جاڭاشىل ويلار – جاھان نازارىندا

40 جاسقا دەيىنگى 100 جاس عالىم قاتىسقان حالىقارالىق جوبا قازاقستاننىڭ جانە تمد ەلدەرىنىڭ ءوزارا ءىس-قيمىلىن بىرنەشە باعىتتا زەرتتەۋدى ۇيعارادى. تۋريزم, اۋىل شارۋاشىلىعى, عىلىم, مادەنيەت, سونداي-اق فيزيكا جانە عىلىمدى قاجەت ەتەتىن تەحنولوگيالار سالاسىنداعى ىنتىماقتاستىقتى دامىتۋ ماقساتىندا قولعا الىنعان فورۋمعا قازاقستاننىڭ, رەسەيدىڭ, ليتۆانىڭ, بەلارۋستىڭ, ارمەنيانىڭ, ءازىربايجاننىڭ, وزبەكستاننىڭ, قىرعىزستاننىڭ, تاجىكستاننىڭ فيزيكتەرى, ساياساتتانۋشىلارى جانە ەكونوميستەرى قاتىستى.

جيىندى ەلباسى قورىنىڭ اتقارۋشى ديرەكتورى قانات جۇماباەۆ اشىپ, بيىلعى فورۋمنىڭ ءبىرشاما جاڭا ساپالى دەڭگەيدە وتەتىندىگىن اتاپ كەتتى. «بىرىنشىدەن, قاتىسۋشىلار گەوگرافياسى كەڭەيدى, فورۋمعا 100 عالىم قاتىسىپ وتىر. ولاردىڭ اراسىندا شەتەلدىك 27 عالىم بار. ەكىنشىدەن, كۇن ءتارتىبى كەڭەيتىلدى, بيىلعى جىلى فيزيكا جانە عىلىمدى قاجەت ەتەتىن تەحنولوگيالار, اۋىل شارۋاشىلىعىنداعى يننوۆاتسيالىق تەحنولوگيالار سالاسىنداعى بىرلەسكەن عىلىمي زەرتتەۋلەر, تۋريزم, سونداي-اق قوعامدىق-گۋمانيتارلىق عىلىمدار بولاشاعى تالقىلانادى. ۇشىنشىدەن, فورۋمنىڭ جۇمىسىنا مەملەكەتتىك ورگانداردىڭ باسشىلارى قاتىسادى», دەدى ق.نەسىپباي ۇلى.

ونىڭ ايتۋىنشا مەملەكەتتىك ورگان وكىلدەرىنىڭ فورۋمعا قاتىسۋى ءوز كەزەگىندە جاس عالىمدارعا ءبىلىم جانە عىلىم, سونداي-اق حالىقارالىق ىنتىماقتاستىق سالاسىنداعى مەملەكەتتىك ساياساتتى جەتىلدىرۋ بويىنشا ءوز ۇسىنىستارى مەن ۇسىنىمدارىن ۋاكىلەتتى ورگاندارعا تىكەلەي جەتكىزۋگە مۇمكىندىك بەرەدى.

«Burabay Forum» الاڭى نەگىزىنەن جاس عالىمدارعا اقپارات الماسۋعا, حالىقارالىق عىلىمي جوبالارعا باستاماشىلىق جاساۋعا, عىلىمي زەرتتەۋلە ردى كوممەرتسيالاندىرۋعا مۇمكىندىك بەرەدى. سول ارقىلى عىلىم جانە ءبىلىم سالاسىنداعى ترانسشەكارالىق ىنتىماقتاستىعى ماسەلەلەرىن تالقىلايتىن بىردەن ءبىر پلاتفورما. وندا وتاندىق جانە شەتەلدىك عالىمدار اراسىندا تاجىريبە الماسۋ, قازاقستان رەسپۋبليكاسىنىڭ وقۋ ورىندارى مەن جاقىن شەتەلدەر اراسىنداعى بايلانىستاردى نىعايتۋ ماسەلەلەرى, بىرلەسكەن عىلىمي زەرتتەۋلەر جۇرگىزۋ كەلەشەگى دە كەڭىنەن قارالادى.

ميراس اسان,

«ەگەمەن قازاقستان»