جەتپىسكە جۋىق بالاعا پلاستيكالىق وتا جاسادى

سونداي-اق «بالالار – ءبىزدىڭ بولاشاعىمىز» الەۋمەتتىك جوباسى اياسىندا ميكروتيا جانە ەستۋ ارناسىنىڭ اترەزيا دياگ­نوزى قويىلعان كەڭەسكە بالالار قاتىستى. 

بيىل ماۋسىم ايىندا امەريكالىق حيرۋرگتەر 140-قا جۋىق پاتسيەنتتى قاراپ, 64 بالاعا وتا جاساۋعا شەشىم قابىلدادى. سونىڭ ىشىندە ميكروتيا مەن ەستۋ ارناسىنىڭ اترەزياسى بار 7 بالاعا وتا جاسالدى. بۇل بالالارعا امەريكالىق حيرۋرگ زاماناۋي «Medpore» يمپلانتىن قولدانىپ, قۇلاق قالقانىنا رەكونسترۋكتيۆتى وپەراتسيالار جۇرگىزدى. بۇل وتالار قازاقستاندا العاش رەت جاسالدى جانە امەريكالىق مامانداردىڭ شەبەرلىك-ساباعىنا الماتىدان ارنايى كەلگەن دارىگەرلەر دە قاتىستى. اتالعان جوبانى «اسىل بالا» قوعامدىق قورى اقش-تىڭ «حالىقارالىق ىقپالداستىق توبىنداعى» ارىپتەستەرىمەن بىرلەسىپ «University Medical Center» كورپوراتيۆتىك قورىنىڭ انا مەن بالا ۇلتتىق عىلىمي ورتالىعى بازاسىندا ىسكە اسىردى. پلاستيكالىق وپەراتسيالار جاساۋ ءۇشىن اتالعان قوعامدىق قور 1 795 340 تەڭگە سوماسىنا ءدارى-دارمەك ساتىپ الدى. سونداي-اق 160 650 تەڭگە مولشەرىندە ميكروتيا جانە ەستۋ ارناسىنىڭ اترەزياسى بويىنشا وپەراتسيالاردى جۇرگىزۋگە قاجەتتى درەناجدار ساتىپ الدى. 

جوبانىڭ نەگىزگى ماقساتى – مامانداردىڭ ءوزارا تاجىريبە الماسۋى, وتاندىق حيرۋرگتەردىڭ بىلىكتىلىگىن ارتتىرۋ جانە قازاقستاندىق بالالار اراسىندا مۇگەدەكتىكتى ازايتۋ باعىتىندا ءارى قاراي ءوزارا ىنتىماقتاستىق ورناتۋ. ەسكە سالا كەتەيىك, 2016 جىلعى 4 قازاندا جوبانىڭ العاشقى كەزەڭى باستالىپ, 2017 جىلدىڭ 13-15 ناۋرىزى ارالىعىندا «UMC» كورپوراتيۆتىك قورىنىڭ انا مەن بالا ۇلتتىق عىلىمي ورتالىعى جانە Surgicorps International (اقش) پلاستيكالىق حيرۋرگتەرى وسى ورتالىق بازاسىندا ەلىمىزدىڭ بارلىق وڭىرىنەن كەلگەن 300-دەن استام بالانى, ونىڭ ىشىندە بالالار ۇيلەرىنىڭ 14 تاربيەلەنۋشىسىن قابىلداپ, تەكسەرۋدەن وتكىزگەن بولاتىن. ال ءۇشىنشى كەزەڭدە, 2017 جىلدىڭ مامىر ايىندا 80 بالاعا وتا جاسالدى.     

«ەگەمەن-اقپارات»