استانادا مادەنيەت جانە سپورت مينيسترلىگىنىڭ قولداۋىمەن تۇركى كەڭەسى حاتشىلىعى, «Kazakh Tourism» ۇلتتىق كومپانياسى مەن سىرتقى ىستەر مينيسترلىگىنىڭ ۇيىتقى بولۋىمەن تۇركى كەڭەسىنە مۇشە مەملەكەتتەردىڭ تۋريزم جونىندەگى مينيسترلەرىنىڭ ءتورتىنشى كەزدەسۋى ءوتتى.
كەزدەسۋگە تۇركى كەڭەسىنە مۇشە مەملەكەتتەردىڭ تۋريزم سالاسىنىڭ باسشىلارى, قازاقستان, تۇركيا, قىرعىز رەسپۋبليكاسى, ازەربايجان جانە تۇركى كەڭەسى حاتشىلىعىنىڭ بىرقاتار وكىلدەرى قاتىستى. سونىمەن قاتار, القالى جيىنعا وزبەكستان مەن تۇركىمەنستاننىڭ مەملەكەتتىك تۋريستىك كوميتەتتەرىنىڭ توراعالارى جانە قىتاي حالىق رەسپۋبليكاسىنىڭ ەلىمىزدەگى توتەنشە جانە وكىلەتتى ەلشىسى قۇرمەتتى قوناق رەتىندە شاقىرىلعان.
تۋريستىك فورۋمدى مادەنيەت جانە سپورت ءمينيسترى ارىستانبەك مۇحامەدي ۇلى قۇتتىقتاۋ سوزبەن اشىپ, ۇلى جىبەك جولى ەلدەرىنىڭ ورتاق تۋريستىك ۆيزاسىن ازىرلەۋ تۋرالى ۇسىنىسىن ءبىلدىردى. «قازاقستان – ىقىلىم زاماننان بەرى ۇلى جىبەك جولىنىڭ اجىراماس بولىگى. 2015 جىلى بودرۋمدا وتكەن سامميت بارىسىندا تۇركى كەڭەسى مەملەكەتتەرىنىڭ باسشىلارى قازاقستاندى «قازىرگى زامانعى جىبەك جولى» تۇركى كەڭەسىنە تۋريستىك ونىمدەردى دايارلاۋ بويىنشا ۇيلەستىرۋشى دەپ تانىعان-دى. وسى ورايدا, ءبىز شەتەلدىك تۋريستەر ءۇشىن تۇرىك كەڭەسى بەكىتكەن جىبەك بولى تۋريستىك باعدارى بويىنشا « ۇلى جىبەك جولى» ۆيزاسىن ۇسىنا الامىز. تۋريستىك ماقساتتاعى « ۇلى جىبەك جولى» ۆيزاسى ەۋروپا ەلدەرىنە ورتاق «شەنگەن» ۆيزاسىنىڭ بالاماسى بولار ەدى», دەدى مينيستر.
ءمينيستردىڭ ايتۋىنشا, بۇگىنگى تاڭدا قىتاي مەن ءۇندىستان ازاماتتارىنىڭ قازاقستانعا 72 ساعاتقا دەيىن ۆيزاسىز كىرۋىنە رۇقسات ەتىلگەن. «بۇگىندە 61 مەملەكەتتىڭ ازاماتتارى قازاقستاندىق ۆيزانى الۋدان بوساتىلدى. ودان بولەك, 48 ەلدىڭ ازاماتتارىنا تۋريستىك ۆيزا بەرەردە شاقىرۋدى راسىمدەۋ تالاپ ەتىلمەيدى. قىتاي ازاماتتارىنا توپتىق تۋريستىك ۆيزالار بەرۋ قولعا الىندى. ءدال وسىنداي كەلىسىم يران مەملەكەتىمەن جۇرگىزىلىپ جاتىر. استانا مەن الماتى اۋەجايلارىندا قىتاي مەن ءۇندىستان ازاماتتارىنا 72 ساعاتتىق ترانزيتتىك ۆيزا بەرىلەدى», دەپ اتاپ ءوتتى ا.مۇحامەدي ۇلى.
سونىمەن قاتار تاراپتار «تۇركى كەڭەسى – زامانالى جىبەك جولى» بىرلەسكەن تۋريستىك جوباسىنىڭ ۆەب-سايتىن دامىتۋ, باعالاۋ ساياساتى, ماركەتينگتىك جانە كوممۋنيكاتسيالىق ستراتەگياسىن جان-جاقتى تالقىلاپ, ءوز ويلارى مەن ۇسىنىستارىن ءبىلدىردى. سونداي-اق كۇن تارتىبىندە تۇرعان بىرنەشە ماسەلەلەردى دە نازاردان تىس قالدىرمادى.
ايتا كەتەيىك, 2018 جىلدىڭ 2-8 قىركۇيەك ارالىعىندا قىرعىز رەسپۋبليكاسىنىڭ شولپاناتا قالاسىندا وتەتىن ءۇشىنشى دۇنيەجۇزىلىك كوشپەندىلەر ويىنى اياسىندا تۇركىتىلدەس مەملەكەتتەر باسشىلارىنىڭ كەزەكتى ءسامميتى بولادى. بۇل جيىندا تاراپتار استانادا وتكەن باسقوسۋدا ۇسىنىلعان جوبالاردى مۇقيات زەرتتەپ-زەردەلەپ, ناقتى شەشىم قابىلدايتىن بولادى.
ءالي بيتورە,
«ەگەمەن قازاقستان»