استاناداعى «قازمەديا» ورتالىعىندا «ازيا مەديا ديالوگى» اتتى حالىقارالىق شارا باستالدى. جيىندا ورتالىق ازياداعى راديونىڭ بۇگىنى مەن ەرتەڭى, مەديا سالاسىنداعى ورتاق ماسەلەلەر تالقىلانباق. وسىعان وراي ەلورداعا ەۋروپا مەن ازيا راديولارىنىڭ باسشىلارى جينالدى.
جالپى, اۋديتوريانى زەرتتەۋ, راديو فورماتىن قالىپتاستىرۋ, وزىق تاجىريبەلەردى ەسكەرىپ, تەلەراديوحابار تاراتۋ سالاسىن زامانعا لايىق دامىتۋ ماسەلەلەرىن تالقىلاۋ ءۇشىن 40 ەلدەن 150-گە جۋىق ساراپشى كەلدى. بۇل تۋرالى اقپارات جانە كوممۋنيكاتسيالار ءمينيسترى داۋرەن اباەۆ ءمالىم ەتتى.
ءىس-شارا اياسىندا شىلدەنىڭ 9 كۇنى تۇركيانىڭ ترت راديوسى مەن «قازاق راديولارى» جشس باسشىلىعى بەيرەسمي كەزدەسۋ وتكىزدى. كورشىلەس ەلدەگى راديو سالاسىنىڭ ماماندارى استاناداعى ەتنواۋىلدى كورىپ, قازاقتىڭ سالت-داستۇرىمەن كەڭىنەن تانىستى.
تۇركيا راديولارى باسقارماسىنىڭ باسشىسى احمەت اكچاكايا: ء«بىزدى «قازاق راديولارىنىڭ» الەۋمەتتىك جەلىدەگى جۇمىسى قىزىقتىرىپ وتىر. ينتەرنەتتىڭ راديو يميدجىنە بەرەر پايداسىن كورىپ, بولاشاقتا وسى سالادا مىندەتتى تۇردە تاجىريبە الماساتىنىمىزدى ايتقىمىز كەلەدى. ال, ءبىزدىڭ وسى ەلگە كەلگەن باستى ماقساتىمىز – تۇركيا راديولارى مەن «قازاق راديولارى» اراسىندا ىنتىماقتاستىق ورناتۋ», دەدى.
ايتا كەتەيىك, وسى جىلعى مامىر ايىندا «قازاق راديولارى» جشس دەلەگاتسياسى تۇركياعا بارىپ, مالاتيا قالاسىندا تۇركيا ەلدەرى راديو فەستيۆالىنىڭ قۇرمەتتى قوناعى بولعان-دى.
«ەگەمەن-اقپارات»