تاياۋدا بۇقار جىراۋ اۋدانىنىڭ اكىمدىگى جانە قازاقستان حالقى اسسامبلەياسى وبلىستىق فيليالى مەن «قوعامدىق كەلىسىم» مەكەمەسىنىڭ ۇيىمداستىرۋىمەن كومەكەي اۋليە – بۇقار جىراۋ قالقامان ۇلىنىڭ 350 جىلدىعىنا ارنالعان ساندىك-قولدانبالى جانە بەينەلەۋ ونەرىنىڭ وبلىستىق كورمە-بايقاۋى ءوتتى.
قاراعاندىداعى «دوستىق ۇيىندە» تۇساۋى كەسىلگەن ونەر جارىسىندا 23 سۋرەتشى مەن ءمۇسىنشىنىڭ 47 جۇمىسى باسەكەگە ءتۇستى. اۆتورلاردىڭ ءبارى دە ءوز تۋىندىلارىندا بۇقار جىراۋدىڭ زامانىندا ۇلتتىڭ ءسوزىن ايتقان ءور تۇلعا رەتىندەگى وبرازىن جان-جاقتى اشىپ كورسەتۋگە ۇمتىلعان. بايقاۋدا باق سىناعان جاس سۋرەتشىلەر مەن مۇسىنشىلەرگە ەسىمى ەلگە تانىلعان ءمادىحان قالماحانوۆ, قانىش بالابەكوۆ, ەۆگەني شۋلتس, داۋلەت ءىزباسار ۇلى, ماناتبەك امانباەۆ, يۋري كۋ سىندى شەبەرلەرمەن باسەكەگە ءتۇسۋ وڭاي بولمادى. دەگەنمەن ولار ءۇشىن بۇل بايقاۋدىڭ زور تاجىريبە مەكتەبى بولعانى انىق.
– بۇقار جىراۋ – ءار قازاقتىڭ ماقتانىشى. بايقاۋعا ۇسىنىلعان جۇمىستاردىڭ بارلىعى دا جوعارى دەڭگەيدە ورىندالعان. سوندىقتان جەڭىمپازدى انىقتاۋ بىزگە وڭايعا تۇسپەدى, – دەپ اتاپ ءوتتى قازىلار القاسىنىڭ توراعاسى, قازاقستاننىڭ ەڭبەك سىڭىرگەن ونەر قايراتكەرى بەيبىت مۇستافين.
كورمە-بايقاۋدىڭ قورىتىندىسى بويىنشا باس جۇلدە «بۇقار جىراۋ» دەپ اتالعان لينوگراۆيۋراسى ءۇشىن بەلگىلى سۋرەتشى ماناتبەك امانباەۆقا بۇيىردى. گرافيكا ونەرىنىڭ حاس شەبەرى بۇل سىنعا سەگىز تۋىندىدان تۇراتىن سەريالىق جۇمىسىن ۇسىنعان ەكەن. «مەن ابىلاي حان مەن بوگەنباي باتىردىڭ ەرلىك ىستەرىن جىرلاعان بۇقار جىراۋدى ءوز زامانىنىڭ ۇلى جارشىسى رەتىندە كورسەتۋگە تىرىستىم», – دەدى ماراپاتتاۋ كەزىندە جەڭىمپاز.
«كوركەم سۋرەت» اتالىمى بويىنشا ءبىرىنشى ورىن ءمادىحان قالماحانوۆقا بەرىلسە, ء«مۇسىن» اتالامىندا امانتاي اكىشەۆتىڭ جۇمىسى ۇزدىك بولىپ تانىلدى. سونىمەن قاتار «ساندىك-قولدانبالى ونەر» سىنى بويىنشا ەۆگەني شۋلتس وزىپ شىقسا, ناتاليا جيلكينا «گرافيكا» نوميناتسياسىندا جەڭىمپاز اتاندى.
«رۋحاني جاڭعىرۋ» باعدارلاماسى اياسىندا ۇيىمداستىرىلعان بۇل كورمەنى كەلۋشىلەر 15 تامىزعا دەيىن تاماشالاي الادى.
قايرات ءابىلدا,
«ەگەمەن قازاقستان»