مەملەكەت باسشىسى نۇرسۇلتان نازارباەۆ استاناعا رەسمي ساپارمەن كەلگەن ءابۋ-ءدابيدىڭ مۇراگەر حانزاداسى, بىرىككەن اراب امىرلىكتەرى قارۋلى كۇشتەرى جوعارعى باس قولباسشىسىنىڭ ورىنباسارى شەيح مۇحاممەد بەن زايد ءال ناحايانمەن كەزدەستى.
اتالعان كەزدەسۋ مارتەبەلى قوناقتارعا لايىقتى ءسان-سالتاناتىمەن, قۇرمەت قاراۋىلى ساپ تۇزەپ, ەكى مەملەكەتتىڭ ءانۇراندارىنىڭ ورىندالۋىمەن باستالدى.
مۇنان سوڭ كەڭەيتىلگەن قۇرامداعى كەزدەسۋدە قازاقستان پرەزيدەنتى ناۋرىز ايىندا بىرىككەن اراب امىرلىكتەرىنە ساپارىنىڭ ءساتتى بولعاندىعىن اتاپ ءوتتى. مەملەكەت باسشىسى, سونداي-اق ءباا-دە شەيح مۇحاممەد بەن زايد ءال ناحاياننىڭ اكەسىنىڭ 100 جىلدىعى تويلانىپ جاتقاندىعىنا قاراماستان, قازاقستان پرەزيدەنتىنىڭ شاقىرتۋىن قابىل الىپ, استاناعا كەلگەندىگى ءۇشىن ريزاشىلىعىن ءبىلدىردى.
سونىمەن قاتار مەملەكەت باسشىسى الماتى مەن استانادا وتكەن قىسقى ۋنيۆەرسيادا ويىندارىنا شەيح مانسۇردىڭ, ال ازيا ويىندارىنا شەيح مۇحاممەدتىڭ كەلگەندىگىن اتاپ ءوتتى.
– مەن ءسىزدىڭ اكەڭىز, مارقۇم بەن زايدپەن كەزدەسكەن ەدىم. وتە كەمەڭگەر, مەيىرىمدى ادام ەدى. ءبىز ول كىسى تۋرالى كىتاپ شىعاردىق, دەگەن مەملەكەت باسشىسى مۇراگەر حانزاداعا اكەسى شەيح زايد بەن سۇلتان ءال ناحايان جايىندا جازىلعان كىتاپتى تابىس ەتتى.
مەملەكەت باسشىسى سونداي-اق شەيح مۇراگەر حانزادانى «استانا – 20 جىل» مەرەيتويلىق مەدالىمەن ماراپاتتادى.
– ءسىز بەن مەنىڭ ارامىزداعى تۋىسقاندىق, باۋىرلاستىق, ءجيى كەزدەسۋلەردىڭ ارقاسىندا ەكى ەلدىڭ اراسىنداعى بيزنەس, ىسكەرلىك قارىم-قاتىناس ۇلعايىپ كەلە جاتىر. ساۋدا-ساتتىعىمىز ەكى ەسە ارتتى. الدىمىزدا كوپ ماقسات بار. ينۆەستيتسيانى ساقتاۋ تۋرالى كەلىسىمگە قول قويدىق. قوسارلانعان سالىق سالۋدى بولدىرماۋ ماسەلەسىن كەلىستىك, دەدى قازاقستان پرەزيدەنتى.
مەملەكەت باسشىسى سونداي-اق گيدروەنەرگەتيكا جانە گاز-حيميا كەشەنى قۇرىلىسى سالاسىنداعى جوبالاردى ءارى قاراي جۇزەگە اسىرۋ ماسەلەلەرىنە توقتالدى. سونىمەن قاتار بىرىككەن اراب امىرلىكتەرىنىڭ عىلىم مەن تەحنولوگيانى دامىتۋ جۇمىستارىنىڭ وزەكتىلىگىنە, وعان قوسا, ەكى مەملەكەت اراسىندا ەنگىزىلگەن ۆيزاسىز رەجىمنىڭ تيىمدىلىگىنە نازار اۋداردى.
قازاقستان پرەزيدەنتى ءباا قولداۋىمەن جۇزەگە اسىرىلىپ جاتقان الەۋمەتتىك جانە ينفراقۇرىلىمدىق جوبالاردىڭ جۇزەگە اسىرىلۋ بارىسىنا دا توقتالىپ ءوتتى.
ءوز كەزەگىندە ءابۋ-ءدابيدىڭ مۇراگەر حانزاداسى شەيح مۇحاممەد بەن زايد ءال ناحايان ەكى ەل باسشىلارىنىڭ تىعىز قارىم-قاتىناستارىنىڭ ارقاسىندا قازاقستان مەن بىرىككەن اراب امىرلىكتەرىنىڭ اراسىندا دوستىق بايلانىستار ورناعاندىعىن اتاپ ءوتتى.
– سىزدەرمەن ارادا اعايىندىق قارىم-قاتىناس قالىپتاستى. ءبىز ءسىزدى ۇلكەن اعامىز دەپ ەسەپتەيمىز جانە ءسىزدىڭ باي ومىرلىك تاجىريبەڭىزدى قۇرمەتتەيمىز. وسىدان وتىز جىل بۇرىن قازاقستان وسىنداي وزگەرىستەردى جۇزەگە اسىرادى دەپ ەشكىم دە كۇتپەپ ەدى. بۇگىندە قازاقستان – كوشباسشى ەل, ايماقتاعى ماڭىزدى مەملەكەت. وسىنىڭ بارلىعىنا ءسىزدىڭ سارابدال ساياساتىڭىز بەن كورەگەن كوشباسشىلىعىڭىزدىڭ ارقاسىندا قول جەتكىزىلدى, دەدى مۇراگەر حانزادا.
تاق مۇراگەرى رەسمي ساپارىنىڭ قورىتىندىسى بويىنشا بىرقاتار ەكىجاقتى قۇجاتقا قول قويىلدى. قازاقستان رەسپۋبليكاسى مەن بىرىككەن اراب امىرلىكتەرى اراسىندا سوتتالعان ادامداردى بەرۋ تۋرالى, مادەني سالاداعى ىنتىماقتاستىق تۋرالى جانە اقپارات جانە كوممۋنيكاتسيالار مينيسترلىگى مەن «ساۋاب» دەراديكاليزاتسيا جونىندەگى حالىقارالىق ورتالىعى اراسىنداعى ىنتىماقتاستىق تۋرالى كەلىسىمدەر بەكىتىلدى.
رەسمي ساپار اياسىندا مۇراگەر حانزادا «استانا» حالىقارالىق قارجى ورتالىعىنىڭ اشىلۋ راسىمىنە قاتىسادى دەپ كۇتىلۋدە.
سەرىك ابدىبەك,
«ەگەمەن قازاقستان»