«استانا-پاريج» ۆەلوشەرۋىنىڭ قاتىسۋشىلارى قوستانايعا جەتتى

زاعيپ جانە ناشار كورەتىن سپورتشىلار بۇل جولى 5 مىڭ شاقىرىمدى باعىندىرماق. ولار قازاقستان, رەسەي, بەلورۋس, پولشا, گەرمانيا جانە فرانتسيانىڭ 30 قالاسىن باسىپ وتەتىن بولادى. مارافونعا قاتىسۋشىلار سالاماتتى ءومىر سالتى مەن پاراليمپيادالىق سپورت تۇرلەرىن ناسيحاتتاۋدى ماقسات تۇتىپتى.

ء«بىز ءوز مىسالىمىزبەن, ىسىمىزبەن مۇگەدەك جاندارعا ۆەلوسيپەد تەبۋگە, بۇل سپورتپەن اينالىسۋعا ابدەن بولادى دەگەن ويدى قالىپتاستىرۋ ەدى. مۇگەدەكتەردىڭ سپورتپەن اينالىسىپ, چەمپيون بولعانىنا, ءبىلىم الىپ, جۇمىسقا تۇرىپ, ءتىپتى بيزنەسپەن اينالىسىپ, جۇمىس ورنىن اشىپ وتىرعانىنا بارلىعىمىز دا كۋامىز» دەدى جۋرناليستەرمەن كەزدەسكەندە كوماندا كاپيتانى باحتيار بازاربەكوۆ. 2016 جىلى 5 ادام وسى ۆەلوسپورت كومانداسىنىڭ نەگىزىن سالعان ەكەن, قازىر ولاردىڭ قاتارى 16 سپورتشىعا جەتىپتى.

ۆەلوشاباندوز جىگىتتەر وسىعان دەيىن الماتى – استانا, الماتى – ىستىقكول باعىتتارىن يگەرىپ ۇلگەرىپتى.

«شەكاراسىز سپورت» كومانداسىنىڭ مىنا باستاماسى ماعان وتە ۇنادى. ولار قوعامدىق سانانى وزگەرتۋ ءۇشىن وسىنداي ارەكەتكە بارىپ وتىر.قازىر مۇمكىندىگى شەكتەۋلى جاندار كوپتەگەن ءىس تىندىرىپ جۇرگەنى بەلگىلى. بىراق جالپى قوعامدىق سانا وزگەرە قويعان جوق. مۇگەدەكتەر مەن قوعام اراسىندا ءالى دە كەدەرگىلەر بار» دەيدى قوستانايداعى ء«ۇمىت-نادەجدا» مۇگەدەكتەرگە ارنالعان قوعامدىق بىرلەستىك توراعاسىنىڭ ورىنباسارى ارۋنا جاقسىعۇلوۆا.

بۇگىن ۆەلوشاباندوزدار قوستانايدان ۋفا قالاسىنا ءجۇرىپ كەتتى. ولاردى قۇرامىندا دارىگەرلەر, ۆيدەوپەراتورلار, مەحانيكتەر مەن اسپازدار بار 4 ماشينا باستاپ جۇرەدى. سپورتشىلار اتاقتى "تۋر دە فرانس" ۆەلوشەرۋىنىڭ وتانى بولعان پاريجگە دەيىن ءالى 4 مىڭ شاقىرىمدى ارتقا تاستايتىن بولادى.

ءنازيرا جارىمبەت,

«ەگەمەن قازاقستان»

قوستاناي