Euronews NBC تەلەارناسى قازاقستان ءتۋريزمى تۋرالى سيۋجەتتەر ءتۇسىرۋدى باستادى

قىزىقتى ساياحاتتار, شىم-شى­تى­رىق وقيعالار, ادرەنالين مەن تاماشا كوڭىل كۇيدىڭ جالاۋى بو­لىپ تابىلاتىن «Adventure» قازاق­ستان تۋرالى 4 ەپيزودتى قالىڭ كورەر­مەنىنە ۇسىنۋدى جوسپارلاپ وتىر.

قۇرامىندا Marta Brambilla Pisoni, Thierry Winn مەن Dmitry Lee سىندى تاجىريبەلى جۋرناليستەر بار كوماندا قازىردىڭ وزىندە بۋراباي كۋرورتتىق ايماعىندا قازاقتىڭ الميساقتان كەلە جاتقان اڭشىلىق كاسىبى تۋرالى كادر­لاردى ءتۇسىرىپ ۇلگەردى. جەرگىلىكتى بۇركىتشىلەر ساياتشىلىق ونەرىمىزدى كۇللى الەمگە ناسيحاتتاعالى وتىرعان شەتەلدىك ارىپتەستەرىمىزگە اڭعا قۇس سالۋدىڭ ءتۇرلى ادىستەرىن كورسەتىپ, تابيعاتىنان تاكاپپار قۇستى قولعا ۇيرەتۋدىڭ قىر-سىرىمەن ءبولىستى.

قازىرگى كۇندەرى بۇل كوماندا الا­تاۋدىڭ بوكتەرىندە بىلەك سىبانىپ, ءتۇسىرۋ جۇمىس­تارىن جالعاستىرۋدا. مۇندا حالىق­ارالىق تەلەارنا وكىلدەرى بەلسەندى ءتۋريزمنىڭ مۇمكىندىكتەرى, ياعني حايكينگ, ماۋنتاين بايك پەن داۋنحيلل تۋرالى بارىنشا قامتىلعان ەپيزودتاردى جينايدى.

Euronews NBC تەلەارناسى جۋر­ناليستەرىنىڭ ايتۋىنشا, ءتۇسىرىلىم بارىسىندا تاماشا تابيعي لاندشافتتار, اسپانمەن تالاسقان ىلە الاتاۋىنىڭ بوكتەرى, الماتى وبلىسىنىڭ عاجايىپ جەرلەرى ولاردىڭ تاماشا سيۋجەتتەردى وڭاي تابۋىنا, تابىستى جۇمىس ىستەۋىنە سەپتەسىپ وتىر.

«قازاقستان مەنى وتە ۇلكەن اسەرگە بولەدى. ادەمى تابيعات, مەيىرىمدى دە قامقور ادامدار ءبىزدى قورشاپ تۇر. دەمالىستىڭ ءتۇر-ءتۇرىن جاقسى كورەتىن تۋريستەر ءۇشىن تاپتىرماي­تىن جەر. قىس­قاسى, بۇل ەلدە نەمەن اينالىسامىن دەسەڭ دە ءبارى تابىلادى. ءبىز الما­تىداعى ءتۇسىرۋ جۇمىستارىن اياقتا­عاننان كەيىن اقتاۋ قالاسىنا اتتانامىز. ول جاقتا دجيپ-تۋرلار­دى تۇسىرەمىز. تەزىرەك جەتسەك ەكەن دەپ, تاعاتسىزدانىپ ءجۇر­مىز», دەيدى Euronews NBC تەلەار­ناسىنىڭ ءتىلشىسى Marta Pisoni. 

قىسقاسى, الداعى كۇندەرى «Ad­venture» باعدارلاماسىنىڭ جۋر­نا­ليستەرى ماڭعىستاۋ وبلىسىنا اتتانا­دى. اتالمىش باعدارلامانىڭ قورى­تىندى سيۋجەتى تاۋ شاڭعىسى ءتۋريزمى تۋرالى بولماق. بۇل ءۇشىن حالىقارالىق ارنانىڭ ءتۇسىرۋ توبى الماتىعا جەلتوقسان ايىندا قايتا ورالادى. 

ايناش ەسالي,

«ەگەمەن قازاقستان»

الماتى