بۇگىن ۋەفا چەمپيوندار ليگاسىندا سىنعا ءتۇسىپ جاتقان ەلوردانىڭ «استانا» كومانداسى اتالعان ءتۋرنيردىڭ ءۇشىنشى ىرىكتەۋ كەزەڭى اياسىندا حورۆاتيانىڭ «دينامو» كومانداسىن ءوز الاڭىندا قابىلدايدى. ەگەر ەلوردا كومانداسى بۇل كەزەڭنەن دە ىركىلمەي وتەتىن بولسا, وندا كەم دەگەندە ەۋروپا ليگاسىنىڭ توپتىق ساتىسىنا جولدامانى ناقتىلاپ قويادى.
«استانا» كلۋبى ءۇشىنشى ىرىكتەۋ كەزەڭىندە دانيا چەمپيونى «ميدتيۋللاند» كلۋبىنا قارسى ويناپ, ەكى ويىن قورىتىندىسى بويىنشا (1:2) ءۇشىنشى ىرىكتەۋ ساتىسىنا شىققان بولاتىن. دانيانىڭ حەرنينگ قالاسىندا وتكەن قارىمتا كەزدەسۋدە ءبىرىنشى مينۋتتان باستاپ شابۋىل شەبىندە كونگولىق شابۋىلشى جۋنيور كابانانگا وينادى. استاناداعى العاشقى ماتچتا رومان مۇرتازاەۆ شىققان-دى. «استانا» كومانداسىنىڭ باس جاتتىقتىرۋشىسى رومان گريگورچۋك قارىمتا ماتچتا وسىنداي وزگەرىس جاسادى. قارسىلاس كوماندا ساپىندا دا وتكەن ويىنمەن سالىستىرعاندا ءبىر ويىنشى عانا وزگەرگەن ەكەن. ەكى كوماندا قۇرامىندا ازداعان وزگەرىس بولعانىمەن, ويىن ءدال ءبىرىنشى كەزدەسۋدەگىدەي ءوتتى.
«مەن بۇگىنگى ويىندا تىڭ وزگەرىستەردىڭ بولۋى مۇمكىن ەكەندىگىن بىلگەن ەدىم. ەگەر شىندىعىنا كەلەر بولساق, دانيا چەمپيوناتىنداعى قارسىلاستاردىڭ ويىنىن كورىپ, قارىمتا كەزدەسۋگە شىعاتىن قۇرامىن ءدال تاپتىم. كەشەگى ويىن استاناداعى كەزدەسۋمەن سالىستىرعاندا ايتارلىقتاي ەرەكشە بولدى دەي المايمىن. مۇمكىن, جانكۇيەرلەردىڭ قىزۋ قولداۋى كەزدەسۋ بارىسىنا باسقاشا اتموسفەرا بەرگەن بولار», دەيدى رومان گريگورچۋك.
كوماندالار كەزدەسۋدىڭ العاشقى مينۋتىنان-اق گول سوعۋدىڭ قامىنا كىرىسىپ, ويىندى بەلسەندى باستادى. اسىرەسە الاڭ يەلەرى جىلدام گول سوعۋعا تىرىسىپ باقتى. دەگەنمەن «استانا» قورعانىسى سىر بەرمەي, قاۋىپتى شابۋىلداردىڭ بەتىن قايتارىپ جاتتى. ورايى كەلگەندە قاقپاشى ەريچ تە الىس-جاقىننان باعىتتالعان سوققىلاردى ءدال اڭداپ, دانيا كومانداسىنىڭ شابۋىلشىلارىن ايىپ الاڭىنا اتتاپ باستىرمادى. گريگورچۋكتىڭ شاكىرتتەرى دە ءجيى شابۋىلداپ, حانسەننىڭ مازاسىن ابدەن قاشىرعان. سونداي ساتتەردىڭ بىرىندە, ناقتىلاي تۇسسەك, 19-مينۋتتا كابانانگا گول سوقتى. الايدا يسپانيالىق تورەشى حۋان مارتينەس بۇل گولدى ەسەپتەمەي تاستادى. 95 مينۋتقا سوزىلعان ويىندا ەسەپ اشىلماي, استاناداعى العاشقى كەزدەسۋدە 2:1 ەسەبىمەن جەڭىسكە جەتكەن ەلوردانىڭ «استانا» كومانداسى چەمپيوندار ليگاسىنىڭ ءۇشىنشى كەزەڭىنە جولداما الدى.
