مەملەكەت باسشىسىنىڭ تاپسىرماسىمەن قر پرەمەر-ءمينيسترى باقىتجان ساعىنتاەۆ تۇركيا رەسپۋبليكاسىنىڭ پرەزيدەنتى رەجەپ ەردوعاننىڭ سالتاناتتى ۇلىقتاۋ راسىمىنە قاتىستى. بۇل تۋرالى primeminister.kz حابارلادى.
تۇركيا پرەزيدەنتىنىڭ لاۋازىمىنا رەجەپ تايپ ەردوعاننىڭ كىرىسۋ راسىمىنە 22 مەملەكەتتىڭ باسشىلارى, 28 پرەمەر-مينيستر مەن پارلامەنت سپيكەرلەرى, سونداي-اق حالىقارالىق ۇيىمداردىڭ 6 حاتشىسى قاتىستى.
ەستەرىڭىزگە سالا كەتەيىك, 24 ماۋسىمدا تۇركيادا پرەزيدەنتتىك جانە پارلامەنتتىك سايلاۋ ءوتتى. ەلدىڭ قازىرگى مەملەكەت باسشىسى رەجەپ تايپ ەردوعان پرەزيدەنتتىك سايلاۋدا 100% بيۋللەتەندەردى ساناۋ قورىتىندىسى بويىنشا ەڭ كوپ داۋىس جينادى — 26,3 ملن-نان استام داۋىس 52,59%. پارلامەنتتىك سايلاۋدا ەردوعان باسقاراتىن ادىلدىك جانە دامۋ پارتياسى ەڭ كوپ داۋىس جينادى. جالپىۇلتتىق داۋىس بەرۋ ەلدەگى مەملەكەتتىك باسقارۋ فورماسىن وزگەرتتى, تۇركيا پارلامەنتتىكتەن پرەزيدەنتتىك رەسپۋبليكاعا اينالدى.
2017 ج. قازاقستان مەن تۇركيا اراسىنداعى تاۋار اينالىمى وتكەن جىلمەن سالىستىرعاندا 28% ءوسىپ, $1,876 ملرد قۇرادى, ال ەكسپورت — $1,146 ملرد تەڭ بولدى. وسى جىلدىڭ قاڭتار-ناۋرىز ارالىعىندا تاۋار اينالىمى $412,9 ملن قۇرادى.