باتىس قازاقستان وبلىسىنىڭ اقجايىق اۋدانى ورتالىعى – چاپاەۆ اۋىلىندا 100 ورىندىق جاڭا بالاباقشا اشىلدى. بالاباقشا يەسى, اۋىل كاسىپكەرى ءاليا شوقانوۆا جاڭا ءبىلىم ورداسىنا «استانا» دەگەن اتاۋدى لايىق كورىپتى.
جاڭا عيماراتتىڭ اۋماعى 277 شارشىمەتردى الىپ جاتىر. بۇل جەردە جەرگىلىكتى 15 تۇرعىن تۇراقتى جۇمىسپەن قامتىلعان. ءبىر ەرەكشەلىگى – جاڭا بالاباقشادا بۇلدىرشىندەر كەشكى 8-گە دەيىن بولا الادى. مۇنىڭ ءوزى اۋىل تۇرعىندارى ءۇشىن وتە قولايلى بولىپ وتىر.
بالاباقشانىڭ اشىلۋ سالتاناتىندا ءسوز العان اقجايىق اۋدانىنىڭ اكىمى ءادىل جولامانوۆ چاپاەۆ اۋىلىندا بالاباقشا كەزەگىندە تۇرعان سابيلەردىڭ سانى 523-كە جەتكەنىن ايتتى. اۋىلدا بۇعان دەيىن «جىبەك», «ايانا» اتتى جەكە بالاباقشا قىزمەت ەتەتىن. ەندى, مىنە, مەملەكەت پەن جەكە كاسىپكەردىڭ سەرىكتەستىگى نەگىزىندە تاعى ءبىر بالاباقشا ەسىگىن ايقارا اشتى. وسىلايشا اۋىلدا بالاباقشاعا دەگەن زارۋلىك ازايىپ كەلەدى.
- جاڭا بالاباقشادا بولاشاقتا روبوت تەحنيكاسى ۇيىرمەسىن اشۋ جوسپاردا بار. اۋىلدا 15 جىلدان بەرى كاسىپكەرلىكپەن اينالىسىپ كەلە جاتقان ءاليا سەرىكقىزىنىڭ باستامالارىنا جەرگىلىكتى بيلىك وكىلدەرى ءاردايىم قولداۋ كورسەتەدى, - دەيدى اقجايىق اۋدانى اكىمىنىڭ ورىنباسارى تىلەك عابدۋشەۆ.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن نۇربەك يحسان