بۇگىن «بالاپان» تەلەارناسى دارمەن سادۋاقاسوۆتىڭ شاحمات اكادەمياسىمەن بىرىگىپ «شاحمات پاتشالىعى» دەپ اتالاتىن 3D فورماتىنداعى انيماتسيالىق سەريالدى تانىستىرادى. بۇل تۋرالى اقپارات جانە كوممۋنيكاتسيالار ءمينيسترى داۋرەن اباەۆ فەيسبۋكتەگى پاراقشاسىندا جازدى.
"شاحمات – ادامزاتتىڭ ەجەلدەن كەلە جاتقان عاجاپ تابىستارىنىڭ ءبىرى. كوپشىلىك ءالى كۇنگە دەيىن شاحماتتى سپورت ءتۇرى, ونەر نەمەسە عىلىم دەپ باستەسىپ جاتقانىن بايقاپ قالامىز. ويتكەنى بۇل ويىن سان قىرلى ەرەكشەلىگىمەن وزىنە بىردەن باۋراپ الادى.
ول ادامدى جەڭىسكە جىگەرلەندىرىپ, سپورتتىق تاباندىلىعىن قالىپتاستىرادى. الدىڭىزداعى 64 شارشى تاقتاداعى ونداعان ءجۇرىستىڭ ءاربىرىن ەسەپتەپ, مۇمكىندىگىڭىزدى ءمۇلت جىبەرمەۋگە تىرىساسىز. بۇل شاحمات تاقتاسىنداعى عانا ەمەس ومىردەگى قادامدارىڭىزدىڭ دا وڭ بولۋىنا ىقپال ەتەدى. وسىلايشا ءوسىپ كەلە جاتقان ۇرپاقتى شاحماتقا باۋلۋ ءبىزدىڭ ەلىمىز ءۇشىن دە وتە ماڭىزدى", دەي كەلە داۋرەن اباەۆ بۇگىن «بالاپان» تەلەارناسىنىڭ دارمەن سادۋاقاسوۆتىڭ شاحمات اكادەمياسىمەن بىرىگىپ «شاحمات پاتشالىعى» دەپ اتالاتىن 3D فورماتىنداعى انيماتسيالىق سەريالدى تانىستىراتىنىن جازدى.
"32 سەريادان تۇراتىن جوبا بالالارعا جەڭىل ءارى تۇسىنىكتى فورمادا شاحمات تاريحى, تاقتاداعى تاستاردىڭ اتاۋى, ويىن ەرەجەسى, ويىننىڭ تاكتيكاسى مەن ستراتەگياسى تۋرالى تولىق اقپارات بەرەدى.
«شاحمات پاتشالىعى» سەريالى ءجاسوسپىرىم كورەرمەندەرىمىزگە تاڭعاجايىپ ءارى تانىمدىق ساياحاتقا شىققانداي اسەر سىيلايتىنىنا سەنەمىن. سانانىڭ سەرگەك جۇرۋىنە پايداسىن تيگىزەتىن وسىنداي ويىنداردى كوپتەپ يگەرۋ جولىندا سەندەرگە ساتتىلىك تىلەيمىن!", دەپ جازدى اقپارات جانە كوممۋنيكاتسيالار ءمينيسترى.