كۋرچاتوۆتا ەلباسى نۇرسۇلتان نازارباەۆتىڭ «رۋحاني جاڭعىرۋ» جوباسىنا وراي قالا اكىمى الماس وڭداقانوۆتىڭ ۇسىنىسىمەن باۋىرجان مومىش ۇلىنىڭ كەلىنى زەينەپ احمەتوۆا الماتىدان ارنايى كەلدى. كۋرچاتوۆتا زەينەپ اپامەن كەزدەسۋگە كەلگەن حالىقتىڭ سانىندا شەك بولمادى. ءبىر قاراعاندا, حالىق سانى از بولىپ كورىنەتىن قالا تۋعان ءتىل مەن دىنگە, سالت-ءداستۇر مەن ادەت-عۇرىپقا دەگەن ساعىنىشىن, ەڭ باستىسى زەينەپ احمەتوۆاعا دەگەن ىستىق ىقىلاسىن بىردەن اڭعارتتى. كەش «بابامنان قالعان مۇرا ىزەتتىلىك,ارىمدى قويعام سوعان كۇزەتتىرىپ» دەپ اتالدى.
قازاق دەگەن ۇلى حالىق, باسىنان نەبىر زوبالاڭ زامان وتسە دە, وسى تاۋەلسىزدىككە قول جەتكىزىپ, ءوزىن ءوزى ساقتاپ قالعان حالىق, تەكتى ەل, قاستەرلى جەردىڭ يەلەرى,-دەدى زەينەپ اپا,-ەلباسى ايتىپ وتىرعان «رۋحاني جاڭعىرۋ» دەگەنىمىز بۇل ءبىر-ەكى ءانشىنىڭ تىڭداپ, بيلەپ قايتۋ ەمەس, ۇلتىمىزدىڭ سالت-ءداستۇرىن حالىققا جەتكىزۋ, كىشكەنتاي بالالاردى, مەكتەپ وقۋشىلارىن تاربيەلەۋ, سانانى جاڭعىرتۋ بولىپ تابىلادى.
جيىن بارىسىندا قالا əكىمى الماس وڭداقانوۆ الىستان ات ارىلتىپ كەلگەن مەيمانعا ات مىنگىزدى. كۋرچاتوۆ قالاسىنىڭ حالقى اتىنان شاپان جاۋىپ, سىي-سىياپات كورسەتتى.
– زەينەپ احمەتوۆا كەرەمەت جان ەكەن, سابىرلى ءارى سالماقتى, اتاسى باۋىرجان مومىش ۇلى ەستەلىكتەرى بىزگە ەستەلىك بولىپ قالدى, - دەدى وسى شارانى ۇيىمداستىرۋشى كۋرچاتوۆ قالالىق مادەنيەت ءبولىمىنىڭ باسشىسى التىناي سۇلەيمەنوۆا.
بۇدان سوڭ زەينەپ احمەتوۆا كۋرچاتوۆتاعى 3514 اسكەري بولىمىندە بولدى. اسكەري ءبولىمنىڭ كومانديرى اقىلجان اقىلبەكوۆ باتىردىڭ كەلىنىن قۇرمەتپەن قارسى الىپ, ساربازدارمەن جۇزدەستىردى. زەينەپ احمەتوۆا وسىندا اسكەري بورىشىن اتقارۋشى ءار ساربازدىڭ قال-جاعدايىن سۇراپ, ولارمەن وتاندى قورعاۋدىڭ ماڭىزدىلىعى جايلى اڭگىمەلەستى. سودان كەيىن «ماڭگىلىك الاۋ» باسىنا گۇل شوقتارىن قويىپ, تاعزىم ەتتى. كۋرچاتوۆ قالاسىنداعى «داڭق اللەياسىن» اقساقالدار كەڭەسىنىڭ توراعاسى شاحمۇرات تولەۋتاەۆپەن بىرگە اشىپ, تۇساۋكەسەر ءراسىمىن جاسادى.
كۋرچاتوۆتاعى ۇلتتىق يادرولىق ورتالىقتىڭ مۋزەيىن تاماشالاعان زەينەپ احمەتوۆا اپامىزدى بۇل جەردە دە قۇرمەتپەن قارسى الىپ, سىي-سىياپات, ءجون-جورالعىسىن جاسادى. سەمەي يادرولىق سىناق پوليگونىن باسقارۋ تەتىگىن كورىپ, سىناقتاردان زارداپ شەككەندەر جايلى دەرەكتى كورمەنى تاماشالادى. زەينەپ احمەتوۆانىڭ كەلەسى ساپارى اباي اۋدانىندا جالعاستى. بۇدان كەيىن ول الاشتىڭ رۋحاني استاناسى سەمەي قالاسىنا ساپار شەكپەك.
راۋشان نۇعمانبەكوۆا
سۋرەت اۆتوردىكى
شىعىس قازاقستان وبلىسى
كۋرچاتوۆ قالاسى