«اعاتاي» باسپاسىنان ومىرزاق قاجىمعاليەۆتىڭ ءۇش روماننان تۇراتىن «جاڭعىرىق» تريلوگياسى جارىق كوردى. ءار كىتابىنا ءوز كەزەڭىنىڭ كەلبەتىن ءسوز ورنەگىمەن كەستەلەي بىلگەن قالامگەردىڭ بايتاق ەلىمىزدىڭ سوناۋ تۇكپىرىندە جاتىپ, قوعامدىق سانانىڭ قوزعالىسىنا بەلسەندى ارالاسۋى – ونىڭ سەرگەك بولمىسىن اڭعارتسا كەرەك.
ء«ار ولكەنىڭ ويى ورامدى, ءسوزى ساليقالى, كوكىرەگى كۇمبىر, پەيىلى ءسۇمبىل قازىنا قارتتارى بولادى. مەنىڭ ۇعىمىمدا قۇرمانعازى اۋدانىنداعى ومىرزاق قاجىمعاليەۆ – وسىنداي تۇلعا. كورگەنى مول, تۇيگەنى ودان دا تەرەڭ اعانىڭ سەرگەك ساناسى, نە نارسەگە دە جەدەل ءۇن قوسقىشتىعى كۇنى بۇگىن دە ونىڭ بايىپتى دا, سارابدال كەلبەتىن ودان ءارى وركەشتەندىرە تۇسەدى» دەپ جازادى قالامداسى يساتاي بالماعامبەتوۆ. ۇزاق جىلدار بويى مال دارىگەرى قىزمەتىن اتقارىپ, اۋداندىق اتقارۋ كوميتەتىنىڭ توراعاسى, اگرو-ونەركاسىپتىك كەشەننىڭ ديرەكتورى, اسىل تۇقىمدى ەدىلباي قويىن وسىرەتىن «ماقاش» وندىرىستىك كووپەراتيۆىنىڭ باسشىسى قىزمەتىن اتقارا ءجۇرىپ, قولىنان قالام تۇسپەگەن ومىرزاق قاجىمعاليەۆ «بيىكتەرگە بەتالىس», «جولدار, جىلدار», «نارىننىڭ نار ۇلدارى», ء«مۇسليمات», «داريعا – داۋرەن», «جانكەشۋ», «ماقاشپەن قاۋىشۋ», «قيال…ۇمىت…», «قىران قيادا», «سامعاۋ», «جاڭعىرىق» كىتاپتارىن جازدى. ءوز كاسىبىمەن قوسا, قوعامدىق جۇمىستاردان دا سىرت قالماي, ۇنەمى رۋحانيات شارۋاسىنا بەل شەشە كىرىسىپ كەتەتىن قالامگەردىڭ جازۋشىلىق جولىن جانكەشتىلىك دەپ اتاسا دا بولادى.
سوعىس كەزىندەگى قازاقتىڭ ءار اۋىلىندا كەزدەسكەن زۇلمات كەسەلىن ءوز تىلىندە سۋرەتتەپ جازىپ, انا بەينەسىن جارقىراتا كورسەتكەن «جانكەشۋ» رومانى ءبىر اۋىلدىڭ, يا اۋلەتتىڭ باسىنان كەشكەن زوبالاڭى ەمەس, ۇلت تاعدىرىنا جازىلعان قاسىرەتتى پاراقتار ەدى. ەل ىشىندەگى ءارتۇرلى پيعىلدى ادامداردىڭ بەينەسىن جاساپ, سونىڭ اراسىندا انا كەلبەتىن كەلىستى كەستەلەگەن قالامگەر زامان تىنىسىن جەتكىزە الىپتى. «ادەبيەتىمىزدەگى انالار بەينەسى تاعى ءبىر كۇرەسكەر, قايراتكەر, مەيىربان, اقىلمان انامەن تولىقتى دەپ ايتۋعا بولادى» دەپتى وسى رومانعا جازعان العى سوزىندە جازۋشى بەرىك شاحانوۆ.
«داريعا-داۋرەن» رومان-ەسسەسىندە شالقار مەن سامالدىڭ اراسىنداعى عاشىقتىق سەزىمدى سۋرەتتەگەن, ادال ماحاببات, ىڭكار جۇرەكتىڭ بوياماسىز, قازاقى قالىبىن جاساعان. اسىل ماحابباتىڭ ايشىقتى ەسكەرتكىشىندەي شىعارمانىڭ العى ءسوزىن شەبەر جازۋشى مارقۇم راقىمجان وتارباەۆ جازىپتى.
تريلوگيانىڭ ءتۇيىنى – «كەمەل» رومانى ارقىلى قالامگەر ءومىر جولىن بارىنشا بايىپتاپ, ساراپتاپ, ەڭ كورنەكتى تۇستارىن اق قاعازعا ءتۇسىرىپتى. ومىردە كورگەن-باققاننىڭ ءبارى التىن ەمەس. بىراق ءبىر قاراعاندا ۇزاق, ءبىر ويلانعاندا قىسقا كورىنەر عۇمىردىڭ ماعىنالى, مايەكتى شاعى دا از بولمايدى. سونى زەردەلەپ, اسىل سوزبەن كەستەلەۋ دە – جازۋشىلىق بولسا كەرەك. ەرتەڭگى ۇرپاققا ونەگە ورنىنا جازىلعان «كەمەل» رومانىن اقىن عالىم جايلىباي: «قازاقتىڭ كەمەلىنە كەلگەن, ەلىم دەگەن ازاماتتارى تۋرالى ونەگە بەرەتىن ۇلكەن تۋىندى» دەپ باعالاپتى.
ەندەشە وقىرمان قاۋىمعا, قالامگەرگە قۇتتى بولسىن دەيمىز.
باعاشار تۇرسىنباي ۇلى,
«ەگەمەن قازاقستان»