3-5 شىلدە كۇندەرى تاتارستان پرەزيدەنتى رۋستام ميننيحانوۆ جۇمىس ساپارىمەن قازاقستاندا بولدى. وسى جۇمىس ساپارى اياسىندا قازاقستان مەن تاتارستاننىڭ 200-دەن استام ىسكەر توپتارى وكىلدەرىنىڭ بيزنەس-فورۋمى وتكىزىلدى, دەپ حابارلادى قازاقستان رەسپۋبليكاسى پرەمەر-ءمينيسترىنىڭ ءباسپاسوز قىزمەتى.
بيزنەس-فورۋمدا ءسوز سويلەگەن قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى اسقار مامين ەكى ەل اراسىنداعى تاۋار اينالىمىنىڭ الەۋەتىن اقش-تىڭ 1 ميلليارد دوللارىنا جەتكىزۋ مۇمكىندىگى بار ەكەندىگىن اتاپ ءوتتى. «مەملەكەت باسشىسى تاتارستانعا بيىلعى ماۋسىم ايىنداعى ساپارى بارىسىندا وسىنداي تاپسىرما بەردى», دەدى ا.مامين.
2017 جىلى قازاقستان مەن تاتارستان اراسىنداعى ساۋدا اينالىمى 700 ملن اقش دوللارىنا جۋىقتادى. بۇل 2016 جىلمەن سالىستىرعاندا 1,7 ەسەگە (425,3 ملن اقش دوللارى) كوپ.
فورۋم اياسىندا ىنتىماقتاستىقتىڭ مۇناي حيمياسى, ماشينا جاساۋ, قورعانىس ونەركاسىبى, كولىك, يننوۆاتسيا سالالارىنداعى بولاشاعى تالقىلاندى. بيزنەس-فورۋم قورىتىندىسى بويىنشا تاراپتار بىرلەسكەن جوبالاردى جۇزەگە اسىرۋدىڭ جول كارتاسىن جاساقتاۋعا كەلىستى.
ونىڭ سىرتىندا, مەملەكەتتىك باسقارۋ اكادەمياسى مەن قازان فەدەرالدىق ۋنيۆەرسيتەتى, قازاقستاننىڭ سىرتقى ساۋدا پالاتاسى مەن تاتارستان ساۋدا-ونەركاسىپ پالاتاسى, «Astana Hub» ءىت ستارتاپ حالىقارالىق تەحنوپاركى مەن ء«ىت-پارك» جوعارى تەحنولوگيالار سالاسىنداعى تەحنوپاركى, «سەمەي اۆتوقۇراستىرۋ زاۋىتى» جشس مەن «راريتەك جوندەۋ-مەحانيكالىق زاۋىتى» ااق اراسىندا ىنتىماقتاستىق تۋرالى قۇجاتتارعا قول قويىلعان بولاتىن.
تاتارستان پرەزيدەنتى استاناعا جۇمىس ساپارى بارىسىندا «استانا» حالىقارالىق قارجى ورتالىعى مەن يسلام قارجى ۇيىمى سامميتىنە قاتىستى.