جارىستىڭ ءتورتىنشى كۇنىنەن كەيىن كوماندالىق ەسەپتە شۆەيتساريا قۇراماسى جەكە-دارا كوش باستادى. ولاردىڭ ەنشىسىندە ءۇش التىن مەدال بار. ەكى التىن, ەكى كۇمىس جانە ءتورت قولانى ولجالاعان اقش ەكىنشى تۇعىرعا تابان تىرەپ تۇر. وڭتۇستىك كورەيا ەكى التىن جانە ءبىر كۇمىسپەن ءۇشىنشى ورىنعا شىقسا, فرانتسيا التىن مەن قولانى قوس-قوستان يەلەنىپ, ءۇشىنشى جانە ءتورتىنشى ساتىلاردى ءوزارا بولىسۋدە. اتالمىش ەلدەردەن بولەك, گەرمانيا, كانادا, قىتاي, چەحيا, گوللانديا, سلوۆاكيا جانە شۆەتسيانىڭ ءانۇراندارى ۆانكۋۆەر كوگىندە شىرقالعانىن ايتا كەتۋ ابزال. ال ماقتاۋلى رەسەيدىڭ ازىرگە جولى بولماي تۇر. ولار ءبىر عانا قولا مەدالعا يەلىك ەتىپ, جالپى ەسەپتە 18-ورىننان قاراڭداپ كورىنەدى.
كانادانىڭ ۆانكۋۆەر قالاسىندا الاۋى تۇتانعان ءححى قىسقى وليمپيا ويىندارى وتە تارتىستى ءوتىپ جاتىر. كەي جاعدايدا اتاقتى سپورتشىلاردىڭ وزدەرى كۇتپەگەن جەردە تۇعىردان تايىپ, جالىندى جاستارعا ورىن بوساتۋدا. ماسەلەن, كەشە جۇپتاسىپ ونەر كورسەتۋدە رەسەيدىڭ مانەرلەپ سىرعاناۋشىلارى جۇلدەسىز قالدى. بىلەتىندەردىڭ ايتۋىنشا, ورىستار العاش رەت 1964 جىلعى وليمپيادادا ولجا سالعان. سودان بەرى ۋاقىتتا التىن تۇعىردى بوساتقان ەمەس.
ۆانكۋۆەردە رەسەيدىڭ ءۇش بىردەي جۇبى ونەر كورسەتتى. سولاردىڭ اراسىنداعى ەڭ مىقتىسى يۋكو كاۆاگۋتي مەن الەكساندر سميرنوۆ ەدى. الايدا سىن ساعاتتا ولاردىڭ جۇيكەسى سىر بەردى. ەكەۋى الما- كەزەك ءسۇرىنىپ, جۇلدەگەرلەر قاتارىنا قوسىلۋ مۇمكىندىگىنەن ايىرىلدى. رەسەيدىڭ وزگە مانەرلەپ سىرعاناۋشىلارىنان ەش قايىر بولمادى. ال بۇل سايىستا قىتاي سپورتشىلارىنىڭ مەرەيلەرى ۇستەم بولدى. شەن سيۋە مەن چجاو حۋنبو التىننان القا تاعىنسا, پان تسين مەن تۋن تسيان كۇمىسكە قول جەتكىزدى. گەرمانيانىڭ سىرعاناۋشىلارى الەنا ساۆچەنكو مەن روبين شولكوۆى ءۇشىنشى تۇعىرعا تابان تىرەدى.
كەشە شۆەيتساريا قۇراماسى ەكى التىنعا قول جەتكىزدى. 15 شاقىرىمدىق جولعا شىققان شاڭعىشى داريو كولونيا شاشاسىنا شاڭ جۇقتىرماسا, تاۋ شاڭعىسىنان ءوتكەن جارىستا ديدە دەفاگونىڭ باعى جاندى. سنوۋبوردينگتە امەريكالىق سەت ۋەسكوت الدىنا جان سالمادى. شاڭعىدان ايەلدەر اراسىنداعى 10 شاقىرىمدىق باسەكەدە شۆەتسيالىق شارلوتتا كاللا قارسىلاستارىن شاق كەلتىرمەدى. ال كونكيشىلەر (500 مەتر) باسەكەسىندە جۇلدەلى ورىنداردىڭ بارلىعىنا سارى قۇرلىق وكىلدەرى جايعاستى. انىقتاپ ايتساق, باس جۇلدەنى وڭتۇستىك كورەيانىڭ وعىلانى مو تاي بۋم ولجالاسا, جاپونيانىڭ ۇلتتىق قۇراما كومانداسى مۇشەلەرى نەيتيرو ناگاسيمو مەن دزودزي كاتو قالعان ەكى ساتىعا تابان تىرەدى.
وسى كۇنى قازاقستاننىڭ ءبىرقاتار سپورتشىلارى دا جارىس جولىنا شىقتى. سولاردىڭ اراسىندا ەڭ ۇزدىك ناتيجە كورسەتكەن شاڭعىشىلار – سۆەتلانا مالاحوۆا مەن الەكسەي پولتورانين. العاشقىسى وزىق وندىققا كىرسە, سوڭعىسى 14-ورىندى يەلەندى. ال نيكولاي چەباتكو, سەرگەي چەرەپانوۆ, ەۆگەني ۆەليچكو, ەلەنا كولومينا, تاتيانا روششينا جانە وكسانا ياتسكايا سىندى بەلدى سپورتشىلارىمىز سەنىم ۇدەسىنەن شىعا العان جوق.
شاڭعىدان جارىس اياقتالعان سوڭ كونكيشىلەر ساپ تۇزەدى. 500 مەترلىك قاشىقتىقتا قازاقستاندىق رومان كرەچ ونەر كورسەتتى. جاس ورەن قانشا جالىنداعانىمەن, الپاۋىت ەلدەردىڭ اتاقتى سپورتشىلارىنا ەش قارسىلىق كورسەتە العان جوق. تىپتەن, ولاردىڭ شاڭىنا ىلەسە الماي قالدى دەسەك, ەشكىم ايىپقا بۇيىرماس. كرەچ قورىتىندى ەسەپتە 34-ورىن الدى.
جارىستىڭ ءتورتىنشى كۇنىنەن كەيىن كوماندالىق ەسەپتە شۆەيتساريا قۇراماسى جەكە-دارا كوش باستادى. ولاردىڭ ەنشىسىندە ءۇش التىن مەدال بار. ەكى التىن, ەكى كۇمىس جانە ءتورت قولانى ولجالاعان اقش ەكىنشى تۇعىرعا تابان تىرەپ تۇر. وڭتۇستىك كورەيا ەكى التىن جانە ءبىر كۇمىسپەن ءۇشىنشى ورىنعا شىقسا, فرانتسيا التىن مەن قولانى قوس-قوستان يەلەنىپ, ءۇشىنشى جانە ءتورتىنشى ساتىلاردى ءوزارا بولىسۋدە. اتالمىش ەلدەردەن بولەك, گەرمانيا, كانادا, قىتاي, چەحيا, گوللانديا, سلوۆاكيا جانە شۆەتسيانىڭ ءانۇراندارى ۆانكۋۆەر كوگىندە شىرقالعانىن ايتا كەتۋ ابزال. ال ماقتاۋلى رەسەيدىڭ ازىرگە جولى بولماي تۇر. ولار ءبىر عانا قولا مەدالعا يەلىك ەتىپ, جالپى ەسەپتە 18-ورىننان قاراڭداپ كورىنەدى
عالىم سۇلەيمەن,
ارنايى “ەگەمەن قازاقستان” ءۇشىن - ۆانكۋۆەردەن.