جاستار اراسىندا ينجەنەرلىك ماماندىقتاردى ناسيحاتتاۋ, ەلىمىزدە روبوتتىق تەحنيكانى دامىتۋدى ىنتالاندىرۋ جايىن ماقسات ەتكەن شارا 7 تامىزدا باستالىپ, قىركۇيەكتىڭ 26-سىنا دەيىن جالعاسادى.
ەلورداداعى ەكسپو قالاشىعىنا قاشان بارساق تا قىزىعى ەش تاۋسىلعان ەمەس. ورتالىقتاعى تاڭدايقاقتىرار تاڭعاجايىپ تۋىندىلارعا تالاي تامسانىپ, يننوۆاتسيانىڭ يگىلىگىنە سان مارتە ءسۇيسىنىپ قايتقانبىز. بۇل جولى دا ەكسپو قالاشىعىندا تاعى ءبىر كەرەمەت ءىس-شارانىڭ باستالعانىن سۇيىنشىلەۋگە اسىقپىز. بۇل – «نۇر الەم» سفەراسىندا ءوتىپ جاتقان «روبوتتار بالى».
كەلۋشىلەرگە اركەز جاڭاشىلدىقتى جارشىلاپ, زاماناۋي دۇنيەلەرگە كوزايىم ەتۋگە بەيىم ورتالىق اتالعان ايرىقشا بالدىڭ باستالۋىنا وراي بۇقارالىق اقپارات وكىلدەرىن شاقىرىپ, ءباسپاسوز تۋرىن وتكىزدى.
«روبوتتار بالى» روبوشوۋى – امەريكا, ەۋروپا, وڭتۇستىك كورەيا جانە جاپونيا روبوت-تەحنيكاسىنىڭ سوڭعى جەتىستىكتەرىن جانە زاماناۋي روبوتتار سلەتىن ۇسىنادى. جاس ۇرپاقتىڭ ينتەللەكتۋالدى الەۋەتىن دامىتۋ, جاستار اراسىندا ينجەنەرلىك ماماندىقتاردى ناسيحاتتاۋ, ەلىمىزدە روبوتتىق تەحنيكانى دامىتۋدى ىنتالاندىرۋ جايىن ماقسات ەتكەن شارا 7 تامىزدا باستالىپ, قىركۇيەكتىڭ 26-سىنا دەيىن جالعاسپاق. كەلۋشىلەر نازارىن اۋدارىپ, سالاعا قىزىعۋشىلىق وياتۋدى كوزدەگەن ۇيىمداستىرۋشىلار بالعا قاتىسۋشى روبوتتاردىڭ «جەتىستىگىن» مەيلىنشە اشۋعا تىرىسقان. ماسەلەن, قويىلىمنىڭ باستى حەدلاينەرى اعىلشىندىق روبوت – گۋمانويد تەسپيان «سەگىز قىرلى, ءبىر سىرلى», «بەساسپاپ» ەكەندىگىن تانىتتى. ول سويلەيدى, ىمداردى كوشىرەدى, ءان ايتادى, ءتىپتى بي بيلەپ, كۇلەدى, جىلايدى. كەرەك دەسەڭىز, شەكسپيردىڭ شىعارمالارىن دا وقىپ بەرەتىنى ايتىلدى. سونىڭ ارقاسىندا زاماناۋي تەاتر قويىلىمدارىندا بىرنەشە رەت ويناعان دا ەكەن. جالپى, بالعا قاتىسۋشى روبوتتار قاتارى از ەمەس, ولاردىڭ ءاربىرىنىڭ ەرەكشەلىگى, جاسالۋ تاريحى, مازمۇنى ارقيلى. باستىسى, ەلىمىزگە كەلگەن ەرەكشە روبوتتار استانامىزدا ءالى ءبىراز ۋاقىت ايالدايدى. ال ءار روبوتپەن جەكەلەي تانىسامىز دەۋشىلەرگە ەكسپو كەشەنىنىڭ ەسىگى ءاردايىم اشىق. ءيا, «جاقسىنى كورمەككە» دەگەن...
دينارا بىتىك, «ەگەمەن قازاقستان»