندىق بالۋاننان جوعارى تۇر. ولار – موڭعوليالىق ۇرانتسەتسەگ مۇڭحبات پەن جاپونيانىڭ قوس جۇلدىزى – فۋنا توناكي مەن امي كوندو. العاشقى ەكەۋى ۇزدىكتەر تىزىمىندەگى ءبىرىنشى جانە ەكىنشى ورىنداردى ءوزارا بولىسسە, ءۇشىنشىسى 7 ساتىعا جايعاستى. جانە دە ولاردىڭ جەڭىپ العان جۇلدەلەرى دە جەتەرلىك. تارقاتىپ ايتساق, ۇرانتسەتسەگ مۇڭحبات – 2013 جىلعى الەم چەمپيونى جانە 2014 جىلعى الەمنىڭ ۆيتسە-چەمپيونى. 2014 جىلعى ازيا ويىندارىنىڭ جەڭىمپازى. قۇرلىق بىرىنشىلىگىندە ءۇش رەت (2009 جىل – قولا, 2012 جىل – التىن, 2013 جىل – قولا) جانە دۇنيەجۇزىلىك ۋنيۆەرسيادادا ەكى رەت (2009 جىل – كۇمىس, 2015 جىل – قولا) جەڭىس تۇعىرىنا كوتەرىلدى.

جاپونيانىڭ قوس ارۋى جايىندا ايتار بولساق, امي كوندو ريو وليمپياداسىنىڭ قولا جۇلدەگەرى. الەم چەمپيوناتىندا ول ەكى مارتە جەڭىس تۇعىرىنان قول بۇلعادى. 2014 جىلى چەليابىدە الدىنا جان سالماسا, 2015 جىلى استانادا ءۇشىنشى ورىنعا تابان تىرەدى. ال فۋنا توناكي بىلتىرعى جىلعى الەم چەمپيونى. 

قازاقستان قۇراماسىنىڭ باس باپكەرىنىڭ وسى جارىستا جوسپارلاپ وتىرعان قوس قولاسىنىڭ ءبىرىن اسا اۋىر سالماقتاعى گۇلجان يسانوۆا الۋعا ءتيىس. 34 جاستاعى قازاق بالۋانى بۇعان دەيىن 2006 جانە 2010 جىلدارى الاۋى تۇتانعان ازيا ويىندارىندا ءۇشىنشى ورىنداردى ولجالاعان بولاتىن. ودان بولەك, ازيا چەمپيوناتتارىندا 1 التىن, 2 كۇمىس جانە 5 قولا مەدالدى قورجىنعا سالدى. قازىرگى كەزدە گۇلجان الەمدىك رەيتينگتىڭ +78 كيلو سالماق دارەجەسىندە 26 ورىندا تۇر.

ال قالعان قىزدارىمىز دۇنيەجۇزىلىك رەيتينگتە مىنا ساتىلارعا جايعاستى:  كامشات قاراسايقىزى – 179 ورىن, سەۆارا نىشانباەۆا – 21 ورىن, يولانتا بەردىبەكوۆا – 170 ورىن, زەرە بەكتاسقىزى – 48 ورىن  جانە زارينا رايفوۆا – 33 ورىن.

عالىم سۇلەيمەن,

«ەگەمەن قازاقستان»