ال وسى كەزەڭدە «استاناعا» قارسىلاس اتانىپ وتىرعان حورۆاتيا ءبىرىنشى ليگاسىنىڭ چەمپيونى «دينامو» چەمپيوندار ليگاسىنداعى جورىعىن ەكىنشى ىرىكتەۋدەن باستادى. 2000 جىلدان بەرى ەۋروكۋبوك ويىندارىنا قاتىسىپ كەلە جاتقان كوماندا ءيزرايلدىڭ «حاپوەل» كلۋبىن ەكى ماتچتىڭ قورىتىندىسى بويىنشا 7:2 ەسەبىمەن تاس-تالقان ەتىپ جەڭدى. حورۆاتتار ءوز الاڭىندا 5:0 ناتيجەسىمەن باسىم تۇسسە, سىرت الاڭداعى قارىمتا كەزدەسۋدە 2:2 ەسەبىمەن تەڭ وينادى.
«دينامو» حورۆاتيانىڭ قازىرگى تاڭداعى ەڭ مىقتى ۇجىمدارىنىڭ ءبىرى سانالادى. نەگىزى 1945 جىلى قالانىپ, تامىرى كەڭگە جايىلعان كوماندا بەدەلى بەس قۇرلىققا تاراعان بىرنەشە تالانتتى فۋتبولشىنى تاربيەلەپ شىعارعان. اڭىز فۋتبولشىلاردىڭ ارىسى زلاتكو كرانچار, بوريسلاۆ تسۆەتكوۆيچتەرمەن باستالىپ, قازىرگى تاڭدا ۇلتتىق قۇرامادا جاسىنداي جارقىلداپ جۇرگەن لۋكا مودريچ, ۆەدران چورلۋكا, ماتەو كوۆاچيچ, دەيان لوۆرەن, دوماگوي ۆيدا جانە تاعى باسقا اياقدوپ شەبەرلەرىمەن كەتە بەرەدى. وسىنداي تالانتتاردىڭ باعىن اشا بىلگەن كوماندا ىشكى چەمپيوناتتىڭ 18 دۇركىن چەمپيونى سانالادى. ءتىپتى, 2005 جىلدان 2015 جىلعا دەيىنگى 10 جىلدىقتا ۇزاق ۋاقىت «بيلەپ-توستەپ», ءبىرىنشى ورىندى ەشكىمگە بەرمەي كەلگەن «ەرلىگى» بار.
سوڭعى 20 جىل كولەمىندە ەۋرودودالاردا جىل سايىن باق سىناپ جۇرگەن «دينامو» وسى ۋاقىت ارالىعىندا ەۋروپانىڭ بىرقاتار ازۋلى كوماندالارىمەن ويناپ, تاجىريبە جيناقتاپ الدى. دەسە دە ءبىزدىڭ «استانا» كلۋبى بۇل كوماندانىڭ الدىندا قاراجاياۋ ەمەس. نەبارى 9 جىلدىق تاريحى بولسا دا, سوڭعى 4-5 جىلدا ەۋروپانى ءدۇر سىلكىندىرگەنى ەشكىمگە جاسىرىن ەمەس. بۇل سوزىمىزگە بىلتىر ەۋروپا ليگاسىنىڭ توپتىق كەزەڭىنەن ءوتىپ, پلەي-وفف ساتىسىنا دەيىن جەتكەنى ايقىن دالەل بولا الادى.
