اسا قۇرمەتتى نۇرسۇلتان ءابىش ۇلى!
ءسىزدىڭ تۋعان كۇنىڭىزگە جانە قازاقستاننىڭ استاناسىنىڭ 20 جىلدىق مەرەيتويىنا وراي مەنىڭ شىن جۇرەكتەن قۇتتىقتاۋىمدى قابىل الىڭىز. تاۋەلسىز قازاقستانعا كۇردەلى جانە بەتبۇرىستى جىلدارى باسشىلىق جاساي وتىرىپ, ءسىز ەلدى دانالىقپەن سەنىمدى تۇردە دەموكراتيا مەن پروگرەسس جولىندا باسقارىپ كەلەسىز. وسى جىلدار بويى ءسىز قازاقستان حالقىنىڭ مويىندالعان كوشباسشىسى عانا ەمەس, جاھاندىق سىن-قاتەرلەردىڭ شەشىمىن ءدال تاباتىن, الەمدىك ساياسات ارەناسىنداعى ءسوزى مەن ءىسى قابىسقان جارقىن تۇلعاعا اينالدىڭىز.
تاۋەلسىز مەملەكەتتەر دوستاستىعى كەڭىستىگىندە ءسىزدىڭ كوپجاقتى مەملەكەتارالىق ىنتىماقتاستىقتى دامىتۋعا قوسقان جەكە ۇلەسىڭىزدى وتە جوعارى باعالايدى. دوستاستىقتىڭ قالىپتاسۋ كەزەڭدەرى مەن قازىرگى فورماتتاعى قىزمەتى ءسىزدىڭ ەسىمىڭىزبەن تىكەلەي بايلانىستى. ويتكەنى ءسىز ەنگىزگەن باستاماشىلىقتار تمد-نىڭ ودان ءارى دامۋى تۇجىرىمداماسىنىڭ, ونىڭ اتقارۋشى ورگاندارىن وڭتايلاندىرۋ مەن زاماناۋي جاعدايعا بەيىمدەۋ نەگىزىنە الىندى. تمد كەڭىستىگىندەگى ينتەگراتسيالىق ىنتىماقتاستىققا ءسىزدىڭ ءداستۇرلى قولداۋىڭىز قازاقستان رەسپۋبليكاسىنىڭ جۇيەلى دامۋىنا, دوستاستىق مەملەكەتتەرىنىڭ كوپ قىرلى ءىس-قيمىلىن جانە كورشىلىك قاتىناسىن دامىتۋعا ودان ءارى ىقپال ەتە بەرەتىندىگىنە سەنىمدىمىن.
ءسىز ەۋرازيالىق كونتينەنت ورتالىعىندا كەرەمەت قالانى قالىپتاستىرا وتىرىپ, استانا بەينەسىنە تەرەڭ ساياسي جانە رۋحاني ءمان ەنگىزدىڭىز. بۇگىندە استانا – زاماناۋي قايتالانباس ارحيتەكتۋرالىق ورنەگى بار, ەۋروپا مەن ازيا مادەنيەتى استاسقان كەرەمەت استانالاردىڭ ءبىرى. ول – ۇلتتىق يدەيا مەن مەملەكەتتىلىكتىڭ ۇشتاسۋىنىڭ سيمۆولى. جالپى, استانانىڭ سالىنۋى, دامۋى پوستكەڭەستىك ەلدەر اراسىنداعى ەڭ ۇلكەن مەگاجوباعا اينالدى. قالا ءىرى حالىقارالىق اۋقىمدى فورۋمدار, جەتەكشى ەلدەردىڭ مەملەكەت باسشىلارىنىڭ كەزدەسۋلەرى, ءدىني-كونفەسسياارالىق كونفەرەنتسيالار, الەۋمەتتىك-مادەني, سپورتتىق جانە گۋمانيتارلىق شارالار ءجيى وتەتىن ەڭسەلى ورداعا اينالدى.
الەم استانالارىنىڭ ورتاسىنان لايىقتى ورنىن الىپ ۇلگەرگەن, العا ۇمتىلعان جاس استانا ودان ءارى سۇلۋلانىپ, ايبىندانا ءتۇسسىن!
سىزگە, قادىرلى نۇرسۇلتان ءابىش ۇلى, دەنىڭىزگە ساۋلىق, ال كوپ قىرلى مەملەكەتتىك قىزمەتىڭىزگە تابىس تىلەيمىن. سەرگەي لەبەدەۆ, تمد اتقارۋ كوميتەتىنىڭ توراعاسى – اتقارۋشى حاتشى