جاكارتادا وتەتىن جازعى ازيا ويىندارىندا ايەلدەر اراسىنداعى بوكسشىلار سايىسىندا قازاقستاننىڭ نامىسىن ءۇش سپورتشى قورعايدى. ولار – الماتىلىق نازىم قىزايباي جانە استانالىق ءسانيا سۇلتانقىزى مەن ريمما ۆولوسەنكو.
بۇل بىلعارى قولعاپ شەبەرلەرىنىڭ ەسىمدەرى جانكۇيەرلەرگە جاقسى تانىس. 51 كەلى سالماقتا ونەر كورسەتەتىن نازىم قىزايبايدىڭ ەكى دۇركىن الەم چەمپيونى دەگەن دارداي اتاعى بار. سونىمەن قاتار, ول ەل بىرىنشىلىگىنىڭ بىرنەشە دۇركىن جەڭىمپازى. 57 كەلى سالماقتاعى ءسانيا سۇلتانقىزى مەن 60 كەلى سالماقتاعى ريمما ۆولوسەنكو دا ەلىشىلىك جارىستاردا جاسىنداي جارقىراپ, حالىقارالىق دودالاردا مول تاجىريبە جيعان مىقتىلار.
-قازىرگى كەزدە سوڭعى دايىندىق جۇمىستارىن پىسىقتاۋدامىز. قىزداردىڭ بابى جاقسى. ولار يندونەزيادان قۇر قول قايتپايمىز دەپ قۇلشىنىپ وتىر. بۇل جارىستاعى بىزدەر ءۇشىن باستى قارسىلاستارىمىز قىتاي, ءۇندىستان جانە سولتۇستىك كورەيانىڭ بوكسشىلارى بولماق. باسقا دا مەملەكەتتەردە دە مىقتى سپورتشىلار جەتەرلىك. قالاي بولعاندا دا ازيا ويىندارىندا شاكىرتتەرىم تابىستى ونەر كورسەتىپ, ەل سەنىمىن اقتاۋ ءۇشىن بارىنشا كۇش سالادى, – دەيدى قازاقستاننىڭ ايەلدەر قۇراماسىنىڭ باس باپكەرى ۆاديم پريسياجنيۋك.
عالىم سۇلەيمەن,
«ەگەمەن قازاقستان»