ال ەكى كوماندانىڭ ءدال قازىرگى جاعدايى مەن مۇمكىنشىلىگى قاي دارەجەدە دەگەن سۇراققا جاۋاپ بەرەر بولساق, ويىن تاجىريبەسى بويىنشا «استانا» ءبىرشاما باسىمدىققا يە. سەبەبى حورۆاتيا چەمپيوناتىنىڭ ەكىنشى تۋر ويىندارى وينالسا, قازاقستان بىرىنشىلىگىنىڭ ەكىنشى اينالىمى اياقتالدى. ءسوزىمىز دالەلدى ءھام دايەكتى بولۋ ءۇشىن وسى ورايدا مىناداي ءبىر ستاتيستيكانى سويلەتىپ جىبەرسەك. «دينامو» كومانداسى قاتارىنان 13 ويىندا جەڭىلگەن جوق. دەگەنمەن, ونىڭ جەتەۋى جولداستىق كەزدەسۋ ەكەنىن ەسكەرسەك, رەسمي ماتچتىڭ ەكەۋىندە تەڭ ءتۇسىپ, تورتەۋىندە جەڭىسكە جەتكەن. ەلوردانىڭ «استانا» كومانداسى بولسا, قاتارىنان 12 ويىندا جەڭىلىستىڭ نە ەكەنىن بىلمەي كەلە جاتىر. 10 ماتچتا قارسىلاستارىنان باسىم تۇسسە, ەكى كەزدەسۋدە جەڭىمپاز كوماندانىڭ اتى انىقتالمادى. ەكى كوماندا اراسىنداعى قىسقاشا ستاتيستيكا وسىنداي.
«دينامو» فۋتبولشىلارى كەشە تۇندە ەلىمىزگە تابان تىرەدى. كوماندا باس جاتتىقتىرۋشىسىنىڭ ايتۋىنشا, كلۋب قازاقستانعا جاقسى كوڭىل كۇيمەن كەلگەن, تەك ءبىر فۋتبولشى عانا جاراقاتىنا بايلانىستى زاگرەبتە قالعان. ء«بىزدىڭ ماقساتىمىز – چەمپيوندار ليگاسىنىڭ توپتىق كەزەڭىنە شىعۋ. ول ءبىزدىڭ ورنىمىز. مەنىڭشە, سول ناتيجەگە وسى ويىندا قول جەتكىزەمىز. «استانانى» «حاپوەل بەەر-شاۆا» كومانداسىمەن سالىستىرار بولسام, قازاقستاننىڭ كومانداسى شابۋىلدا وسالدىق تانىتقانىمەن, تاسقامال قورعاۋشىلارى بار. ولاردىڭ بىزگە مۇمكىندىك بەرمەيتىنى انىق. سونداي-اق «استانانىڭ» قاپتالداعى فۋتبولشىلارىمەن ورتالىق جارتىلاي قورعاۋشىلارىنان دا ساقتانۋىمىز كەرەك», دەيدى نەناد بەليتسا.
«استانا» ءوز الاڭىندا جاقسى وينايتىنىن جانە «استانا ارەنا» ستاديونىندا كوپ جەڭىلە بەرمەيتىنىن ەسكەرسەك, بۇگىنگى ويىندا دا جەڭىسكە جەتۋگە مۇمكىندىك بار. بۇگىنگى ماتچتا «استاناعا» قويىلاتىن نەگىزگى تالاپتىڭ ءبىرى – قارسىلاس كوماندا قاقپاسىنا مەيىلىنشە كوپ گول سوعىپ, ءوز قاقپامىزعا گول جىبەرمەۋ. ەگەر وسى تالاپ جۇزەگە اساتىن بولسا, «استانا» كەلەسى كەزەڭگە ءوتۋى بەك مۇمكىن.
ءالي بيتورە,
«ەگەمەن قازاقستان»